អតីតបក្សប្រឆាំងគ្រោងធ្វើបាតុកម្មមិនទទួលស្គាល់រដ្ឋាភិបាលថ្មី និងជំរុញឲ្យចិនដកខ្លួនចេញពីរដ្ឋអំណាចខ្មែរ
ក្រុមតំណាងរាស្ត្រ និងសមាជិកអតីតគណបក្សសង្គ្រោះជាតិគ្រោងរៀបចំបាតុកម្មទ្រង់ទ្រាយធំមួយនៅក្រៅប្រទេស ដើម្បីប្រកាសបដិសេធមិនទទួលស្គាល់រដ្ឋាភិបាលថ្មីរបស់កម្ពុជាដែលកើតចេញពីការបោះឆ្នោតដែលពួកគេហៅជា”ការបោះឆ្នោតក្លែងក្លាយ។ នេះបើតាមការប្រកាសឲ្យដឹងពីលោកអេង ឆៃអ៊ាង នៅក្នុងវេទិកាសាធារណៈមួយក្នុងក្រុងLowell សហរដ្ឋអាមេរិកកាលពីថ្ងៃសៅរ៍។ ព្រមជាមួយគ្នានេះ ពួកគេក៏នឹងធ្វើការទាមទារឲ្យចិនដកខ្លួនចេញពីការគាំទ្ររដ្ឋអំណាចខ្មែរបច្ចុប្បន្នផងដែរ។
ចុះផ្សាយនៅថ្ងៃ៖
ស្តាប់ - ០២:៣០
អនុប្រធានអតីតគណបក្សសង្គ្រោះជាតិ លោកអេង ឆៃអ៊ាង បានអះអាងឲ្យដឹងថា នៅពេលនេះ អន្តរជាតិកំពុងតែដាក់សំពាធមកលើរដ្ឋាភិបាលកម្ពុជាចំពោះការបោះឆ្នោតដែលគ្មានវត្តមានអតីតបក្សប្រឆាំងចូលរួម។ ដូច្នេះហើយ លោកថា ដើម្បីឲ្យការដាក់សំពាធនេះកាន់តែមានប្រសិទ្ធភាពនោះ គឺក្រុមសមាជិកអតីតគណបក្សសង្គ្រោះជាតិមិនត្រូវនៅស្ងៀមនោះទេ ពោល គឺត្រូវធ្វើសកម្មភាពបន្ថែមទៀត។ សកម្មភាពដែលលោកអេង ឆៃអ៊ាង ចង់សំដៅដល់នោះ គឺការធ្វើបាតុកម្មនៅក្រៅប្រទេសដើម្បីប្រឆាំងមិនទទួលស្គាល់នូវរដ្ឋាភិបាលថ្មីដែលកើតចេញពីការបោះឆ្នោតថ្ងៃ២៩កក្កដា។
គួរជំរាបជូនថា តាមគម្រោង ក្រុមអ្នកតំណាងរាស្ត្រមកពីគណបក្សជាប់ឆ្នោតទាំងអស់ នឹងត្រូវចូលប្រជុំសភាលើកដំបូងនៅថ្ងៃទី១៩ កញ្ញា ហើយពួកគេនឹងត្រូវស្បថចូលកាន់តំណែងនៅព្រះបរមរាជវាំងនៅល្ងាចថ្ងៃដដែលនោះតែម្តង។ ចំណែករដ្ឋាភិបាលថ្មីវិញ នឹងត្រូវប្រកាសជាផ្លូវការនៅថ្ងៃទី២០ ខែកញ្ញា។ នេះបើតាមលោកនាយករដ្ឋមន្ត្រីហ៊ុន សែន។ ចំពោះរឿងនេះ លោកអេង ឆៃអ៊ាងបានអះអាងថា ការធ្វើបាតុកម្មនឹងត្រូវធ្វើឡើងនៅមុនថ្ងៃបង្កើតរដ្ឋាភិបាលថ្មីនេះ។ ជាមួយនឹងគម្រោងបាតុកម្មនេះ ក្រុមសមាជិកអតីតបក្សប្រឆាំងក៏បានគ្រោងនឹងធ្វើញាត្តិដាក់ទៅរដ្ឋាភិបាលបរទេសក្នុងប្រទេសដែលខ្លួនកំពុងរស់នៅដើម្បីស្នើកុំឲ្យទទួលស្គាល់រដ្ឋាភិបាលថ្មីរបស់កម្ពុជាផងដែរ។
ក្រៅពីគម្រោងធ្វើបាតុកម្មមិនទទួលស្គាល់រដ្ឋាភិបាលថ្មីនេះ ក្រុមតំណាងរាស្ត្រ និងសមាជិកអតីតគណបក្សសង្គ្រោះជាតិក៏គ្រោងនឹងតវ៉ាទាមទារឲ្យមហាយក្សចិនឈប់គាំទ្រ និងដកខ្លួនចេញពីរដ្ឋអំណាចខ្មែរនាពេលបច្ចុប្បន្ននេះ។ ពួកគេបារម្ភថា បើចិននៅតែភ្ជាប់ខ្លួនជាមួយរដ្ឋអំណាចខ្មែរ នោះចិនអាចនឹងនាំឲ្យមានរបបវាលពិឃាតឡើងវិញ ប៉ុន្តែពួកគេក៏អះអាងដែរថា ពលរដ្ឋខ្មែរក្រៅប្រទេសនឹងធ្វើសកម្មភាពមិនឲ្យមានហេតុការណ៍នោះកើតឡើងបានឡើយ។ នេះបើតាមការឲ្យដឹងពីលោកអេង ឆៃអ៊ាងដដែល។
សូមបញ្ជាក់ថា ខណៈដែលប្រទេសលោកសេរីមួយចំនួនសម្តែងការខកចិត្តចំពោះការបោះឆ្នោតនៅកម្ពុជា ប្រទេសចិនឯណោះវិញបានប្រកាសគាំទ្រការបោះឆ្នោតនេះ ដោយថែមទាំងប្រាប់ទៅប្រទេសដទៃកុំឲ្យលូកដៃចូលកិច្ចការផ្ទៃក្នុងកម្ពុជានៅក្រោយការបោះឆ្នោតថែមទៀត។ ការមើលឃើញរបស់ចិនលើការបោះឆ្នោតក៏មិនខុសពីរដ្ឋាភិបាលកម្ពុជាដែរ គឺការបោះឆ្នោតបានប្រព្រឹត្តទៅដោយសេរី ត្រឹមត្រូវ និងយុត្តិធម៌ ដោយមានពលរដ្ឋជាច្រើនបានទៅបោះឆ្នោត។ លោកសុខ ឥសាន អ្នកនាំពាក្យគណបក្សកាន់អំណាច បានចាត់ទុកថា ជនណាមិនទទួលស្គាល់ឆន្ទៈរបស់ប្រជាពលរដ្ឋកម្ពុជា គឺជាការរំលោភយ៉ាងអគតិចំពោះសិទ្ធិសម្រេចរបស់ប្រជាពលរដ្ឋកម្ពុជា ក៏ដូចជាការរំលោភលទ្ធិប្រជាធិបតេយ្យ សេរី ពហុបក្សនៅកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ