អតីតបក្សប្រឆាំងបើកយុទ្ធនាការនៅក្រៅប្រទេសប្រមែប្រមូលការគាំទ្រការវិលចូលស្រុករបស់លោកសម រង្ស៊ី
នៅពេលនេះ លោកសម រង្ស៊ី និង ថ្នាក់ដឹកនាំអតីតគណបក្សសង្គ្រោះជាតិដទៃទៀតកំពុងស្ថិតនៅក្នុងប្រទេសអូស្ត្រាលី ដើម្បីជួបជាមួយប្រជាពលរដ្ឋខ្មែរ និង អ្នកនយោបាយអូស្ត្រាលីខ្លះក្នុងបំណងស្វែងរកការគាំទ្រលើការវិលត្រឡប់ចូលស្រុកវិញនៅថ្ងៃទី០៩ ខែវិច្ឆិកា។ ក្រៅពីអូស្ត្រាលីនេះ ថ្នាក់ដឹកនាំអតីតបក្សប្រឆាំងក៏បានទៅកាន់ប្រទេសនូវែលសេឡង់ផងដែរក្នុងគោលបំណងដូចគ្នានេះ។ បើតាមអតីតបក្សប្រឆាំង បន្ថែមពីលើប្រទេសទាំងពីរនេះ ពួកគេក៏នឹងធ្វើដំណើរទៅកាន់ប្រទេសផ្សេងទៀតផងដែរ។
ចុះផ្សាយនៅថ្ងៃ៖
ស្តាប់ - ០២:២៩
បន្ទាប់ពីប្រកាសជាក់លាក់ពីថ្ងៃវិលចូលស្រុកវិញ ថ្នាក់ដឹកនាំនៃអតីតគណបក្សប្រឆាំងបានដាក់គោលដៅធ្វើដំណើរទៅកាន់ប្រទេសចំនួនដែលមានប្រជាពលរដ្ឋខ្មែររស់នៅច្រើនទាំងនៅអាស៊ី អឺរ៉ុប ឫអាមេរិកជាដើម។ ដំបូងបំផុតបន្ទាប់ពីការប្រកាសនេះ លោកសម រង្ស៊ី និង ថ្នាក់ដឹកនាំផ្សេងទៀតនៃអតីតគណបក្សសង្គ្រោះ ជាតិបានទៅកាន់ប្រទេសអូស្ត្រាលី និង នូវែលសេឡង់។ នៅទីនោះ ពួកគេបានជួបជាមួយប្រជាពលរដ្ឋខ្មែរ និង អ្នកនយោបាយខ្លះនៃប្រទេសទាំងពីរ ដើម្បីបញ្ជាក់លម្អិតពីគម្រោងវិលចូលប្រទេសកម្ពុជាវិញ និងស្វែងរកការគាំទ្រ និង ដឹងឮចំពោះការវិលចូលស្រុកវិញនេះ។ ក្រៅពីប្រទេសទាំងពីរនេះ អតីតបក្សប្រឆាំងក៏បានបញ្ជូនលោកស្រីមួរ សុខហូរ អនុប្រធានបក្សនេះទៅកាន់ប្រទេសជប៉ុន ដើម្បីគៀងគរការគាំទ្រផងដែរ។
បើទោះបីនៅពេលនេះ លោកសម រង្ស៊ី និង ថ្នាក់ដឹកនាំដទៃទៀតមិនទាន់បញ្ចប់ដំណើរទស្សនកិច្ចនៅអូស្ត្រាលីក៏ដោយ ប៉ុន្តែ លោកអេង ឆៃអ៊ាង ដែលជាអនុប្រធានអតីតគណបក្សសង្គ្រោះជាតិបានគូសបញ្ជាក់ថា ប្រជាពលរដ្ឋខ្មែរនៅប្រទេសទាំងនេះបានជំរុញ និងលើកទឹកចិត្តដល់ពួកគេក្នុងការវិលចូលប្រទេសកម្ពុជាវិញ។ចំណែក អ្នកនយោបាយខ្លះនៃប្រទេសទាំងនោះ ក៏បានគាំទ្រដល់ដំណើរមាតុនិវត្តន៍របស់ពួកគេនេះផងដែរ។
ប៉ុន្តែ លោកសុខ ឥសាន អ្នកនាំពាក្យគណបក្សប្រជាជនកម្ពុជាមិនជឿថា ប្រទេសទាំងនោះគាំទ្រដល់ការវិលត្រឡប់មកវិញរបស់ក្រុមលោកសម រង្ស៊ីឡើយ ព្រោះមិនមានហេតុផលអ្វីដែលតម្រូវឱ្យពួកគេធ្វើការគាំទ្រនោះទេ។ ជាមួយគ្នានេះ លោកក៏បានសង្កត់ធ្ងន់ដែរថា យុទ្ធនាការប្រមែប្រមូលការគាំទ្រនេះ គឺគ្រាន់តែជានយោបាយទាល់ច្រកតែប៉ុណ្ណោះ។
យ៉ាងណាក៏ដោយ ក្រៅពីប្រទេសអូស្ត្រាលី នូវែលសេឡង់ និង ជប៉ុន ថ្នាក់ដឹកនាំអតីតប្រឆាំងក៏នឹងធ្វើដំណើរទៅកាន់ប្រទេសមួយចំនួនទៀតផងដែរនៅក្នុងតំបន់អឺរ៉ុប។ រីឯនៅពាក់កណ្តាលខែកញ្ញាខាងមុខនេះ ពួកគេនឹងទៅជួបជុំគ្នាជាថ្មីម្តងទៀតនៅសហរដ្ឋអាមេរិកក្នុងគោលបំណងស្វែងរកការគាំទ្រការវិលត្រឡប់ចូលប្រទេសកម្ពុជាវិញ។ នេះបើតាមការបញ្ជាក់ឱ្យដឹងរបស់លោកអេង ឆៃអ៊ាង។
តាមគម្រោង លោកសម រង្ស៊ី និង ថ្នាក់ដឹកនាំនៃអតីតគណបក្សសង្គ្រោះជាតិនឹងចូលស្រុកវិញនៅថ្ងៃទី០៩ ខែវិច្ឆិកាខាងមុខនេះ។ ប៉ុន្តែមជ្ឈដ្ឋានខ្លះនៅតែមិនជឿថា លោកសម រង្ស៊ី ហ៊ានវិលចូលស្រុកដូចការកំណត់ទុកនោះឡើយ។ បើទោះជាបែបនេះក្តី រដ្ឋាភិបាលកម្ពុជាបានត្រៀមអាជ្ញាធរមានសមត្ថកិច្ចរួចរាល់ហើយ ដើម្បីចាំចាប់ខ្លួនលោកសម រង្ស៊ី ដាក់ពន្ធនាគារតាមដីការបស់តុលាការ នៅពេលណាដែលលោកសម រង្ស៊ី មកដល់ប្រទេសកម្ពុជានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ