របបគ្រប់គ្រងផ្តាច់ការបាស្ហារអាល-អាស្សាដកំពុងឈានទៅរកការដួលរលំ
ភេរវកម្មអត្តឃាតកាលពីម្សិលមិញនៅទីក្រុងដាម៉ាសដែលបានផ្តាច់ជីវិតមេដឹកនាំស៊ីរីសំខាន់ៗបីនាក់ ហើយដែលជាអ្នកស្និទ្ធនឹងប្រធានាធិបតីបាស្ហារអាល-អាស្សាដ គឺពិតជាការវាយប្រហារមួយដ៏សែនដំណំចំកណ្តាលបេះដូងនៃរបបគ្រប់គ្រងផ្តាច់ការស៊ីរី។ ការវាយប្រហារគ្នាយ៉ាងសែនហិង្សានៅរដ្ឋធានីដាម៉ាសនេះបានបណ្តាលឲ្យមានមនុស្សស្លាប់រាប់រយនាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤២
ភេរវកម្មអត្តឃាតដ៏សែនហិង្សាកាលពីថ្ងៃពុធម្សិលមិញ ដែលបានសម្លាប់មេដឹកនាំស៊ីរីសំខាន់ៗបីនាក់គឺពិតជាបានបង្ហាញឲ្យឃើញថា ប្រព័ន្ធការពារសន្តិសុខនៃរបបគ្រប់គ្រងបាស្ហារអាល-អាស្សាដមានកង្វះខាតច្រើន។ ឥស្សរជនស៊ីរីបីនាក់ដែលបានត្រូវ ភេរវកម្មអត្តឃាតផ្តាច់ជីវិតនោះ សុទ្ធជាមនុស្សដ៏ស្និទ្ធនិងដ៏សំខាន់សម្រាប់ បាស្ហារអាល-អាស្សាដ ដែលក្នុងនោះមាន៖
-រដ្ឋមន្ត្រីក្រសួងការពារជាតិស៊ីរីលោក Daoud Rajha។
-ឧត្តមសេនីយ៍ Hassan Turkmani ភូឈួយអនុប្រធានាធិបតី។
-អនុរដ្ឋមន្ត្រីក្រសួងការពារជាតិស៊ីរី លោក Assef Shawkat ដែលត្រូវជាបងថ្លៃរបស់ បាស្ហារអាល-អាស្សាដ។
គួរកត់សម្គាល់ថា ទីកន្លែងប្រជុំដែលដឹកនាំដោយ ឧត្តមសេនីយ៍ Hassan Turkmani គឺជាទីកន្លែងដែលមានប្រព័ន្ធការពារសន្តិសុខយ៉ាងមាំទាំ។ ក៏ប៉ុន្តែ ដោយហេតុតែនៅមានកង្វះខាត អង្គរក្សម្នាក់ដែលមានទំនាក់ទំនងជាមួយកងកម្លាំងស៊ីរីសេរី សម្រេចបានជោគជ័យក្នុងការធ្វើភេរវកម្មអត្តឃាត ដោយបានផ្តាច់ជីវិតមេដឹកនាំស៊ីរីយ៉ាងសំខាន់ៗបីនាក់ និងធ្វើឲ្យរដ្ឋមន្ត្រីក្រសួងមហាផ្ទៃ Mohammed Ibrahim al-Chaar រងរបួស ក៏ដូចគ្នាអ៊ីចឹងដែរសម្រាប់ ប្រមុខសន្តិសុខជាតិស៊ីរី លោក Hicham Bekhtiar។
អស់រយៈពេលបួនថ្ងៃហើយដែលកងកម្លាំងស៊ីរីសេរីនិងក្រុមបះបោរឯទៀតៗបាននាំគ្នាធ្វើការវាយសម្រុកចូលរដ្ឋធានីដាម៉ាស។ ទីក្រុងដាម៉ាសបានក្លាយទៅជាសមរភូមិប្រយុទ្ធគ្នាយ៉ាងសែនហិង្សារវាងកងកម្លាំងស្មោះស្ម័គ្រនឹងបាស្ហារអាល-អាស្សាដ ហើយនិងកងកម្លាំងស៊ីរីសេរី ដែលបានបណ្តាលឲ្យមានមនុស្សស្លាប់រាប់រយនាក់។ នៅកណ្តាលភ្លើងផ្សែងឆាបឆេះសន្ធោសន្ធៅ គេឮសូរស្នូរកាំភ្លើងធំ កាំភ្លើងត្បាល គ្រាប់រ៉ុកកែត បាញ់បំផ្លោងតបតគ្នា។ រថក្រោះរបស់ទាហានបាស្ហារអាល-អាស្សាដវិញបានខិតខំបើករុលទៅមុខនៅតាមផ្លូវតូចចង្អៀតនៃទីក្រុងដាម៉ាស ប៉ុន្តែជាប់គាំងស្ទះដោយហេតុតែមានបាវដីខ្សាច់និងរនាំងជាឧបសគ្គខាឃាំងពុំឲ្យបើករុលទៅមុខបានឡើយ។
ការវាយប្រយុទ្ធគ្នាយ៉ាងហិង្សាកើតមាននៅសង្កាត់តាដាម៉ុននិងសង្កាត់មីដាន ហើយគេឃើញមានប្រជាជនស៊ីវិលយ៉ាងច្រើនបាននាំគ្នារត់គេចចៀសពីសង្គ្រាម។ កងកម្លាំងយោធារដ្ឋាភិបាល ទោះបីជាមានគ្រឿងអាវុធយុទ្ធភ័ណ្ឌច្រើនយ៉ាងណាក្តី ក៏ពុំអាចយកជួយជំនះលើក្រុមបះបោរស៊ីរីបានឡើយ។ ក្នុងរយៈកាល១៦ខែនៃការងើបបះបោរប្រយុទ្ធតទល់នឹងទាហានរបស់បាស្ហារអាល-អាស្សាដ កងកម្លាំងស៊ីរីសេរី បានចាប់ក្តោបក្តាប់បាននូវបច្ចេកទេសនៃការប្រយុទ្ធឡោមព័ទ្ធនៃសង្គ្រាមឆ្មក់ ហើយពួកគេក៏មានការចេះដឹងផងដែរថា “តើនៅពេលណាគេត្រូវធ្វើការវាយប្រហារដើម្បីឲ្យមានប្រសិទ្ធភាព”។
ប្រទេសអារ៉ាប៊ីសាអ៊ូឌីតនិងប្រទេសកាតារជាអ្នកជួយផ្តល់ផ្គត់ផ្គង់អាវុធយុទ្ធភ័ណ្ឌឲ្យកងកម្លាំងស៊ីរីសេរី។ ហើយគេសង្ឃឹមថា របបគ្រប់គ្រងផ្តាច់ការរបស់ប្រធានាធិបតីស៊ីរីបាស្ហារអាល-អាស្សាដនឹងត្រូវដួលរលំនៅពេលដ៏ខ្លីខាងមុខនេះ ពោលគឺនាឱកាសបិទបញ្ចប់ពិធីតមអាហារ “រ៉ាម៉ាដង់” ដ៏សក្ការៈរបស់អ្នកកាន់សាសនាអ៊ីស្លាម។
រហូតដល់ថ្ងៃព្រហស្បតិ៍នេះ ប្រធានាធិបតីស៊ីរី បាស្ហារអាល-អាស្សាដពុំបានបញ្ចេញប្រតិកម្មអ្វីឡើយ នៅចំពោះមុខភេរវកម្មអត្តឃាតដែលបានផ្តាច់ជីវិតមេដឹកនាំស៊ីរីដ៏សំខាន់បីរូប ដែលក្នុងនោះមានអនុរដ្ឋមន្ត្រីក្រសួងការពារជាតិស៊ីរី លោក Assef Shawkat ដែលត្រូវជាបងថ្លៃ។ រីឯប្រព័ន្ធផ្សព្វផ្សាយជាផ្លូវការក៏ពុំបានបង្ហាញឲ្យឃើញនូវរូបភាពនៃ ភេរវកម្មអត្តឃាតកាលពីថ្ងៃពុធម្សិលមិញដែរ។
បើយោងតាមប្រព័ន្ធផ្សព្វផ្សាយជាផ្លូវការ បាស្ហារអាល-អាស្សាដ បានចេញក្រឹត្យកាលពីម្សិលមិញតែងតាំងឧត្តមសេនីយ៍ Fahd al-Freij ជារដ្ឋមន្ត្រីក្រសួងការពារជាតិថ្មីជំនួស លោក Daoud Rajha ដែលស្លាប់ក្នុងភេរវកម្មអត្តឃាត។
ក្រុមប្រឹក្សាសន្តិសុខអ.ស.ប.ត្រូវបោះឆ្នោតធ្វើសេចក្តីសម្រេចចិត្តនៅថ្ងៃព្រហស្បតិ៍នេះ ដើម្បីសម្រេចគំរាមដាក់ទណ្ឌកម្មទៅលើទីក្រុងដាម៉ាស។ គួរបញ្ជាក់ថា ក្រុមប្រឹក្សាសន្តិសុខអ.ស.ប.គ្រោងបោះឆ្នោតធ្វើសេចក្តីសម្រេចចិត្តតាំងពីថ្ងៃពុធម្សិលមិញម៉្លេះ ប៉ុន្តែបេសកជនពិសេសរបស់អ.ស.ប.លោកកូហ្វីអាណាន បានសុំលើកទៅដាក់នៅថ្ងៃប្រហស្បតិ៍ ដោយសង្ឃឹមថា អាចរិះរកធ្វើការសម្រុះសម្រួលជាមួយទីក្រុងម៉ួស្គូ ដែលបានប្រើសិទ្ធិវេតូប្រឆាំងទល់នឹងសេចក្តីសម្រេចចិត្តរបស់អ.ស.ប.ដល់ទៅពីរលើកចាប់តាំងពីមានវិបត្តិនៅក្នុងប្រទេសស៊ីរី។
រីឯអគ្គលេខាធិការនៃអ.ស.ប. លោក បាន គីមូន ថ្លែងឲ្យដឹងថា “អ.ស.ប.បារម្ភយ៉ាងខ្លាំងពីប្រភពព័ត៌មានខ្លះថា ទាហានរបស់បាស្ហារអាល-អាស្សាដបានប្រើកាំភ្លើងធំប្រឆាំងទល់នឹងប្រជាជនស៊ីវិលនៅក្នុងប្រទេសស៊ីរីនិងនៅក្នុងតំបន់ទីក្រុងដាម៉ាស »។ ហើយសមាជិកទាំង១៥នៃក្រុមប្រឹក្សាសន្តិសុខអ.ស.ប.បានបង្ហាញឲ្យដឹងពីក្តីបារម្ភផងទៀត ខ្លាចក្រែងផលវិបាកនៃសង្គ្រាមនៅស៊ីរី ធ្លាក់ទៅលើប្រទេសលីបង់ជិតខាង។ ដូច្នេះហើយបានជាពួកគេថ្លែងទាមទារឲ្យមាន « ការគោរពយ៉ាងដាច់ខាតទៅលើអធិបតេយ្យ ឯកភាពនិងបូរណភាពដែនដី »របស់ប្រទេសលីបង់។
ទីក្រុងវ៉ាស៊ីនតោនវិញបានយល់ថា របបគ្រប់គ្រងផ្តាច់ការរបស់បាស្ហារអាល-អាស្សាដកំពុងតែបាត់បង់ការក្តោបក្តាប់គ្រប់គ្រងទៅលើប្រទេសស៊ីរី ហើយបានទាមទារឲ្យមានការសាងផ្ទេររដ្ឋអំណាចដោយរិះរកវិធីនយោបាយ ដើម្បីចៀសវាងកុំឲ្យមានថ្លុកឈាមនិងសង្គ្រាមស៊ីវិលនៅក្នុងប្រទេសស៊ីរី។
ចំណែកឯប្រទេសរុស្ស៊ីនិងប្រទេសអ៊ីរ៉ង់ដែលជាសម្ព័ន្ធមិត្តរបស់ទីក្រុងដាម៉ាសវិញ បាននាំគ្នាថ្កោលទោសអំពើភេរវកម្មអត្តឃាត។ ក៏ដូចគ្នាអ៊ីចឹងដែរសម្រាប់ប្រមុខការទូតនៃសហភាពអឺរ៉ុប លោកស្រី Catherine Ashton ។ ប៉ុន្តែលោកស្រីអាហ្សតុនបានទាមទារឲ្យមានសកម្មភាពពិគ្រោះគ្នានៅក្នុងរង្វង់ក្រុមប្រឹក្សាសន្តិសុខនៃអ.ស.ប.និងនៅក្នុងសហគមន៍អន្តរជាតិដើម្បីជួយរិះរកដំណោះស្រាយឲ្យវិបត្តិនៅប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ