ក្រសួងការពារជាតិមិនចាប់អារម្មណ៍បញ្ជូនក្រុមការងារទៅពិនិត្យទីតាំងដែលរងការចោទថាជាមូលដ្ឋានទ័ពចិន
រាជបណ្ឌិត្យសភាកម្ពុជានៅព្រឹកនេះ បានរៀបចំកិច្ចពិភាក្សាតុមូលមួយស្ដីពី«តើកម្ពុជាត្រូវការវត្ដមានកងទ័ពបរទេសដែរ ឬទេ?»។ ជាកិច្ចពិភាក្សាដែលធ្វើឡើង បន្ទាប់ពីសារព័ត៌មាន Asia Times បានចុះផ្សាយថា កម្ពុជាអនុញ្ញាតឲ្យចិនកសាងមូលដ្ឋានទ័ពជើងទឹកនៅខេត្តកោះកុង។ វាគ្មិនដែលជាមន្ត្រីរដ្ឋាភិបាលកម្ពុជាបានយកវេទិកានេះវាយប្រហារខ្លាំងៗលើសារព័ត៌មាន Asia Times។ ក្នុងនោះ អ្នកនាំពាក្យក្រសួងជាតិបានបង្ហាញការមិនចាប់អារម្មណ៍សោះឡើយក្នុងការបញ្ជូនក្រុមការងារចុះទៅខេត្តកោះកុង ដើម្បីពិនិត្យជាក់ស្តែងនូវទីតាំងដែលរងនូវការចោទប្រកាន់នោះ។
ចុះផ្សាយនៅថ្ងៃ៖
ស្តាប់ - ០២:៣៨
គឺឆ្លើយតបទៅនឹងសំណួររបស់អ្នកចូលរួមម្នាក់ដែលសួរថា តើក្រសួងការពារជាតិនឹងបញ្ជូនក្រុមការងារចុះទៅពិនិត្យជាក់ស្តែងលើទីតាំងដែលរងការចោទថា នឹងក្លាយជាមូលដ្ឋានទ័ពរបស់ចិនដែរឬយ៉ាងណា លោកឈុំ សុជាត អ្នកនាំពាក្យក្រសួងការពារជាតិកម្ពុជាហាក់មិនចាប់អារម្មណ៍នឹងការបញ្ជូនក្រុមការងារចុះទៅពិនិត្យនោះទេ។ តាមលោកឈុំ សុជាត បើទោះបីចុះទៅឫមិនចុះទៅ គឺដូចតែគ្នា។ ដូចតែគ្នា ព្រោះថា វាមិនមានគម្រោងទីតាំងកសាងមូលដ្ឋានទ័ពជើងទឹករបស់ចិននៅក្នុងខេត្តកោះកុងដូចការចុះផ្សាយរបស់សារព័ត៌មាន Asia Times នោះទេ។
បន្ថែមពីលោកឈុំ សុជាត លោកសុខ ទូច ដែលជាប្រធានរាជបណ្ឌិត្យសភាកម្ពុជា បានបញ្ជាក់ថា វាមិនមានភាពចាំបាច់ទេដែលត្រូវបញ្ជូនក្រុមការងារទៅពិនិត្យមើលទីតាំងដែលគ្មានអ្វីទាល់តែសោះនោះ។ លោកសុខ ទូច ថែមទាំងបានហៅការសួរសំណួរបែបនេះថា ជារបៀបតាំងសំណួរបែបបក្សប្រឆាំង និងផ្ចាញ់ផ្ចាលថែមទៀត។ បើតាមលោកសុខ ទូច បើសិនជាមានការកសាងមូលដ្ឋានកងទ័ពជើងទឹករបស់ចិនដូចការចុះផ្សាយមែននោះ គឺផ្កាយរណបរបស់អាមេរិកនឹងចាប់ថតមកផ្សាយជាសាធារណៈបាត់ទៅហើយ ។ លោកសុខ ទូច ថែមទៀតអះអាងទៀតថា លោកបានចុះទៅពិនិត្យមើលដោយខ្លួនឯងរួចហើយ តែគ្មានអ្វីនោះទេ។
ចំណែកអ្នកនាំពាក្យរដ្ឋាភិបាលកម្ពុជា លោកផៃ ស៊ីផានវិញ ក៏មិនសូវពេញចិត្តនឹងសំណួរនេះដែរ។ មិនពេញចិត្ត ព្រោះលោកគូសបញ្ជាក់ម្តងជាពីរដងហើយថា ការផ្សាយរបស់ Asia Times គឺជាព័ត៌មានមិនពិត។ ដូច្នេះហើយ វាគ្មានភាពចាំបាច់ដែលត្រូវចុះទៅពិនិត្យតាមការចុះផ្សាយរបស់សារព័ត៌មានមួយនេះឡើយ។
សូមបញ្ជាក់ថា សារព័ត៌មាន Asia Times កាលពីថ្ងៃទី១៥ វិច្ឆិកា បានចុះផ្សាយនូវអត្ថបទមួយថា កម្ពុជាកំពុងស្ថិតនៅចំណុចកណ្តាលនៃសង្គ្រាមត្រជាក់ថ្មី។ សារព័ត៌មាននេះ បានលើកឡើងថា នៅក្នុងពេលដ៏ឆាប់ខាងមុខនេះ កំពង់ផែទឹកជ្រៅមួយដែលវិនិយោគដោយចិន នឹងលេចខ្លួនឡើងនៅក្នុងខេត្តកោះកុង ហើយកំពង់ផែទឹកជ្រៅនេះ នឹងក្លាយជាមូលដ្ឋានយោធាដែលចិនប្រើប្រាស់សម្រាប់សុំចតនាវាចម្បាំង។
ភ្លាមៗ ក្រសួងការពារជាតិ និងប្រមុខរដ្ឋាភិបាលកម្ពុជា បានចេញមកច្រានចោលព័ត៌មាននេះដោយថា វាជាព័ត៌មានមិនពិត។ លោកនាយករដ្ឋមន្ត្រីហ៊ុន សែន បានអះអាងថា កម្ពុជាមិនមានមូលដ្ឋានកងទ័ពបរទេសនៅលើទឹកដីរបស់ខ្លួនឡើយ ហើយថា កម្ពុជាក៏មិនអនុញ្ញាតឲ្យបរទេសណាយកកម្ពុជាធ្វើជាទីលាននៃការសាកល្បងមនោគមន៍វិជ្ជា ឬ អាវុធជាថ្មីនោះទេ។ តាមលោកនាយករដ្ឋមន្ត្រី ការអនុញ្ញាតឲ្យមានមូលដ្ឋានកងទ័ពបរទេសលើទឹកដីកម្ពុជា គឺខុសនឹងរដ្ឋធម្មនុញ្ញ ហើយថា កម្ពុជាគ្មានភាពចាំបាច់ និងមិនត្រូវការកងទ័ពបរទេសណាមួយមកតាំងមូលដ្ឋាននៅលើទឹកដីកម្ពុជាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ