ណូវែលហ្សឺឡង់ផ្តល់ថវិកាបន្ថែមជាង១៦ម៉ឺនដុល្លារដល់សាលាក្តីខ្មែរក្រហម
នៅថ្ងៃពុធនេះ លោក ចន ឃី ( John Key ) នាយករដ្ឋមន្ត្រី ប្រទេសណូវែលហ្សឺឡង់( New Zerland ) បានប្រកាសផ្តល់ថវិកាបន្ថែមចំនួន ២ សែនដុល្លារ ណូវែលហ្សឺឡង់ ស្មើប្រមាណ ១៦៣.០០០ ដុល្លារអាមេរិកដល់សាលាក្តីខ្មែរក្រហម។ ថវិកាជំនួយរបស់ ណូវែលហ្សឺឡង់ នៅថ្ងៃនេះ បានជួយបំពេញកង្វះថវិកានៅភាគីអន្តរជាតិ សម្រាប់ចុងឆ្នាំ២០១២។ ក៏ប៉ុន្តែសម្រាប់ភាគីកម្ពុជា ត្រូវបានអ្នកនាំពាក្យសាលាក្តីខ្មែរក្រហម លើកឡើងថា អាចនឹងជួបនឹងបញ្ហាថវិកា នៅចុងឆ្នាំនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
លោក ចន ឃី ( John Key ) នាយករដ្ឋមន្ត្រី ប្រទេសណូវែលហ្សឺឡង់ ( New Zerland ) បានប្រកាសផ្តល់ថវិកាបន្ថែម ចំនួន ២ សែនដុល្លារ ណូវែលហ្សឺឡង់ ស្មើប្រមាណ ១៦៣.០០០ ដុល្លារអាមេរិក ដល់សាលាក្តីកាត់ទោសអតីតមេខ្មែរក្រហម។
សេចក្តីប្រកាសបន្ថែមជំនួយដល់សាលាក្តីខ្មែរក្រហមដូច្នេះ ត្រូវបានធ្វើឡើង ក្នុងពេលលោកនាយករដ្ឋមន្ត្រី ណូវែហ្សឺឡង់ នៅព្រឹកថ្ងៃទី២១វិច្ឆិកា ឆ្នាំ២០១២ បានធ្វើដំណើរទៅទស្សនកិច្ច នៅសាលាក្តីខ្មែរក្រហម។
លោកនាយករដ្ឋមន្ត្រី ណូវែលហ្សឺឡង់ ចន ឃី បានធ្វើដំណើរមកកាន់ប្រទេសកម្ពុជា ពេលនេះ ដើម្បីចូលរួមកិច្ចប្រជុំកំពូលអាស៊ីបូព៌ា លើកទី៧ និងកិច្ចប្រជុំជាច្រើនទៀត កាលពីថ្ងៃទី២០វិច្ឆិកាម្សិលមិញ។
លោក នេត្រ ភក្ត្រា អ្នកនាំពាក្យសាលាក្តីខ្មែរក្រហម បានលើកឡើងថា ក្រៅពីប្រកាសពីការផ្តល់ជំនួយបន្ថែមដល់សាលាក្តីខ្មែរក្រហមនៅព្រឹកមិញ លោកនាយករដ្ឋមន្ត្រី ណូវែលហ្សឺឡង់ ចន ឃី បានចាប់អារម្មណ៍ខ្លាំង ចំពោះកិច្ចការដែលសាលាក្តីខ្មែរក្រហមបាននិងកំពុងធ្វើដោយវាយតម្លៃខ្ពស់ ចំពោះកិច្ចខិតខំប្រឹងប្រែង របស់តុលាការ នៅក្នុងការបិទបញ្ចប់នូវសំណុំរឿង ០០១ និងការបន្តបើកសវនាការលើសំណុំរឿង០០២។
លោក នេត្រ ភក្ត្រា បានបន្តថា លោកនាយករដ្ឋមន្ត្រី ចន ឃី បានលើកឡើងថា ប្រទេសណូវែលហ្សឺឡង់នឹងបន្តគាំទ្រជំនួយថវិកាដល់តុលាការខ្មែរក្រហម ដើម្បីអនុញ្ញាតឲ្យតុលាការ អាចបញ្ចប់កិច្ចការរបស់ខ្លួន នៅក្នុងការជំនុំជម្រះក្តី ទៅលើឧក្រិដ្ឋកម្ម ដែលបានកើតឡើង នៅក្នុងរបបខ្មែរក្រហម"។ណូវែលហ្សឺឡង់ ជាប្រទេសម្ចាស់ជំនួយមួយរបស់សាលាក្តីខ្មែរក្រហម។ ចាប់តាំងពីបង្កើតសាលាក្តីចម្រុះនៅឆ្នាំ២០០៦ មកដល់ពេលនេះ ណូវែលហ្សឺឡង់ បានផ្តល់ថវិកា សរុបចំនួន ១,២ លានដុល្លារ ណូវែលហ្សឺឡង់។
តាមអ្នកនាំពាក្យ សម្រាប់ភាគីអន្តរជាតិ មិនមានបញ្ហាទេ សម្រាប់ចុងឆ្នាំ២០១២ នេះ។ តែសម្រាប់ភាគីកម្ពុជា អាចនឹងជួបបញ្ហាកង្វះថវិកា នៅចុងឆ្នាំ២០១២ នេះ។
គម្រោងថវិកាចំណាយ សម្រាប់សាលាក្តីខ្មែរក្រហម នៅឆ្នាំ២០១២ មានចំនួន ៤៥,៧ លានដុល្លារអាមេរិក។ ក្នុងនោះ ភាគីជាតិ ត្រូវការចំណាយ ១០,៣ លានដុល្លារអាមេរិក និងភាគីអន្តរជាតិ មានចំនួន ៣៥,៥ លានដុល្លារអាមេរិក។ ដោយឡែក គម្រោងថវិកា នៅឆ្នាំ២០១៣ ដែលគ្រោងនឹងស្នើសុំ មានចំនួន ៤៣,៩ លានដុលា្លរអាមេរិក ដោយភាគីអន្តរជាតិ ចំនួន ៣៤,២ លានដុល្លារអាមេរិក ហើយភាគីជាតិ ចំនួន ៩,៧ លានដុល្លារអាមេរិក។
លោក នេត្រ ភក្ត្រា បានបន្ថែមថា "ដំណើរទស្សនកិច្ចរបស់លោកនាយករដ្ឋមន្ត្រី ណូវែលហ្សឺឡង់ មកកាន់សាលាក្តីខ្មែរក្រហម ពេលនេះ គឺជាការលើកទឹកចិត្តដល់មន្ត្រីបុគ្គលិក ចៅក្រម ដែលបំពេញការងារនៅសាលាក្តី ក៏ដូចជាបង្ហាញនូវការគាំទ្ររបស់សហគមន៍អន្តរជាតិ ចំពោះដំណើរការរបស់តុលាការ"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ