ប្រទេសអៀរឡង់ចូលកាន់ដំណែងជាប្រធានផ្លាស់វេនសហភាពអឺរ៉ុប
នៅថ្ងៃអង្គារទី ១ មករា ឆ្នាំ២០១៣ នេះ ប្រទេសអៀរឡង់ចូលកាន់ដំណែង ជាប្រធានផ្លាស់វេនសហភាពអឺរ៉ុប បន្តពីប្រទេសស៊ីប សំរាប់អណ្ណត្តិ ៦ខែ។ នេះជាលើកទីមួយហើយ ដែលសហភាពអឺរ៉ុបស្ថិតនៅក្រោមការដឹកនាំ របស់ប្រទេសមួយដែលធ្លាប់ទទួលបាន នូវជំនួយសង្គ្រោះផ្នែកសេដ្ឋកិច្ច នៅអឺរ៉ុប។ អៀរឡង់មានគំរោងផ្តោតការងារសំខាន់ ទៅលើការបង្កើតអោយមាននូវសហភាពធនាគារមួយ។ លើសពីនេះពីពេលនេះរហូតដល់ចប់ការគ្រប់គ្រងរបស់ខ្លួន អៀរឡង់ចង់អោយ ប្រទេសជាសមាជិកសហភាពអឺរ៉ុបទាំងអស់ ខិតខំសហការគ្នា ធ្វើយ៉ាងណា អោយប្រជាជន ជាពិសេសយុវវ័យមានការងារធ្វើ អោយកាន់តែច្រើនឡើងថែមទៀត។ បច្ចុប្បន្ននេះ ប្រជាជនអឺរ៉ុបប្រហែលជា ២៦លាននាក់ កំពុងស្ថិតក្នុងស្ថានភាពគ្មានការងារធ្វើ។
ចុះផ្សាយនៅថ្ងៃ៖
ស្តាប់ - ០១:២៣
គិតចាប់ពីឆ្នាំ ១៩៩៦មក ប្រទេសអៀរឡង់ កាន់ដំណែងជា ប្រធានគ្រប់គ្រងសហភាពអឺរ៉ុប ជាលើកទីបីហើយ។ ដើម្បីជួយអោយ សហភាពអឺរ៉ុប ងើបរួចផុតពីវិបត្តិសេដ្ឋកិច្ច ក្រុងឌុយប្លាំង សំណូមពរ អោយគ្រប់ប្រទេសជាសមាជិក ខិតខំ ជួយប្រជាជនខ្លួន ជាពិសេសយុវវ័យអឺរ៉ុប អោយរកការងារធ្វើអោយបានច្រើន។
ទន្ទឹមនេះដែរ ប្រទេសអៀរឡង់ មានគំរោងបង្កើតអោយមាននូវសហភាពធនាគារមួយ សំរាប់អឺរ៉ុប។ ផ្លូវដើរនេះ ត្រូវបានត្រួសត្រាយរួចមកហើយ កាលពីចុងឆ្នាំ ២០១២កន្លងមកនេះ ដោយមានការបង្កើតឡើងនូវអ្នកត្រួតពិនិត្យតែមួយគត់ សំរាប់ធនាគារអឺរ៉ុប។
នេះជាលើកទីមួយហើយ ដែលសហភាពអឺរ៉ុបស្ថិតនៅក្រោមការដឹកនាំ របស់ប្រទេសមួយដែលធ្លាប់ទទួលបាន នូវជំនួយសង្គ្រោះផ្នែកសេដ្ឋកិច្ច នៅអឺរ៉ុប។
នៅឆ្នាំ ២០០៩ ក្រុងឌុយប្លាំង បានទទួលនូវទឹកប្រាក់ ៨៥ ពាន់លានដុល្លារ ពីសហភាពអឺរ៉ុប ដើម្បីសង្គ្រោះ វិបត្តិសេដ្ឋកិច្ចក្នុងស្រុក។ នាឆ្នាំ ២០១២ ស្ថានភាពសេដ្ឋកិច្ចអៀរឡង់ ត្រូវបានកែតំរង់ ល្អបន្តិចវិញហើយ។ អត្រាអ្នកគ្មានការងារធ្វើ នៅអៀរឡង់ បច្ចុប្បន្ន មាន១៥ ភាគរយ។ អៀរឡង់ ចង់បង្ហាញថា ខ្លួនចងចាំបានល្អ នូវមេរៀនទាក់ទង នឹងវិបត្តិសេដ្ឋកិច្ច ហើយចង់ទទួលនាម ជាប្រទេសទីមួយ ដែលជួយអោយសហភាពអោយងើបរួចពីវិបត្តិនាឆ្នាំ ២០១៣នេះ។
ទោះយ៉ាងណា ប្រទេសអៀរឡង់ នៅតែជាឋានសួគ៌ សំរាប់សហគ្រាសនានា ដែលចង់រត់រួចពីការបង់ពន្ធ ដោយសារតែក្រុងឌុយប្លាំង យកកម្រិតពន្ធ តែ១២,៥ ភាគរយ ប៉ុណ្ណោះពីសហគ្រាស។ នៅប្រទេសអឺរ៉ុប ផ្សេងទៀត កម្រិតពន្ធលើសហគ្រាស ជាមធ្យមមានដល់ទៅ ២៧ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ