នាយកវិទ្យុអាស៊ីសេរីស្នើឱ្យមានការទម្លាក់ចោលបទចោទលើអតីតអ្នកសារព័ត៌មានរបស់ខ្លួនពីរនាក់
លោក Mat Pennington នាយកគ្រប់គ្រងប្រចាំតំបន់អាស៊ីអាគ្នេយ៍នៃវិទ្យុអាស៊ីសេរី កាលពីថ្ងៃទី២២ វិច្ឆិកា បានជួបដោយផ្ទាល់ជាមួយលោក ខៀវ កាញារីទ្ធ រដ្ឋមន្ត្រីក្រសួងព័ត៌មានកម្ពុជា ដើម្បីស្នើសុំបើកការិយាល័យផ្សាយឡើងវិញនៅក្នុងប្រទេសកម្ពុជា។ ជាមួយនឹងការស្នើសុំនេះ លោក Mat Pennington ក៏បានពិភាក្សាជាមួយលោក ខៀវ កាញារីទ្ធ ដើម្បីស្វែងរកការទម្លាក់បទចោទប្រកាន់លើអតីតអ្នកកាសែតវិទ្យុអាស៊ីសេរីពីរនាក់ផងដែរ។
ចុះផ្សាយនៅថ្ងៃ៖
ស្តាប់ - ០២:១៥
ស្ថានទូតអាមេរិកប្រចាំនៅកម្ពុជា បានសរសេរនៅលើទំព័រហ្វេសប៊ុករបស់ខ្លួនថា លោក Mat Pennington បានតស៊ូមតិជាមួយលោករដ្ឋមន្ត្រីក្រសួងព័ត៌មានកម្ពុជា ដើម្បីឱ្យមានការទម្លាក់បទចោទប្រឆាំងអតីតអ្នកយកព័ត៌មានវិទ្យុអាស៊ីសេរីពីររូប គឺលោក អ៊ួន ឈិន និង លោក យាង សុធារិន្ទ។ អ្នកទាំងពីរនាក់នេះ ត្រូវបានតុលាការកម្ពុជាចោទប្រកាន់ពីបទប្រគល់ឲ្យរដ្ឋបរទេសនូវព័ត៌មានជាអាទិ៍ដែលអាចធ្វើឱ្យអន្តរាយដល់ការការពារជាតិ និង បទផលិត និងកាន់កាប់រូបភាពអាសអាភាស។ អ្នកទាំងពីរនេះក៏ទើបត្រូវបានតុលាការប្រកាសបើកការស៊ើបអង្កេតឡើងវិញ ដោយមិនបានកំណត់ពេលវេលាច្បាស់លាស់ផងដែរ។
នាយកគ្រប់គ្រងប្រចាំតំបន់អាស៊ីអាគ្នេយ៍នៃវិទ្យុអាស៊ីសេរី លោកMat Pennington បានអះអាងប្រាប់លោក ខៀវ កាញារីទ្ធថា ការទម្លាក់បទចោទប្រឆាំងអតីតអ្នកយកព័ត៌មានវិទ្យុអាស៊ីសេរីពីររូបនេះ គឺជាប្រការដែលអាចជួយដល់អ្នកសារព័ត៌មានទាំងឡាយ រួមទាំងអ្នកយកព័ត៌មានវិទ្យុអាស៊ីសេរីនាថ្ងៃអនាគតផងឱ្យមានទំនុកចិត្តថា ពួកគេត្រូវធ្វើការងាររបស់គេដោយមានសុវត្ថិភាព និងស្ថិតក្នុងបរិយាកាសអំណោយផលដល់សេរីភាពសារព័ត៌មាន និងនីតិរដ្ឋ ។
ក្រៅពីការលើកឡើងពីសំណុំរឿងអតីតអ្នកកាសែតវិទ្យុអាស៊ីសេរីទាំងពីរនេះ លោកនាយកគ្រប់គ្រងប្រចាំតំបន់អាស៊ីអាគ្នេយ៍នៃវិទ្យុអាស៊ីសេរីក៏បានស្នើសុំរដ្ឋមន្ត្រីក្រសួងព័ត៌មានកម្ពុជាអនុញ្ញាតឱ្យវិទ្យុអាស៊ីសេរីបើកការិយាល័យផ្សាយរបស់ខ្លួនឡើងវិញនៅក្នុងប្រទេសកម្ពុជាផងដែរ។ លោក ខៀវ កាញារីទ្ធ មិនយល់ទាស់អ្វីទេចំពោះសំណើនេះ ប៉ុន្តែបានតម្រូវឱ្យវិទ្យុអាស៊ីសេរីត្រូវធ្វើការកែតម្រូវនូវពាក្យពេចន៍មួយចំនួនក្នុងការផ្សាយ និង ត្រូវបំពេញបែបបទទៅតាមផ្លូវច្បាប់ឱ្យបានត្រឹមត្រូវ។ ក្រៅពីវិទ្យុអាស៊ីសេរី ក្រសួងព័ត៌មានកម្ពុជាក៏បានបើកភ្លើងខៀវឱ្យវិទ្យុសំឡេងសហរដ្ឋអាមេរិកVOA ដំណើរការផ្សាយបានឡើងវិញផងដែរ។
សូមបញ្ជាក់ថា វិទ្យុអាស៊ីសេរី និង វិទ្យុសំឡេងសហរដ្ឋអាមេរិកVOA បានបង្ខំចិត្តបិទការិយាល័យផ្សាយរបស់ខ្លួននៅក្នុងប្រទេសកម្ពុជាដោយខ្លួនឯងកាលពីចុងឆ្នាំ២០១៧កន្លងទៅ។ ការបង្ខំចិត្តបិទទ្វារនេះ គឺដោយសារតែវិទ្យុទាំងពីរ ត្រូវបានអាជ្ញាធរកម្ពុជាអះអាងថា ធ្វើសកម្មភាពដោយគ្មានអាជ្ញាប័ណ្ណ និងមិនបានមកចុះបញ្ជីពន្ធដារតាមច្បាប់របស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ