លោកស ខេង៖លោកសម រង្ស៊ី ប្រកាសចូលស្រុកវិញ ព្រោះអស់ក្រឡានយោបាយសម្រាប់ដើរតទៅទៀត
តាំងពីប្រកាសចូលស្រុកវិញមកដល់ពេលនេះ គេនៅមិនទាន់ដឹងថាតើលោកសម រង្ស៊ី នឹងមកពេលណាឲ្យប្រាកដនៅឡើយទេ។ អំឡុងអ្នកគាំទ្រកំពុងរង់ចាំនេះ លោកស ខេង រដ្ឋមន្ត្រីក្រសួងមហាផ្ទៃ បានចម្អកថា ការប្រកាសរបស់លោកសម រង្ស៊ី នេះ គឺគ្រាន់តែដើម្បីចង់ស្ដារប្រជាប្រិយភាពឡើងវិញ ព្រោះអស់ក្រឡានយោបាយសម្រាប់ដើរតទៅទៀតតែប៉ុណ្ណោះ។ លោកស ខេង លើកឡើងដូច្នេះនៅក្នុងពិធីផ្សព្វផ្សាយលទ្ធផលនៃសន្និបាតគណៈកម្មាធិការកណ្ដាលលើកទី៤១ របស់បក្សប្រជាជនកម្ពុជាកាលពីម្សិលមិញនៅក្នុងខេត្តបាត់ដំបង ។
ចុះផ្សាយនៅថ្ងៃ៖
ស្តាប់ - ០២:២៧
រដ្ឋមន្ត្រីក្រសួងមហាផ្ទៃកម្ពុជា លោកស ខេង បានចាត់ទុកការប្រកាសវិលចូលស្រុកវិញរបស់លោកសម រង្ស៊ី ថាជាបំណងចង់ស្ដារប្រជាប្រិយភាពរបស់ខ្លួនឡើងវិញ។ ស្ដារឡើងវិញ ព្រោះលោកសម រង្ស៊ី តាមលោកស ខេង គឺបានបាត់បង់ការគាំទ្រទាំងពីសំណាក់អន្តរជាតិ និង អ្នកគាំទ្រនៅក្នុងប្រទេសកម្ពុជា។ ហេតុដូច្នេះហើយ អតីតប្រធានអតីតគណបក្សសង្គ្រោះជាតិរូបនេះ ចាំបាច់ត្រូវតែប្រកាសធ្វើសកម្មភាពតាមរយៈការវិលចូលមកក្នុងប្រទេសកម្ពុជាវិញនេះឯង។ បើតាមលោកស ខេង លោកសម រង្ស៊ី ដឹងខ្លួនថា អស់ប្រជាប្រិយភាពតាំងពីត្រូវបានសមាជិកអតីតបក្សប្រឆាំងប្រកាសតែងតាំងលោកជាប្រធានស្តីទីអតីតគណបក្សសង្គ្រោះជាតិនៅអាមេរិកមកម្លេះ។
គណៈកម្មាធិការអចិន្ត្រៃយ៍នៃអតីតគណបក្សសង្គ្រោះជាតិកាលពីចុងសប្តាហ៍មុនបានសម្រេចឲ្យលោកសម រង្ស៊ីវិលចូលប្រទេសកម្ពុជាវិញ តែមិនបានកំណត់កាលបរិច្ឆេទច្បាស់លាស់នោះទេ។ ប៉ុន្មានថ្ងៃក្រោយការប្រកាសនេះ លោកនាយករដ្ឋមន្ត្រីហ៊ុន សែន បានប្រកាសស្វាគមន៍វត្តមានលោកសម រង្ស៊ី ដោយបញ្ជាក់ថា កំពុងរង់ចាំយ៉ាងអន្ទះសារ ដើម្បីចាប់ខ្លួនលោកសម រង្ស៊ី បញ្ចូលទៅក្នុងពន្ធនាគារតាមសាលក្រមរបស់តុលាការ។ ប៉ុន្តែក្រោយមកបន្តិច លោកសម រង្ស៊ី តាមរយៈទំព័រហ្វេសប៊ុកបានអំពាវនាវដល់កងទ័ពកម្ពុជាកុំឲ្យស្ដាប់តាមបញ្ជាលោកនាយករដ្ឋមន្ត្រីហ៊ុន សែន ដើម្បីចាប់ខ្លួនលោក និងបង្ក្រាបលើអ្នកគាំទ្រដែលមកទទួលលោកនៅពេលលោកមកដល់ប្រទេសកម្ពុជា។ មិនតែប៉ុណ្ណោះ លោកថែមទាំងអំពាវនាវដល់ពួកគេកុំឲ្យបន្តការពាររដ្ឋាភិបាលរបស់លោកនាយករដ្ឋមន្ត្រីហ៊ុន សែនថែមទៀត។
ភ្លាមៗក្រសួងការពារជាតិកម្ពុជាតាមរយៈអ្នកនាំពាក្យបានចេញមកប្រកាសថ្កោលទោសដោយប្រឆាំងដាច់ខាតចំពោះការអំពាវនាវរបស់លោកសម រង្ស៊ី នេះ។ តាមសេចក្តីថ្លែងការណ៍កាលពីថ្ងៃសៅរ៍ អ្នកនាំពាក្យក្រសួងការពារជាតិចាត់ទុកថា រាល់សកម្មភាពណាដែលគាំទ្រទៅនឹងការអំពាវនាវរបស់លោកសម រង្ស៊ី គឺជាអំពើខុសច្បាប់ ហើយថា ប្តេជ្ញាចិត្តបង្ក្រាបដាច់ខាត ដើម្បីថែរក្សាសន្តិសុខ សណ្តាប់ធ្នាប់សង្គម និងសន្តិភាពជូនជាតិមាតុភូមិ។ បន្ថែមលើនេះ មេទ័ព និង កងទាហានផ្សេងៗទៀត ក៏បានចេញមកប្រកាសប្រឆាំងនឹងការអំពាវនាវរបស់លោកសម រង្ស៊ីនេះជាបន្តបន្ទាប់ផងដែរ។ ពួកគេខ្លះថា នៅតែបន្តការពាររដ្ឋាភិបាលរបស់លោកនាយករដ្ឋមន្ត្រីហ៊ុន សែន ហើយខ្លះទៀតប្រើប្រាស់ដល់ថ្នាក់ពាក្យកម្ចាត់ និងកម្ទេចលោកសម រង្ស៊ី និងបក្ខពួកថែមទៀត បើហ៊ានដឹកនាំសកម្មភាពធ្វើបដិវត្តន៍ពណ៌ចង់ផ្តួលលោកនាយករដ្ឋមន្ត្រីហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ