ម៉ាឡេស៊ី៖ លោក មហាធៀ មហាម៉ាត់ ឈ្នះឆ្នោតក្លាយជានាយករដ្ឋមន្ដ្រីម្ដងទៀតក្នុងវ័យ៩២ឆ្នាំ
នៅក្នុងការបោះឆ្នោតសភានៅម៉ាឡេស៊ី អតីតនាយករដ្ឋមន្ដ្រី លោក មហាធៀ មហាម៉ាត់ ប្រធានសម្ព័ន្ធបក្សប្រឆាំង បានយកឈ្នះគណបក្សកាន់អំណាចរបស់លោក ណាជីព រ៉ាហ្សាក់ ដោយទទួលបានសំឡេងគាំទ្រចំនួន១២១អាសនៈ លើ២២២អាសនៈ។ បើគ្មានការប្រែប្រួលណាមួយទេ លោក មហាធៀ មហាម៉ាត់ ក្នុងវ័យ៩២ឆ្នាំ នឹងស្បថចូលកាន់តំណែងជានាយករដ្ឋមន្ដ្រីម៉ាឡេស៊ី នាថ្ងៃព្រហស្បតិ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ជាជ័យជំនះដ៏គួរឲ្យភ្ញាក់ផ្អើលបំផុតសម្រាប់សម្ព័ន្ធបក្សប្រឆាំងម៉ាឡេស៊ី ដែលបានវ៉ាដាច់គណបក្សរដ្ឋាភិបាលចាំផ្ទះរបស់លោក ណាជីព រ៉ាហ្សាក់ នៅក្នុងការបោះឆ្នោតសភា នៅថ្ងៃពុធ ទី០៩ឧសភា។ ភ្ញាក់ផ្អើលព្រោះនេះគឺជាលើកទីមួយហើយ នៅក្នុងរយៈពេល៦ទសវត្សរ៍ចុងក្រោយ ដែលម៉ាឡេស៊ីត្រូវត្រឡប់មកស្ថិតក្រោមការគ្រប់គ្រងរបស់គណបក្សប្រឆាំងវិញម្ដង រាប់ចាប់តាំងពីប្រទេសនេះទទួលបានឯករាជ្យពីអង់គ្លេសនៅឆ្នាំ១៩៥៧។
បើតាមគណៈកម្មាធិការជាតិរៀបចំការបោះឆ្នោតម៉ាឡេស៊ី សម្ព័ន្ធបក្សប្រឆាំងរបស់លោក មហាធៀ មហាម៉ាត់ ឈ្នះបាន១២១អាសនៈ នៅក្នុងចំណោមអាសនៈសរុប២២២។ នៅម៉ាឡេស៊ី គេត្រូវការសំឡេងភាគច្រើនដាច់ខាត ៥០%បូក១ ឬស្មើនឹង១១២អាសនៈតែប៉ុនណោះ ដើម្បីបង្កើតរដ្ឋាភិបាលសហព័ន្ធ។ បើគ្មានការប្រែប្រួលទេ លោក មហាធៀ មហាម៉ាត់ នឹងស្បថចូលកាន់តំណែងជានាយករដ្ឋមន្ដ្រីនៅថ្ងៃព្រហស្បតិ៍នេះតែ ម្ដង ពោលគឺតែមួយថ្ងៃប៉ុនណោះក្រោយឈ្នះឆ្នោត។ លោកនឹងក្លាយជានាយករដ្ឋមន្ដ្រីដែលមានវ័យចំណាស់ជាងគេនៅលើពិភពលោក។
ទន្ទឹមនឹងជ័យជំនះរបស់លោក មហាធៀ មហាម៉ាត់ មេដឹកនាំគណបក្សកាន់អំណាចលោក ណាជីព រ៉ាហ្សាក់ ឯណោះវិញ បានប្រកាសទទួលស្គាល់នូវបរាជ័យរបស់ខ្លួន។ ថ្លែងនៅថ្ងៃព្រហស្បតិ៍នេះ លោក ណាជីព រ៉ាហ្សាក់ បានគូសបញ្ជាក់ថា លោកព្រមទទួលយកការកាត់ក្ដីរបស់ប្រជាជនម៉ាឡេស៊ី ដែលជ្រើសរើសយកបក្សប្រឆាំងដឹកនាំដោយលោក មហាធៀ មហាម៉ាត់។ យ៉ាងណាក៏ដោយ នាយករដ្ឋមន្ដ្រីចាញ់ឆ្នោតរូបនេះ បានគូសបញ្ជាក់បន្ថែមពីលទ្ធផលបោះឆ្នោតថា គ្មានគណបក្សណាមួយឈ្នះដោយសំឡេងភាគច្រើនធម្មតាឡើយ។ នេះមានន័យថា ការតែងតាំងនាយករដ្ឋមន្ដ្រីថ្មី នឹងត្រូវសម្រេចដោយព្រះមហាក្សត្រម៉ាឡេស៊ី។
គួររំឭកថា លោក ណាជីព រ៉ាហ្សាក់ នាយករដ្ឋមន្ត្រីចាំផ្ទះរបស់ម៉ាឡេស៊ីបច្ចុប្បន្ន បានធ្លាក់ប្រជាប្រិយភាពយ៉ាងខ្លាំង ជាពិសេស ក្នុងចំណោមប្រជាជនដើមកំណើតម៉ាឡេ ដែលជាទំលាប់ តែងតែបោះឆ្នោតឲ្យបក្សលោក។ ការធ្លាក់ចុះប្រជាប្រិយភាពនេះ ក៏ដោយសារតែរឿងអាស្រូវពុករលួយ ការបង្វិលប្រាក់ ផ្លូវងងឹត ប្រមាណ១០ពាន់លានដុល្លារ ដែលបានផ្ទុះឡើងកាលពីឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ