បារាំង កំពុងគិតគូរកំណត់ចំនួនកូតា «ជនអន្តោប្រវេសន៍សេដ្ឋកិច្ច»
បារាំង កំពុងគិតគូរកំណត់កូតាចំនួន«ជនអន្តោប្រវេសន៍សេដ្ឋកិច្ច»។ អស់ជាងមួយខែមកហើយ ដែលរដ្ឋាភិបាលបារាំងបានជជែកដេញដោល និងបានពិភាក្សាវែកញែកនៅក្នុងរដ្ឋសភាបារាំង ពីរឿងកំណត់ចំនួនកូតានៃ«ជនអន្តោប្រវេសន៍សេដ្ឋកិច្ច»។ ពោលយ៉ាងសាមញ្ញគឺជាជនចំណាកស្រុកដើម្បីស្វែងការងារធ្វើ។ គោលនយោបាយថ្មីចំពោះការកំណត់ចំនួនជនបរទេសនៅក្នុងវិស័យការងារបារាំងនេះ គឺមិនផ្អែកទៅលើជនជាតិឬសញ្ជាតិអ្វីទេ តែផ្តោតសំខាន់ទៅលើប្រភេទនៃការងារ។
ចុះផ្សាយនៅថ្ងៃ៖ កែប្រែថ្ងៃទី៖
រឿងនេះជារឿងក្តៅនិងរសើបខ្លាំង ចំពោះរដ្ឋាភិបាលបារាំងដែលត្រូវសម្រេចចិត្ត និងត្រូវថ្លឹងថ្លែង ពីព្រោះថា នៅម្ខាងគឺផ្នែកមនុស្សធម៌ដែលត្រូវគិតគូរជួយជនអន្តោប្រវេសន៍ ហើយនៅម្ខាងទៀត គឺត្រូវប្រឈមមុខនឹងការរិះគន់ចំពោះការបើកភ្នែកមើលការហូរចូលនៃជនចំណាកស្រុក។ អស់ពេលជាច្រើនខែមកហើយដែលរដ្ឋាភិបាលបារាំងរកមធ្យោបាយវិធានការដោះស្រាយរឿងនេះ។ នៅទីបំផុត នាយករដ្ឋមន្ត្រីបារាំង Edouard Philippe ក្នុងសប្តាហ៍នេះ បញ្ជាក់នៅចំពោះមុខអង្គសភា ថាការកម្រិតចំនួនកូតា«ជនអន្តោប្រវេសន៍សេដ្ឋកិច្ច» គឺនឹងត្រូវផ្អែកទៅលើប្រភេទការងារ។ អាជ្ញាធរបារាំងនៅក្នុងវិស័យពលកម្ម ដូចជាក្រសួងការងារ និងស្ថាប័នគ្រប់គ្រងអ្នកអត់ការងារធ្វើ (Pôle d’emplois) នឹងត្រូវជួបជជែកពិភាក្សាជាមួយថៅកែក្រុមហ៊ុនសហគ្រាសតាមតំបន់នីមួយៗ ពិគ្រោះជាមួយនិយោជក និងសហជីព ដើម្បីឱ្យគ្រប់ភាគីទាំងអស់សម្រេចយល់ព្រមគ្នា ដាក់កម្រិតកំណត់ចំនួនជនបរទេសស្វែងរកការងារ នៅក្នុងផ្នែកសេវាកម្ម, ផ្នែកអាហារដ្ឋាន និងផ្នែកសំណង់អគារជាដើម។ ចំនួនកូតាច្បាស់លាស់ នឹងត្រូវចេញផ្សាយជាក់ច្បាស់ នៅរដូវក្តៅឆ្នាំក្រោយ។
ដោយឡែក ចំពោះករណីជនបរទេសដែលចង់មករួមរស់ជួបជុំគ្រួសារនៅស្រុកបារាំង អាជ្ញាធរបារាំងថានឹងពិនិត្យតឹងរឹង។ តឹងរឹងដូចគ្នានឹងនីតិវិធីផ្តល់សញ្ជាតិដែរ។ អ្នកនយោបាយបារាំង លើកឡើងទៀតថា ការផ្តល់ថ្នាំសង្កូវដែលមិនចាំបាច់ទៅដល់ជនអន្តោប្រវេសន៍ គឺត្រូវកាត់បន្ថយ ហើយពីអំណឺះតទៅ គឺស្ថាប័នគ្រប់គ្រងខាងប្រព័ន្ធសន្តិសុខសង្គម Sécurité Sociale នឹងត្រួតមើលរឿងឱ្យមត់ចត់។ ហើយវិធានការផ្សេងៗទៀត ជុំវិញរឿងជនអន្តោប្រវេសន៍ នឹងត្រូវជជែកដេញដោលជាបន្តនៅថ្ងៃព្រហស្បតិ៍ ទី៧វិច្ឆិកា នៅក្នុងរដ្ឋសភាបារាំង។
រដ្ឋាភិបាលយករឿងទាំងនេះ មកជជែកពិភាក្សានិងចាត់វិធានការនៅពេលនេះ គឺជាកិច្ចនយោបាយសុទ្ធសាធ។ ទី១ ព្រោះតែការបោះឆ្នោតក្រុមប្រឹក្សាឃុំសង្កាត់និងរដ្ឋធានី កាន់តែខិតជិតចូលមកដល់ សល់តែ៦ខែទៀតតែប៉ុណ្ណោះ។ ទី២ គណបក្សកាន់រដ្ឋាភិបាល République en Marche របស់លោក ម៉ាក្រុង គឺចង់ដណ្តើមទីតាំងរបស់បក្សសាធារណរដ្ឋ ជំហរស្តាំនិយម ដែលជំរុញជាច្រើនឆ្នាំមកហើយ ឱ្យកំណត់ចំនួនកូតាជនអន្តោប្រវេសន៍និងកម្រិតចំនួនជនភៀសខ្លួន។ អ្នកតំណាងរាស្ត្ររបស់បក្សកាន់អំណាច ក៏ទទួលស្គាល់ដែរថា «ការកំណត់កូតាជនអន្តោប្រវេសន៍ លែងជាគំនិតដាច់មុខរបស់ពួកស្តាំនិយមទៀតហើយ»។ ដូច្នេះ បើពិនិត្យទៅលើវិធានការខាងលើនេះ គេកំពុងតែមើលឃើញថា បក្សដឹកនាំរដ្ឋបារាំងសព្វថ្ងៃ កំពុងតែអនុវត្តគោលនយោបាយរបស់ក្រុមស្តាំនិយម ដែលកន្លងមក លោក អេម៉ាណុយអែល ម៉ាក្រុង ធ្លាប់តែអះអាងថា គណបក្សរបស់លោក គ្មានឆ្វេងគ្មានស្តាំអ្វីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ