បញ្ហាសេរីភាពសារព័ត៌មាន៖តំណាងកម្ពុជានៅUN ចេញមុខការពារ គ.ជ.ប
តំណាងស្ថានបេសកកម្មអចិន្ត្រៃយ៍របស់កម្ពុជាប្រចាំនៅអង្គការសហប្រជាជាតិនិងអង្គការអន្តរជាតិនានានៅទីក្រុងហ្សឺណែវ ប្រទេសស្វីសនៅថ្ងៃទី១៥មិថុនាម្សិលមិញ បានចេញសេចក្តីថ្លែងការណ៍ការពារការណែនាំរបស់គ.ជ.បចំពោះប្រព័ន្ធផ្សព្វផ្សាយនៅមុនការបោះឆ្នោតថា មិនមែនជាការរឹតត្បិតសេរីភាពសារព័ត៌មានឡើយ។ ការបញ្ជាក់នេះ ជាការឆ្លើយតបទៅនឹងការចោទប្រកាន់របស់អ្នកជំនាញសិទ្ធិមនុស្សរបស់អង្គការសហប្រជាជាតិដែលថា គ.ជ.បកំពុងតែរឹតត្បិតការផ្សាយព័ត៌មានទាក់ទងនឹងការបោះឆ្នោត។
ចុះផ្សាយនៅថ្ងៃ៖
ស្តាប់ - ០២:២៣
“តាមការពិត ក្រមសីលធម៌សម្រាប់ប្រព័ន្ធផ្សព្វផ្សាយព័ត៌មានក្នុងដំណើរការបោះឆ្នោតដែលចេញដោយគ.ជ.បមិនមានបញ្ញតិណាមួយដែលហាមឃាត់ប្រព័ន្ធផ្សព្វផ្សាយមិនឲ្យបំពេញកិច្ចការរបស់ខ្លួនស្របតាមច្បាប់ជាធរមានទេ"។ នេះ គឺជាការគូសបញ្ជាក់របស់តំណាងស្ថានបេសកកម្មអចិន្ត្រៃយ៍របស់កម្ពុជាប្រចាំនៅអង្គការសហប្រជាជាតិនៅក្នុងសេចក្តីប្រកាសព័ត៌មានកម្រាស់ពីរទំព័ររបស់ខ្លួន។ តំណាងកម្ពុជាប្រចាំនៅអង្គការសហប្រជាជាតិ បានអះអាងបន្ថែមថា ក្រមសីលធម៌នេះមានគោលបំណងបង្កើតបរិយាកាសអំណោយផលដល់ការបោះឆ្នោតឲ្យដំណើរការទៅដោយរលូន និងមានសណ្តាប់ធ្នាប់។ តាមតំណាងកម្ពុជាប្រចាំនៅអង្គការសហប្រជាជាតិ បើទោះបីនៅក្នុងសង្គមប្រជាធិបតេយ្យក៏ដោយ ប្រព័ន្ធផ្សព្វផ្សាយព័ត៌មានត្រូវប្រតិបត្តិវិជ្ជាជីវៈរបស់ខ្លួនដោយស្ថិតនៅក្រោមច្បាប់ និងបទបញ្ញត្តិដែលពាក់ព័ន្ធនានា។
ការអះអាងរបស់តំណាងកម្ពុជាប្រចាំនៅអង្គការសហប្រជាជាតិនេះ គឺជាការឆ្លើយតបទៅនឹងក្រុមអ្នកជំនាញសិទ្ធិមនុស្សរបស់អង្គការសហប្រជាជាតិដែលបានបង្ហាញក្តីកង្វល់ទៅលើទំហំសេរីភាពសារព័ត៌មាននៅកម្ពុជានៅមុនការបោះឆ្នោត។ ក្រុមអ្នកជំនាញសិទ្ធិមនុស្សចាត់ទុកក្រមសីលធម៌ប្រព័ន្ធផ្សព្វផ្សាយសម្រាប់ការបោះឆ្នោតដែលចេញដោយគ.ជ.បថា បានប៉ះពាល់ដល់សេរីភាពសារព័ត៌មាននៅកម្ពុជា ហើយបានអំពាវនាវដល់អាជ្ញាធរកម្ពុជាឲ្យគោរពនិងធានាសិទ្ធិសេរីភាពក្នុងការបញ្ចេញមតិ ។
ក៏ប៉ុន្តែតំណាងកម្ពុជាប្រចាំនៅអង្គការសហប្រជាជាតិបានហៅការលើកឡើងរបស់ក្រុមអ្នកជំនាញសិទ្ធិមនុស្សនេះថា មានទស្សនៈលម្អៀង។ តំណាងកម្ពុជាប្រចាំនៅអង្គការសហប្រជាជាតិថ្លែងការពារគ.ជ.បថា អ្វីដែលគ.ជ.បមានបំណងហាមឃាត់នោះ គឺការផ្សព្វផ្សាយដែលញុះញង់ឲ្យមានកំហឹង និងការរើសអើងជាតិសាសន៍តាមគ្រប់រូបភាពតែប៉ុណ្ណោះ។
សូមបញ្ជាក់ថា កាលពីថ្ងៃសុក្រម្សិលមិញ រដ្ឋាភិបាលកម្ពុជាក៏បានបញ្ចេញប្រតិកម្មទៅនឹងក្រុមអ្នកជំនាញសិទ្ធិមនុស្សរបស់អង្គការសហប្រជាជាតិនេះផងដែរ។ លោកផៃ ស៊ីផាន ដែលជាអ្នកនាំពាក្យទីស្តីការគណៈរដ្ឋមន្ត្រីកម្ពុជាបានចាត់ការសម្តែងក្តីកង្វល់ពីទំហំសេរីភាពសារព័ត៌មានៅកម្ពុជានៅមុនការការបោះឆ្នោតពីសំណាក់ក្រុមអ្នកជំនាញសិទ្ធិមនុស្សថា ជាការឈ្លានពានដល់ដែនអធិបតេយ្យភាពរបស់កម្ពុជា។ លោកផៃ ស៊ីផាន បានអះអាងថា ការលើកឡើងរបស់អ្នកជំនាញសិទ្ធិមនុស្ស គឺជាការបំភាន់មតិសាធារណជនជាតិ និងអន្តរជាតិរវាងសិទ្ធសេរីភាព និងការបញ្ចេញយោបល់ក្នុងការញុះញង់សាធារណជនខ្មែរមិនឲ្យចេញទៅបោះឆ្នោត។សម្រាប់លោកផៃ ស៊ីផាន ការអំពាវនាវមិនឲ្យសាធារណជនចេញទៅបោះឆ្នោត គឺហួសពីព្រំដែននៃសិទ្ធិ និងសេរីភាពនៃការបញ្ចេញយោបល់ ដែលជាអង្គហេតុ និងអង្គច្បាប់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ