អគ្គស្នងការដ្ឋាននគរបាលជាតិប្រកាសថា នឹងប្រើមធ្យោបាយគ្រប់រូបភាពតាមចាប់លោកសម រង្ស៊ី ដាក់គុក
អគ្គស្នងការដ្ឋាននគរបាលជាតិនៅថ្ងៃសៅរ៍ ទី២៧ ខែកក្កដានេះ បានចេញមកប្រកាសថា ខ្លួននឹងប្រើប្រាស់គ្រប់មធ្យោបាយគ្រប់រូបភាពទាំងអស់ ដើម្បីតាមចាប់ខ្លួនលោកសម រង្ស៊ី និង បក្ខពួកមកផ្តន្ទាទោសទៅតាមច្បាប់របស់កម្ពុជា។ ការប្រកាសតាមចាប់ខ្លួនលោកសម រង្ស៊ីឱ្យបាននេះ ធ្វើឡើងបន្ទាប់ពីលោកសម រង្ស៊ី តាមរយៈទំព័រហ្វេសប៊ុកបានសរសេរសារវាយប្រហារលើរដ្ឋាភិបាលកម្ពុជាជាបន្តបន្ទាប់។
ចុះផ្សាយនៅថ្ងៃ៖
ស្តាប់ - ០២:១៧
អគ្គស្នងការដ្ឋាននគរបាលជាតិតាមរយៈអ្នកនាំពាក្យបានអះអាងឱ្យដឹងថា អគ្គស្នងការដ្ឋាននគរបាលជាតិបានទទួលដីកាបង្គាប់ឲ្យចាប់ខ្លួនលោកសម រង្សី និងបក្ខពួកដែលត្រូវបានតុលាការសម្រេចផ្តន្ទាទោស ហើយបច្ចុប្បន្នកំពុងគេចខ្លួន។ ដូច្នេះហើយ អគ្គស្នងការដ្ឋាននគរបាលជាតិនឹងចាត់វិធានការតាមគ្រប់រូបភាពនិងគ្រប់មធ្យោបាយស្របតាមច្បាប់ ដើម្បីអនុវត្តឲ្យមានប្រសិទ្ធភាពតាមដីការបស់តុលាការក្នុងការស្វែងរក និងចាប់ខ្លួនលោកសម រង្ស៊ី និងបក្ខពួកយកមកផ្តន្ទាទោសទៅតាមច្បាប់របស់កម្ពុជា។
អ្វីជាការកត់សម្គាល់ ការប្រកាសតាមចាប់ខ្លួនលោកសម រង្ស៊ី និង បក្ខពួកឱ្យទាល់តែបាននេះ ធ្វើឡើងបន្ទាប់ពីលោកសម រង្ស៊ី តាមរយៈទំព័រហ្វេសប៊ុករបស់ខ្លួននាពេលប៉ុន្មានថ្ងៃនេះបានសរសេរសារវាយប្រហារមិនដកដៃមកលើរដ្ឋាភិបាលកម្ពុជា។ ក្នុងនោះ លោកសម រង្ស៊ី បានប្រកាសថា លោកនាយករដ្ឋមន្ត្រីហ៊ុន សែន និយាយមិនច្បាស់លាស់ពាកព័ន្ធនឹងការហាមមិនឱ្យសមាជិកសភាអឺរ៉ុប៦រូបចូលមកកម្ពុជាជាមួយរូបលោក។ តាមលោកសម រង្ស៊ី ការនិយាយមិនច្បាស់លាស់នេះ គឺដោយសារមានសម្ពាធពីអន្តរជាតិ។
ក្រៅពីនេះ លោកប្រធានស្តីទីអតីតគណបក្សប្រឆាំងក៏បានយកបញ្ហាចិនមកវាយប្រហារលើរដ្ឋាភិបាលកម្ពុជាផងដែរ។ លោកថា លោកនាយករដ្ឋមន្ត្រីហ៊ុន សែន កំពុងចូលរួមបម្រើនយោបាយឈ្លានពានរបស់ចិន។ បន្ថែមលើនេះ លោកសម រង្ស៊ី ក៏បានអំពាវនាវជារើយៗដល់កងកម្លាំងប្រដាប់អាវុធឱ្យចូលរួមជាមួយក្រុមរបស់លោក ដើម្បីធ្វើការផ្លាស់ប្តូរជាវិជ្ជមាននៅក្នុងប្រទេសកម្ពុជា។
ប៉ុន្តែ អគ្គស្នងការដ្ឋាននគរបាលជាតិបានអំពាវនាវដល់សាធារណៈជនជាតិ និងអន្តរជាតិកុំឱ្យធ្លាក់ក្នុងឧបាយកលញុះញង់របស់ជនអគតិមួយក្តាប់តូចដែលកំពុងបំផុសឲ្យប្រជាពលរដ្ឋបះបោរប្រឆាំងអាជ្ញាធរមានសមត្ថកិច្ច ព្រោះសកម្មភាពនេះ គឺជាទង្វើខុសច្បាប់ ហើយក៏ជាទង្វើដែលបង្កឱ្យមានអសន្តិសុខដល់សង្គម។ អគ្គស្នងការដ្ឋាននគរបាលជាតិ ក៏បានអំពាវនាវឱ្យមានការចូលរួមគាំទ្រដល់ការអនុវត្តភារកិច្ចរបស់កងកម្លាំងអនុវត្តច្បាប់ ដើម្បីរួមចំណែកពង្រឹង និងការពារនីតិរដ្ឋ ព្រមទាំងធានាការរក្សាសន្តិសុខ និងសណ្តាប់ធ្នាប់សង្គមឱ្យបានល្អប្រសើរ។
ជាមួយគ្នានេះ អគ្គស្នងការដ្ឋាននគរបាលជាតិក៏បានព្រមានដល់សាធារណជនទូទៅ ជាពិសេសក្រុមអតីតបក្សប្រឆាំងឱ្យបញ្ឈប់ជាបន្ទាន់នូវរាល់ចេតនារារាំងដល់ការអនុវត្តដីការបស់តុលាការ ព្រោះសកម្មភាពរារាំងការអនុវត្តដីការបស់តុលាការនេះ គឺជាអំពើដែលត្រូវផ្តន្ទាទោសតាមច្បាប់ជាធរមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ