សហគមន៍ខ្មែរកម្ពុជាក្រោម នឹងចំណាយជាងមួយម៉ឺនដុល្លារប្តូរយកឯកសារខ្មែរ៥ពាន់ទំព័រពីបារាំង
សហគមន៍ខ្មែរកម្ពុជាក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ បានរកឃើញឯកសារសំខាន់ៗទាក់ទងនឹងទឹកដីកម្ពុជាក្រោមប្រមាណ៥ពាន់ទំព័រនៅក្នុងប្រទេសបារាំង។ ក្រោយពីការរកឃើញ នៅពេលនេះឯកសារទាំងនោះកំពុងត្រូវបានថតចម្លងចេញពីឯកសារដើម។ សហគមន៍ខ្មែរកម្ពុជាក្រោម បានវាយតម្លៃថា នឹងត្រូវចំណាយទឹកប្រាក់ប្រមាណ១២៥០០អឺរ៉ូ ឫប្រមាណជាង១៣០០០ដុល្លារអាមេរិកចំពោះការថតចម្លងឯកសារទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
បន្ទាប់ពីបញ្ចប់បេសកម្មស្រាវជ្រាវស្វែងរកឯកសារនានាពាក់ព័ន្ធនឹង ទឹកដីកម្ពុជាក្រោមនៅក្នុងប្រទេសបារាំងរយៈពេលមួយខែកន្លងទៅ សហគមន៍ខ្មែរកម្ពុជាក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យ បានរកឃើញឯកសារចំនួនប្រមាណ៥ពាន់ទំព័រដែលនិយាយពីការផ្ទេរទឹកដី កម្ពុជាក្រោមទៅឲ្យប្រទេសវៀតណាម។
ប្រធានសហគមន៍ខ្មែរកម្ពុជាក្រោម លោកថាច់ សេដ្ឋា ដែលទើបវិលត្រឡប់មកពីប្រទេសបារាំងវិញកាលពីសប្តាហ៍មុន បានប្រាប់វិទ្យុបារាំងអន្តរជាតិនៅព្រឹកថ្ងៃអាទិត្យនេះថា ឯកសារទាំងនោះភាគច្រើនសរសេរជាភាសាបារាំង ហើយនៅពេលនេះកំពុងធ្វើការថតចម្លងចេញពីសំណៅឯកសារដើម។ បើតាមប្រធានសហគមន៍ខ្មែរកម្ពុជាក្រោមរូបនេះ ការថតចម្លងឯកសារទាំងនោះ មានតម្លៃ២.៥០អឺរូ ក្នុងមួយទំព័រ ហើយសរុបទាំងអស់សហគមន៍ខ្មែរកម្ពុជាក្រោមនឹងត្រូវចំណាយទឹកប្រាក់ដល់ទៅចំនួនប្រមាណ១២៥០០អឺរ៉ូ ឫប្រមាណ១៣០០០ដុល្លារអាមេរិក។
ឯកសារទាំង៥ពាន់ទំព័រ ដែលសហគមន៍ខ្មែរកម្ពុជាក្រោម និងសម្ព័ន្ធយុវជនខ្មែរ ដើម្បីលទ្ធិប្រជាធិបតេយ្យបានរកឃើញ រួមមានដូចជា ព្រះរាជសារព្រះករុណាព្រះបាទនរោត្តមផ្ញើរជូនរដ្ឋាភិបាលបារាំង កិច្ចព្រមព្រៀងបារាំងវៀតណាមនៅឆកសមុទ្រហាឡុង នៅដាឡាត់ និងនៅហ្វុងតេនណឺប្លូជាដើម។ ក្រៅពីនេះ ក៏រកឃើញកំណត់ហេតុប្រជុំសភាបារាំងក្នុងការកាត់ទឹកដីខ្មែរឲ្យ វៀតណាមថ្ងៃទី០៤ មិថុនាឆ្នាំ១៩៤៩ សន្ធិសញ្ញាបារាំងវៀតណាម និងកំណត់ហេតុចរចាផ្សេងៗ ព្រមទាំងលិខិតឆ្លងឆ្លើយសម្ងាត់ជាច្រើនដែលទាក់ទងនឹងការកាត់ផ្ទេរ ទឹកដីខ្មែរឲ្យវៀតណាម។ ឯកសារទាំងនេះ ត្រូវបានរកឃើញនៅក្នុងបណ្ណាសារដ្ឋានជាតិបារាំង នៅខេត្តអេ អង់ប្រូវ៉ង់ (Aix-en-Provence) ប្រទេសបារាំង តាមការណែនាំរបស់ស្ថានទូតបារាំង ប្រចាំនៅកម្ពុជា។
យ៉ាងណាក៏ដោយ លោកថាច់ សេដ្ឋា មិនអាចបង្ហាញថា ឯកសារទាំងនោះនឹងត្រូវថតចម្លងចប់រួចរាល់នៅពេលណាមួយឲ្យប្រាកដនោះទេ ប៉ុន្តែលោកគ្រាន់តែបញ្ជាក់ថា អាចនឹងត្រូវចំណាយពេលជាច្រើនខែទៀត ព្រោះថាឯកសារទាំងនោះ មានស្ថានចាស់ហើយខ្លះបានរហែក ដែលពិបាកក្នុងថតចម្លង និងត្រូវចំណាយទឹកប្រាក់ច្រើនបែបនេះ។ ប្រឈមនឹងបញ្ហានេះ ប្រធានសហគមន៍ខ្មែរកម្ពុជាក្រោម ក៏បានអំពាវនាវឲ្យប្រជាពលរដ្ឋខ្មែរទាំងអស់ទាំងនៅក្នុងប្រទេស និងក្រៅប្រទេសចូលរួមផ្តល់វិភាគទានដល់សហគមន៍កម្ពុជាក្រោម ដើម្បីយកទៅបង់ថ្លៃនៃការថតចម្លងនេះ។
បើតាមលោកថាច់ សេដ្ឋា ក្រោយពីបញ្ចប់ការថតចម្លង សហគមន៍ខ្មែរកម្ពុជាក្រោមនឹងធ្វើការបកប្រែជាផ្លូវការនូវឯកសារទាំងនោះពីភាសាបារាំងមកជាភាសាខ្មែរ និងអង់គ្លេស។ បន្ទាប់មកសហគមន៍ខ្មែរកម្ពុជាក្រោម នឹងដាក់ជូនទៅកាន់ក្រសួងអប់រំ ដើម្បីស្នើសុំបញ្ចូលក្នុងកម្មវិធីសិក្សា តម្កល់នៅរាជ្យបណ្ឌិតសភាកម្ពុជា និងអង្គការយូណេស្តូ ដើម្បីរក្សាទុកជាប្រវត្តិសាស្ត្រជាតិ។ ហើយអ្វីដែលចាំបាច់ជាងនេះទៀតនោះ គឺសហគមន៍ខ្មែរកម្ពុជាក្រោម នឹងយកឯកសារទាំងនោះ ដាក់ទៅកាន់ស្ថានទូតវៀតណាមប្រចាំនៅកម្ពុជា ដើម្បីបញ្ជាក់ពីប្រវត្តិសាស្ត្រពិតនៃទឹកដីកម្ពុជាក្រោម និងទាមទារឲ្យរដ្ឋាភិបាលវៀតណាមសុំទោសជាសាធារណៈចំពោះការលើកឡើងរបស់អ្នកនាំពាក្យស្ថានទូតរបស់ខ្លួនដែលថា ទឹកដីកម្ពុជាក្រោមជារបស់វៀតណាមតាំងពីយូរយារណាស់មកហើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ