សង្គ្រាមមួយសប្តាហ៍លើផ្ទៃបឹងទន្លេសាបនៅមិនទាន់ចប់
រយៈពេលមួយសប្តាហ៍បានកន្លងផុតទៅ សង្គ្រាមប្រឆាំងនឹងបទល្មើសនេសាទនៅក្នុងតំបន់បឹងទន្លេសាបនៅតែមិនទាន់ចប់នៅឡើយទេ។ បន្ទាប់ពីឈប់សម្រាកយកកម្លាំងបន្តិចនៅចុងសប្តាហ៍នេះ យុទ្ធនាការនឹងបន្តធ្វើនៅថ្ងៃចន្ទស្អែកដើម្បីកម្ទេចឲ្យដល់ប្ញសគល់នូវភាពអនាធិបតេយ្យនៅក្នុងតំបន់បឹងទន្លេសាបដែលជាសម្បត្តិមហាសាលរបស់កម្ពុជា។ ប្រតិបត្តិការមួយសប្តាហ៍កន្លងទៅនេះបានកម្ទេចចោលសម្រាស់ ធ្នស់ ព្រួល និងឧបករណ៍ខុសច្បាប់ផ្សេងទៀតរាប់រយកន្លែងដែលក្រុមអ្នកនេសាទល្មើសច្បាប់បានដាក់នៅគ្រប់ទិសទី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
រយៈពេលពេញមួយសប្តាហ៍កន្លងទៅ កម្លាំងចម្រុះដឹកនាំដោយអាជ្ញាធរបឹងទន្លេសាបបានសម្រេចកម្ទេចនិងរុះរើសម្រាស់ចំនួន ២៥២ កន្លែង ធ្នស់ធំៗ ចំនួន ២៦ កន្លែង បរ៤កន្លែង កន្សុំចំនួនជាង ៣០០០ និងព្រួល ១០ កន្លែង។ ក្រៅពីនេះ មនុស្សម្នាក់ត្រូវបានចាប់ខ្លួនបញ្ជូនទៅតុលាការ និងពីរនាក់ផ្សេងទៀតកំពុងត្រូវគេតាមចាប់ខ្លួន។ នេះបើយោងតាមរបាយការណ៍ដែលផ្តល់ជូនវិទ្យុបារាំងអន្តរជាតិនៅថ្ងៃអាទិត្យនេះដោយលោក ចាន់ យុត្ថា អគ្គលេខាធិការអាជ្ញាធរបឹងទន្លេសាប។
លោក ចាន់ យុត្ថា បានឲ្យដឹងទៀតថា យុទ្ធនាការទ្រង់ទ្រាយធំនេះបានប្រើប្រាស់កម្លាំងចម្រុះចំនួនជាង ៤០០ នាក់ រួមទាំងគ្រឿងចក្រដឹកតាមសាឡាងជាច្រើនគ្រឿង។ ឧទ្ធម្ភាគចក្រក៏ត្រូវបានប្រើប្រាស់ដើម្បីហោះពិនិត្យមើលពីលើអាកាសផងដែរ។ យ៉ាងណាក៏ដោយនៅសល់ទីតាំងល្មើសជាច្រើនទៀតដែលជាគោលដៅរបស់ក្រុមចម្រុះ។ ប៉ុន្តែ បើតាមប្រសាសន៍លោក ចាន់ យុត្ថា ឧបករណ៍នេសាទជាលក្ខណៈគ្រួសារមិនត្រូវបានប៉ះពាល់ឡើយ។ យុទ្ធនាការក្រោមបទបញ្ជាលេខ០១របស់លោកនាយករដ្ឋមន្ត្រី ហ៊ុន សែនទំនងជាត្រូវបញ្ចប់នៅសប្តាហ៍ក្រោយនេះ។
គួរបញ្ជាក់ថា បទល្មើសនេសាទនៅក្នុងដែនបឹងទន្លេសាប គឺជាបញ្ហាធ្ងន់ធ្ងរដែលបានកើតមានតាំងពីយូរមកហើយ។ បទល្មើសគ្រប់ប្រភេទដែលមានការឃុបឃិតពីសមត្ថកិច្ចមួយចំនួនផងនោះបានបំផ្លិចបំផ្លាញធនធានមច្ឆាជាតិ និងជីវៈចម្រុះបឹងទន្លេសាបស្ទើរតែវិនាសហិនហោចអស់ទៅហើយ។ លោក លឹម គានហោ ប្រធានអាជ្ញាធរបឹងទន្លេសាបបានទទួលស្គាល់ថា ប្រសិនបើគ្មានការបង្ក្រាបទេ ធនធានត្រីដ៏មហាសាលក្នុងបឹងទន្លេសាបនឹងវិនាសអន្តរាយនៅក្នុងរយៈពេលពីរបីឆ្នាំខាងមុខ។
ដោយយល់ពីវិនាសកម្មនេះ ប្រមុខរដ្ឋាភិបាលបានចេញបទបញ្ជាកាលពីថ្ងៃទី២២ឧសភាឲ្យបើកយុទ្ធនាការធ្វើសង្គ្រាមប្រឆាំងបទល្មើសនេសាទក្នុងដែនបឹងទន្លេសាប។ ម្ចាស់ឧបករណ៍ល្មើសច្បាប់ទាំងឡាយត្រូវគេទុកពេល២សប្តាហ៍ ដើម្បីរុះរើដោយខ្លួនឯង។ ក្នុងអំឡុងពេលនោះ ឧបករណ៍ខុសច្បាប់ប្រហែល៨០ភាគរយត្រូវបានរុះរើអស់ទៅហើយមុនពេលកម្លាំងចម្រុះចុះដល់កាលពីថ្ងៃទី៥មិថុនា។ ដូច្នេះ យុទ្ធនាការក្តៅទ្រង់ទ្រាយធំនៅក្នុងដែនទន្លេសាបនៅពេលនេះគ្រាន់តែជាការរុះរើអ្វីដែលនៅសេសលស់តែប៉ុណ្ណោះ។
ក្រៅពីបឹងទន្លេសាប បទល្មើសនេសាទក្នុងដែនសមុទ្រកម្ពុជាត្រូវគេរាយការណ៍ថា ក៏មានសភាពធ្ងន់ធ្ងរដូចគ្នាដែរ ដែលទាមទារឲ្យមានវិធានការបន្ទាន់។ ប៉ុន្តែ រហូតមកទល់ពេលនេះ នៅមិនទាន់មានប្រតិបត្តិការក្តៅបែបនេះនៅលើដែនសមុទ្រនៅឡើយទេ ក្រៅតែពីវិធានការមានស្រាប់ដែលមិនសូវមានប្រសិទ្ធិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ