លោកហ៊ុន សែន ប្រាប់បក្សនយោបាយទាំងអស់កុំឲ្យយករាជានិយមធ្វើជារបស់ផ្តាច់មុខ
ពីខេត្តកណ្តាល នៅព្រឹកថ្ងៃពុធនេះ លោកនាយករដ្ឋមន្ត្រីហ៊ុន សែន បានប្រតិកម្មខ្លាំងៗទៅនឹងបក្សនយោបាយមួយចំនួនដែលបានទាញរាជានិយមទៅភ្ជាប់នឹងបក្សរបស់ខ្លួន ដើម្បីឃោសនាស្វែងរកសន្លឹកឆ្នោតពីពលរដ្ឋ។ ជាមួយប្រតិកម្ម លោកនាយករដ្ឋមន្ត្រីក៏បានអំពាវនាវឲ្យបក្សនយោបាយទាំងអស់កុំយករាជានិយមធ្វើជារបស់ផ្ទាល់ខ្លួន ព្រោះថារាជានិយមជារបស់រួមរបស់គណបក្សនយោបាយទាំងអស់។
ចុះផ្សាយនៅថ្ងៃ៖
ប្រមុខគណបក្សប្រជាជនកម្ពុជា លោកនាយករដ្ឋមន្ត្រីហ៊ុន សែន បានថ្លែងថា គណបក្សនយោបាយណាមួយដែលយករាជានិយមធ្វើជារបស់ផ្តាច់មុខសម្រាប់ការឃោសនាបោះឆ្នោត គឺជាការប្រមាថដល់ព្រះចេស្តាអង្គព្រះមហាក្សត្រ។ ជាការប្រមាថ នៅពេលដែលគណបក្សនយោបាយយករាជានិយមទៅឃោសនាដើម្បីស្វែងសំឡេងឆ្នោត តែបែរជាមិនទទួលបានកៅអីឬបានកៅអីតិចតួចក្រោយការបោះឆ្នោតទៅវិញ។ នេះបើតាមការពន្យល់របស់លោកនាយករដ្ឋមន្ដ្រី។
ប្រតិកម្មរបស់លោកនាយករដ្ឋមន្ត្រីហ៊ុន សែនដូច្នេះ ធ្វើឡើងបន្ទាប់ពីគណបក្សនយោបាយមួយចំនួន បានទាញរាជានិយមទៅភ្ជាប់នឹងបក្សខ្លួនសម្រាប់ឃោសនាស្វែងរកសំឡេងឆ្នោត នៅក្នុងនៅក្នុងវេទិការៀបចំឡើងដោយរាជបណ្ឌិត្យសភាកម្ពុជានៅក្នុងសប្តាហ៍នេះ ។ បើទោះបីជាលោកមិនបានបញ្ជាក់ច្បាស់ក៏ដោយ ក៏ប៉ុន្តែគេអាចយល់បានថា លោកទំនងជាសំដៅទៅលើគណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិជាដើម។
សម្រាប់លោកប្រមុខរដ្ឋាភិបាលកម្ពុជា រាជានិយមជារបស់រួមសម្រាប់គណបក្សនយោបាយទាំងអស់ និងសម្រាប់ប្រជាពលរដ្ឋខ្មែរទាំងមូល។ ដូច្នេះហើយ លោកបានអំពាវនាវដល់គណបក្សនយោបាយទាំងអស់ ឲ្យបញ្ឈប់ការយករាជានិយមធ្វើជារបស់ផ្តាច់មុខរបស់ខ្លួន។ លោកនាយករដ្ឋមន្ត្រី សង្កត់ធ្ងន់ថា គណបក្សនយោបាយនិងប្រជាពលរដ្ឋខ្មែរទាំងអស់ មានតួនាទីចូលរួមការពាររបបរាជានិយម និងរាជបល្ល័ង្ក។ ប៉ុន្តែជាមួយគ្នានេះ លោកនាយករដ្ឋមន្ត្រីហ៊ុន សែន បានគូសបញ្ជាក់ថា តាំងដើមមកដល់បច្ចុប្បន្ននេះ គឺមានតែគណបក្សប្រជាជនកម្ពុជារបស់លោកទេដែលបានការពារបានយ៉ាងល្អនូវរបបរាជានិយម។
ក្រៅពីអះអាងពីសមត្ថភាពរបស់គណបក្សប្រជាជននិងរដ្ឋាភិបាលកម្ពុជាដែលអាចការពាររបបរាជានិយមបាន លោកនាយករដ្ឋមន្ត្រីហ៊ុន សែន ក៏បានផ្សារភ្ជាប់បញ្ហាសន្តិភាព និងការអភិវឌ្ឍនៅកម្ពុជាបច្ចុប្បន្នថាបានកើតចេញពីគណបក្សកាន់អំណាច និងរូបលោកផ្ទាល់តែម្តង។ ដូចសព្វមួយដងដែរ លោកនាយករដ្ឋមន្ត្រីក៏បានអំពាវនាវឲ្យប្រជាពលរដ្ឋទាំងអស់បោះឆ្នោតឲ្យគណបក្សប្រជាជនកម្ពុជា ដើម្បីឲ្យលោកអាចបន្តការពារនូវសមិទ្ធផលទាំងអស់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ