រដ្ឋាភិបាលព្យាករថា កំណើនសេដ្ឋកិច្ចនឹងធ្លាក់មកនៅត្រឹម ៦,៥% នៅឆ្នាំក្រោយដោយសារបញ្ហា EBA
រដ្ឋាភិបាលកម្ពុជាបានព្យាករទុកថា នៅក្នុងឆ្នាំ២០១៩នេះ សេដ្ឋកិច្ចកម្ពុជាអាចសម្រេចកំណើនបានក្នុងរង្វង់៧,១%។ ប៉ុន្តែ នៅក្នុងឆ្នាំ ២០២០ កំណើននេះអាចនឹងធ្លាក់ចុះមកនៅត្រឹម ៦,៥% វិញ ដោយសារតែ ដំណើរការដកប្រព័ន្ធអនុគ្រោះពន្ធ EBA របស់សហភាពអឺរ៉ុប។ ដំណើរការដក EBA ដែលរដ្ឋាភិបាលកម្ពុជាយល់ឃើញថា អាចនឹងដាក់សម្ពាធដល់ការនាំចេញរបស់កម្ពុជា។ ប្រឈមមុខនឹងបញ្ហានេះ រដ្ឋាភិបាលកម្ពុជាក៏បានត្រៀមលក្ខណៈដើម្បីទប់ទល់ដែរ តាមរយៈការបង្កើតឱ្យមានកញ្ចប់ថវិកាបម្រុងសម្រាប់ដោះស្រាយបន្ទាន់។
ចុះផ្សាយនៅថ្ងៃ៖
ស្តាប់ - ០២:៥៤
ការដកប្រព័ន្ធអនុគ្រោះពន្ធ EBA របស់សហភាពអឺរ៉ុប នឹងផ្ដល់ផលប៉ះពាល់មកលើកំណើនសេដ្ឋកិច្ចជាតិរបស់កម្ពុជា។ រដ្ឋាភិបាលកម្ពុជា បានព្យាករថា នៅឆ្នាំ២០២០ខាងមុខ សេដ្ឋកិច្ចកម្ពុជាត្រូវបានរំពឹងថា នឹងថមថយកំណើនមកត្រឹម៦,៥% ដោយសារតែការរំពឹងទុកផលប៉ះពាល់នៃលទ្ធភាពក្នុងការដកប្រព័ន្ធអនុគ្រោះពន្ធEBA ដែលអាចនឹងដាក់សម្ពាធដល់ការនាំចេញរបស់កម្ពុជា ជាពិសេសលើផលិតផលកាត់ដេរទៅកាន់ទីផ្សារអឺរ៉ុប។ នេះបើតាមសារាចរណ៍ណែនាំស្តីពីការរៀបចំផែនការយុទ្ធសាស្រ្តថវិកាឆ្នាំ ២០២០-២០២២ របស់រដ្ឋាភិបាលកម្ពុជា ដែលបានចេញកាលពីថ្ងៃទី១០ ខែមេសាកន្លងទៅ។
បើតាមរដ្ឋាភិបាលកម្ពុជា កំណើនព្យាករណ៍ធ្លាក់ចុះ៦,៥%នេះ ត្រូវបានគាំទ្រដោយកំណើននៃវិស័យកសិកម្មប្រមាណ ១,៧% និង កំណើនវិស័យឧស្សាហកម្មប្រមាណ៨,៩% ខណៈវិស័យកាត់ដេរត្រូវបានព្យាករថា នឹងមានកំណើនទាបប្រមាណ៣,៥% និងវិស័យសំណង់អាចសម្រេចបានប្រមាណ១៦,១% ព្រមទាំងកំណើនវិស័យសេវាកម្មអាចនឹងសម្រេចបាន៦,៤%នៅក្នុងឆ្នាំ២០២០។ រដ្ឋាភិបាលកម្ពុជាបានបង្ហាញឱ្យដឹងដែរថា ផលប៉ះពាល់នៃការដកប្រព័ន្ធអនុគ្រោះពន្ធEBAនេះ ក៏នឹងធ្វើឱ្យមានការថយចុះនៃឱនភាពសមតុល្យពាណិជ្ជកម្មដែរ ដោយសារតែការថមថយនៃការនាំចូលវត្ថុធាតុដើមកាត់ដេរ ស្របនឹងកំណើនទាបនៃការនាំចេញផលិតផលកាត់ដេរ។
ការព្យាករណ៍របស់រដ្ឋាភិបាលកម្ពុជានេះ ក៏មិនខុសគ្នានឹងរបាយការណ៍ស្តីពីបច្ចុប្បន្នភាពសេដ្ឋកិច្ចកម្ពុជារបស់ធនាគារពិភពលោកដែលបានចេញផ្សាយកាលពីខែឧសភាកន្លងទៅដែរ។ ធនាគារពិភពលោកបានលើកឡើងថា ប្រសិនបើកម្ពុជាបាត់បង់ភាពអនុគ្រោះនាំទំនិញចូលទីផ្សារអឺរ៉ុបដោយរួចពន្ធក្រោមប្រព័ន្ធអនុគ្រោះពន្ធ EBA នោះវាអាចនឹងបន្ថយល្បឿននៃការនាំចេញពីកម្ពុជា។ ធនាគារពិភពលោកក៏បានចង្អុលបង្ហាញថា កម្ពុជានឹងខាតបង់ចំណូលជាង៦០០លានដុល្លារអាមេរិក ក្នុងនោះ វិស័យវាយណភ័ណ្ឌជិត៤០០លានដុល្លារ រោងចក្រផលិតស្បែកជើងជិត១៣០លានដុល្លារ និងពីការនាំចេញអង្ករជាង១៤០លានដុល្លារ បើអឺរ៉ុបដកប្រព័ន្ធEBAពីកម្ពុជា។
ប្រឈមមុខនឹងបញ្ហានេះ រដ្ឋាភិបាលកម្ពុជា និង សហភាពអឺរ៉ុបក៏កំពុងតែបន្តជជែកពិភាក្សាគ្នា។ ប៉ុន្តែឆ្លៀតពេលនេះ កម្ពុជាក៏បានត្រៀមលក្ខណៈផងដែរ ប្រសិនបើរបូតប្រព័ន្ធអនុគ្រោះពន្ធ EBA នោះ។ ការត្រៀមលក្ខណៈសំខាន់បំផុតមួយរបស់រដ្ឋាភិបាល គឺការគិតគូរឱ្យមានកញ្ចប់ថវិកាត្រៀមបម្រុងសម្រាប់ដោះស្រាយបន្ទាន់ និងចាំបាច់ភ្លាមៗ។ នេះបើតាមការលើកឡើងនៅក្នុងសារាចរណ៍ណែនាំស្តីពីការរៀបចំផែនការយុទ្ធសាស្រ្តថវិកា ឆ្នាំ ២០២០-២០២២។ ក្រៅពីនេះ រដ្ឋាភិបាលកម្ពុជាក៏ធ្លាប់អះអាងថា នឹងស្វែងរកទីផ្សារថ្មីៗបន្ថែមទៀតសម្រាប់បម្រើការនាំចេញរបស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ