សំណើសុំជំនួយពីសហភាពអឺរ៉ុប ផ្តល់ទំនុកចិត្តដល់ទីផ្សារហិរញ្ញវត្ថុ
នៅទីបំផុត រដ្ឋាភិបាលអៀរឡង់ បានសម្រេចចិត្តសុំជំនួយ ជាផ្លូវការ ពីសហភាពអឺរ៉ុប និងពីអង្គការមូលនិធិរូបិយវត្ថុ ដើម្បីស្រោចស្រង់ប្រព័ន្ធធនាគាររបស់ខ្លួនឲ្យរួចផុតពីវិបត្តិ។ ប៉ុន្តែ នេះជាសេចក្តីសម្រេច ទាំងបង្ខំចិត្ត របស់គណៈរដ្ឋមន្ត្រី ដែលបានបើកជំនួបវិសាមញ្ញ នៅថ្ងៃអាទិត្យម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
បន្ទាប់ពីរារែកអស់មួយគ្រាធំមក អៀរឡង់ បានស្នើសុំ ទាំងបង្ខំចិត្ត ជំនួយជាផ្លូវការពីខាងក្រៅ ពោលគឺពីសហភាពអឺរ៉ុប និងអង្គការមូលនិធិរូបិយវត្ថុអន្តរជាតិ នៅយប់ថ្ងៃអាទិត្យម្សិលមិញ។ សំណើដែលត្រូវសហភាពអឺរ៉ុប និង អង្គការមូលនិធិរូបិយវត្ថុអន្តរជាតិ FMI ទទួលយល់ព្រមភ្លាមមួយរំពេច ដោយគ្មានការភ្ញាក់ផ្អើល។
គ្មានការភ្ញាក់ផ្អើល ព្រោះគឺសហភាពអឺរ៉ុប និង អង្គការមូលនិធិរូបិយវត្ថុអន្តរជាតិ នេះតែម្តងដែលជាអ្នកដាក់គំនាបលើរដ្ឋាភិបាលអៀរឡង់ ឲ្យទទួលយកអន្តរាគមន៍របស់ខ្លួន តាំងពីជាច្រើនថ្ងៃមកហើយ។ ប៉ុន្តែ ការប្រកាសសុំជំនួយរបស់អៀរឡង់នេះ បានកាត់បន្ថយ រាល់មន្ទិលសង្ស័យ ភាពមិនទុកចិត្ត និងបិទបញ្ចប់ភាពជ្រួលច្របល់ទាំងឡាយនៅក្នុងទីផ្សារហិរញ្ញវត្ថុអឺរ៉ុប។ ប្រាក់អឺរ៉ូ នៅថ្ងៃចន្ទនេះ ក៏បានរើបឡើងវិញ នៅចំពោះមុខប្រាក់ដុល្លារអាមេរិក និងប្រាក់យេនជប៉ុន។
សូមជម្រាបថា អៀរឡង់បាននិងកំពុងជួបឧុនភាពសាធារណៈដល់ទៅ ៣២% នៃផលិតផលសរុបក្នុងស្រុក។ បំណុលនេះ ខុសឆ្ងាយពីច្បាប់សហភាពអឺរ៉ុបដែលកំណត់ឲ្យរដ្ឋមួយមានឧុនភាពត្រឹមតែ៣%។ ប្រឈមមុខនឹងបំណុលដ៏ធ្ងន់ធ្ងរបែបនេះ និងដើម្បីជាដំណោះស្រាយយូរអង្វែង ទើបធនាគារកណ្តាលអឺរ៉ុប និងអង្គការមូលនិធិរូបិយវត្ថុអន្តរជាតិ ត្រូវបង្កើតមូលនិធិមួយសំរាប់ជួយធានារ៉ាប់រងសងបំណុល និងទុកពេលឲ្យអៀរឡង់ទាំងអស់មានឱកាសរៀបចំប្រព័ន្ធធនាគារខ្លួនឡើងវិញ។
រដ្ឋមន្ត្រីក្រសួងហិរញ្ញវត្ថុអៀរឡង់បានប៉ាន់ប្រមាណថា ប្រាក់ជំនួយ អាចមានតម្លៃដល់ទៅ ១០០ពាន់លានអឺរ៉ូ។ ពេលនេះអ្នកជំនាញបានទៅដល់ក្រុង Dublin ដើម្បីកំណត់ពីបែបបទផ្សេងៗនៃការខ្ចីប្រាក់ ព្រោះដោយមូលហេតុនយោបាយផ្ទៃក្នុង រដ្ឋាភិបាលអៀរឡង់ចង់ទទួលជំនួយ នៅដំណាក់កាលចុងក្រោយបំផុតតាមដែលពេលវេលាអនុញ្ញាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ