គ.ជ.ប៖ការអះអាងពីភាពមិនប្រក្រតីនៃដំណើរការបោះឆ្នោតដោយលោកខឹម វាសនា មិនឆ្លុះបញ្ចាំងពីការពិតទេ
ក្រុមប្រតិកម្មព័ត៌មានរបស់គ.ជ.បនៅថ្ងៃទី៣ សីហា បានចេញមុខទាត់ចោលការចោទប្រកាន់ទាំងឡាយទៅលើដំណើរការបោះឆ្នោតរបស់លោកខឹម វាសនា ប្រមុខបក្សសម្ព័ន្ធ ដើម្បីប្រជាធិបតេយ្យ។ តាមរយៈសេចក្តីបំភ្លឺ ក្រុមប្រតិកម្មព័ត៌មានរបស់គ.ជ.បបានអះអាងថា អ្វីដែលលោកខឹម វាសនាបានលើកឡើងសុទ្ធតែគ្មានភស្តុតាង និងមិនឆ្លុះបញ្ចាំងពីការការពិត។ ប៉ុន្តែលោកខឹម វាសនាបានឆ្លើយតបវិញថា អ្វីដែលលោកលើកឡើងសុទ្ធតែជាការពិត និងមានភស្តុតាងទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៥
កាលពីថ្ងៃទី១ សីហាកន្លងទៅ លោកខឹម វាសនា ប្រមុខគណបក្សសម្ព័ន្ធ ដើម្បីប្រជាធិបតេយ្យ(LDP)បានផ្តល់បទសម្ភាសន៍ផ្តាច់មុខមួយជាមួយវិទ្យុបារាំងអន្តរជាតិ(RFI)។ គឺនៅក្នុងបទសម្ភាសន៍នោះហើយ លោកប្រមុខបក្ស LDP បានធ្វើការរិះគន់ជាច្រើនលើដំណើរការរៀបចំការបោះឆ្នោតនិងរាប់សន្លឹកឆ្នោតរបស់គ.ជ.ប។ ប៉ុន្តែក្នុងចំណោមនោះ មានបញ្ហា៤ចំណុចដែលក្រុមប្រតិកម្មព័ត៌មាននៃគណៈកម្មាធិការជាតិរៀបចំការបោះឆ្នោត(គ.ជ.ប) បានចេញមុខមកបំភ្លឺដល់សាធារណជន។ចំណុចទី១ ឆ្លើយតបនឹងលោកខឹម វាសនាដែលលើកឡើងថា គណៈកម្មការការិយាល័យបោះឆ្នោតរួមគំនិតជាមួយអាជ្ញាធរធ្វើការគាបសង្កត់ភ្នាក់ងារបក្សនយោបាយនោះ ក្រុមប្រតិកម្មព័ត៌មានរបស់គ.ជ.បចាត់ទុកថាជាការចោទប្រកាន់គ្មានភស្តុតាង ព្រោះថាគ.ជ.បមិនបានទទួលពាក្យបណ្តឹងឬព័ត៌មានណាមួយទាក់ទងនឹងករណីនេះឡើយ។
ចំណុចទី២ គឺលោកខឹម វាសនា បានអះអាងថា ភ្នាក់ងារបក្សនយោបាយ ត្រូវបានប្រធានការិយាល័យបោះឆ្នោត បង្ខំឲ្យចុះហត្ថលេខាលើទម្រង់១១០១ និងទម្រង់១១០២ មុនដំណើរការបោះឆ្នោត និងរាប់សន្លឹកឆ្នោត និងមានការចាប់វាយខ្នោះពីសំណាក់អាជ្ញាធរដោយសារតែមិនចុះហត្ថលេខានេះ។ ប៉ុន្តែក្រុមប្រតិកម្មព័ត៌មានរបស់គ.ជ.បបកស្រាយថា ការចុះហត្ថលេខានោះ មិនមែនជាការបង្ខំទេ តែធ្វើឡើងដោយស្ម័គ្រចិត្ត ហើយថាការមិនព្រមចុះហត្ថលេខាក៏មិនអាចមោឃៈភាពទម្រង់ទាំង២នេះបានដែរ។ ចំពោះការវាយខ្នោះវិញ ក្រុមប្រតិកម្មព័ត៌មានរបស់គ.ជ.បថា គឺជាការនិយាយបំផ្លើស។
ចំពោះចំណុចទី៣ដែលលោកខឹម វាសនាលើកឡើងថា ប្រជាពលរដ្ឋចេញទៅបោះឆ្នោតយ៉ាងច្រើនបំផុតត្រឹម៧០% នោះក្រុមប្រតិកម្មព័ត៌មានរបស់គ.ជ.បមិនដឹងថា លោកខឹម វាសនា សំអាងលើអ្វីទេព្រោះលទ្ធផលបឋមរបស់គ.ជ .បបានបង្ហាញហើយថា មាន៨២.៨៩%។ ចំណែកចំណុចទី៤វិញ លោកប្រមុខបក្សLDP អះអាងថា មានការហាមឃាត់មិនឲ្យថតសកម្មភាពរាប់សន្លឹកឆ្នោត។ ចំណុចនេះ ក្រុមប្រតិកម្មព័ត៌មានរបស់គ.ជ.បទទួលស្គាល់ថា មានមន្ត្រីមួយចំនួនតូចអនុវត្តមិនបានល្អចំពោះការថតនេះ ប៉ុន្តែក្រោយពីការអន្តរគមន៍ពីថ្នាក់លើ សកម្មភាពថតក៏ត្រូវបានអនុញ្ញាតឲ្យធ្វើជាធម្មតាវិញ។
ប្រតិកម្មទៅនឹងការបកស្រាយទាំងអម្បាលមាណរបស់ក្រុមប្រតិកម្មព័ត៌មានរបស់គ.ជ.បនេះ លោកខឹម វាសនាបានព្រលយពាក្យថា នៅស្រុកខ្មែរ អ្នកខ្លាំងគឺឈ្នះរហូត ។ តែទោះជាយ៉ាងណា លោកនៅតែរក្សាជំហររបស់លោកដដែល។ លោកខឹម វាសនាបានអះអាងប្រាប់វិទ្យុបារាំងអន្តរជាតិថា អ្វីដែលលោកបានលើកឡើងគឺសុទ្ធតែជាការពិត ហើយលោកមានភស្តុតាងទាំងអស់។ បើតាមលោកខឹម វាសនា គណបក្សLDPរបស់លោកក៏បានដាក់ពាក្យបណ្តឹងពាក់ព័ន្ធនឹងបញ្ហានេះទៅកាន់គ.ជ.បរួចរាល់ហើយដែរ។ ប៉ុន្តែក្រុមប្រតិកម្មព័ត៌មានរបស់គ.ជ.បអះអាងថា បណ្តឹងភាគច្រើនលើសលប់របស់លោកខឹម វាសនា គឺប្តឹងពីគំនូសសញ្ហាគាំទ្របក្សនយោបាយនៅលើសន្លឹកឆ្នោតប៉ុណ្ណោះ។ ដូច្នេះហើយពួកគេចង្អុលបង្ហាញថា ការលើកឡើងរបស់លោកខឹម វាសនាមិនបានឆ្លុះបញ្ចាំងពីការពិតនៃបណ្តឹងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ