លោកហ៊ុន សែន ប្រាប់ឲ្យមន្ត្រីនគរបាលជាតិទាំងអស់ត្រូវតែទៅបោះឆ្នោតឲ្យបានគ្រប់គ្នា
ថ្ងៃទី១៦ ឧសភាខាងមុខនេះ គឺជាគម្រប់ខួបលើកទី៧៣ នៃការបង្កើតកងកម្លាំងនគរបាលជាតិកម្ពុជា។ នៅរសៀលថ្ងៃអាទិត្យនេះ លោកនាយករដ្ឋមន្ត្រីហ៊ុន សែន បានផ្ញើសារជូនពរ និងអបអសាទរដល់កងកម្លាំងនគរបាលជាតិទូទាំងប្រទេសសម្រាប់ថ្ងៃដ៏ពិសេសនេះ។ ប៉ុន្តែឆ្លៀតក្នុងឱកាសនេះដែរ លោកនាយករដ្ឋមន្ត្រីក៏បានរំលឹកប្រាប់ដល់មន្ត្រីនគរបាលជាតិទាំងអស់ត្រូវតែទៅបោះឆ្នោតឲ្យបានគ្រប់ៗគ្នានៅថ្ងៃទី២៩ ខែកក្កដា ខាងមុខ។
ចុះផ្សាយនៅថ្ងៃ៖
តាមរយៈសារជូនពរចុះថ្ងៃទី១២ ឧសភា តែទើបដល់ដៃសារព័ត៌មាននៅថ្ងៃអាទិត្យនេះ លោកនាយករដ្ឋមន្ត្រីហ៊ុន សែន បានសម្តែងនូវការដឹងគុណ និងបានលើកសរសើរពីការខិតខំប្រឹងប្រែងរបស់កងកម្លាំងនគរបាលជាតិក្នុងការសម្រេចបាននូវសមទ្ធិផលជាច្រើនសម្រាប់ជាតិកម្ពុជានាពេលកន្លងមក។ ក្នុងនោះ សមិទ្ធផលធំៗដែលគួរឲ្យកត់សម្គាល់សម្រាប់លោកនាយករដ្ឋមន្ត្រី គឺកងកម្លាំងនគរបាលជាតិបានការពារប្រកបដោយជោគជ័យនូវយុទ្ធនាការបោះឆ្នោតឃុំ សង្កាត់អាណត្តទី៤ និង ការបោះឆ្នោតជ្រើសតាំងសមាជិកព្រឹទ្ធសភានាពេលកន្លងទៅ។ ប៉ុន្តែលោកហ៊ុន សែន ក៏បានអះអាងដែរថា ភារកិច្ចរបស់កងកម្លាំងនគរបាលជាតិចំពោះការបោះឆ្នោតមិនទាន់បញ្ចប់ត្រឹមហ្នឹងទេ ពោល គឺ កងកម្លាំងនគរបាលជាតិទាំងអស់ត្រូវតែការពារសន្តិសុខឲ្យបានល្អប្រសើរសម្រាប់ការបោះឆ្នោតជាតិអាណត្តិទី៦នាពេលខាងមុខនេះថែមទៀត។
ក្រៅតែពីការពារសន្តិសុខ និងសណ្តាប់ធ្នាប់នៃការបោះឆ្នោតនេះ លោកប្រមុខរដ្ឋាភិបាលកម្ពុជា ក៏បានរំលឹកដល់មន្ត្រីនគរបាលជាតិទាំងអស់ត្រូវបំពេញកាតព្វកិច្ចជាពលរដ្ឋដោយទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨នេះឲ្យបានគ្រប់ៗគ្នា។ ជាការកត់សម្គាល់ ការជំរុញឲ្យមន្ត្រីនគរបាលជាតិឲ្យទៅបោះឆ្នោតពីសំណាក់នាយករដ្ឋមន្ត្រីកម្ពុជានេះ ធ្វើឡើងស្របពេលដែលោកសម រង្ស៊ី ដែលជាអតីតប្រធានបក្សប្រឆាំងបានអំពាវនាវកុំឲ្យប្រជាពលរដ្ឋខ្មែរទៅបោះឆ្នោត ប្រសិនបើគ្មានវត្តមានអតីតគណបក្សសង្គ្រោះជាតិចូលរូម។
លោកនាយករដ្ឋមន្ត្រីហ៊ុន សែន បានចាត់ទុកការឃោសនាមិនឲ្យប្រជាពលរដ្ឋទៅបោះឆ្នោតនេះថា ជាការទង្វើរំលោភច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងផ្ទុយពីរដ្ឋធម្មនុញ្ញកម្ពុជា។ ជាមួយគ្នានេះ លោកហ៊ុន សែន ក៏បានជំរុញឲ្យប្រជាពលរដ្ឋខ្មែរគ្រប់រូបទៅបោះឆ្នោតកុំបីខាននៅចុងខែកក្កដាខាងមុខ។ មិនតែប៉ុណ្ណោះ លោកនាយករដ្ឋមន្ត្រីថែមទាំងអំពាវនាវឲ្យប្រជាពលរដ្ឋបោះឆ្នោតឲ្យគណបក្សប្រជាជនកម្ពុជារបស់លោក ដើម្បីឲ្យលោកធ្វើជានាយករដ្ឋមន្ត្រីបន្តទៀត។ តាមលោកនាយករដ្ឋមន្ត្រី ការបោះឆ្នោតឲ្យគណបក្សប្រជាជនកម្ពុជា និយាយឲ្យចំបោះឆ្នោតឲ្យលោកជាប់ជានាយករដ្ឋមន្ត្រីបន្តទៀត គឺដើម្បីធានានូវសុខសន្តិភាព និងការអភិវឌ្ឍសម្រាប់ប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ