លោកខៀវ សុភ័គ៖ការដកឈ្មោះលោកអាឡិចចេញពីបញ្ជីខ្មៅរបស់ក្រសួងមហាផ្ទៃ មិនអាចធ្វើទៅរួចទេ
បន្ទាប់ពីតុលាការខេត្តកោះកុងបានទម្លាក់ចោលការចោទប្រកាន់នៅក្នុងសប្ដាហ៍នេះ លោកអាឡិច ហ្គូនសាឡេស ដាវិដសុន សកម្មជនការពារបរិស្ថានដ៏ល្បីនៅតំបន់អារ៉ែង បានស្នើសុំទៅកាន់លោកស ខេង រដ្ឋមន្ត្រីក្រសួងមហាផ្ទៃកម្ពុជាឱ្យដករូបលោកចេញពីបញ្ជីខ្មៅ ដើម្បីឱ្យលោកអាចត្រឡប់មកកាន់ប្រទេសកម្ពុជា។ ប៉ុន្តែ លោកខៀវ សុភ័គ អ្នកនាំពាក្យក្រសួងមហាផ្ទៃបានអះអាងថា មិនអាចទៅរួចនោះទេ ព្រោះគ្មានច្បាប់ណាដែលអាចដកឈ្មោះលោកអាឡិចចេញពីបញ្ជីខ្មៅរបស់ក្រសួងមហាផ្ទៃបានឡើយ។
ចុះផ្សាយនៅថ្ងៃ៖
ស្តាប់ - ០១:៥៥
ថ្លែងប្រាប់វិទ្យុបារាំងអន្តរជាតិនៅព្រឹកថ្ងៃអាទិត្យនេះ លោកខៀវ សុភ័គ អ្នកនាំពាក្យក្រសួងមហាផ្ទៃកម្ពុជាបានគូសបញ្ជាក់ថា ការសម្រេចរបស់ក្រសួងមហាផ្ទៃក្នុងការដាក់ជនបរទេសណាមួយទៅក្នុងបញ្ជីខ្មៅ គឺប្រៀបដូចជាការសម្រេចរបស់តុលាការកំពូលដូច្នេះដែរ គឺស្មើនឹងការបិទផ្លូវតវ៉ា។ ក្នុងន័យនេះ លោកពន្យល់ថា នៅក្នុងប្រទេសកម្ពុជា គ្មានច្បាប់ ឬ គ្មាននីតិវិធីណាមួយដែលអាចយកទៅអនុវត្ត ដើម្បីលុបឈ្មោះជនបរទេសណាចេញពីបញ្ជីខ្មៅរបស់ក្រសួងមហាផ្ទៃបាននោះទេ។
ការបញ្ជាក់ច្បាស់ៗរបស់អ្នកនាំពាក្យក្រសួងមហាផ្ទៃនាពេលនេះ គឺជាការឆ្លើយតបទៅនឹងសំណើតាមហ្វេសប៊ុករបស់លោកអាឡិច។ លោកអាឡិច ដែលជាជនជាតិអេស្ប៉ាញតែមកជួយការពារព្រៃឈើកម្ពុជា បានស្នើសុំទៅលោកស ខេង រដ្ឋមន្ត្រីក្រសួងមហាផ្ទៃឱ្យដករូបលោកចេញពីបញ្ជីខ្មៅ ដើម្បីអនុញ្ញាតឱ្យរូបលោកអាចមកកាន់ប្រទេសកម្ពុជាវិញបាន។ ការស្នើសុំរបស់លោកអាឡិចនេះ ធ្វើឡើងភ្លាមៗបន្ទាប់ពីរូបលោកត្រូវបាន តុលាការខេត្តកោះកុងបានសម្រេចទម្លាក់ចោលការចោទប្រកាន់ពីបទផ្តើមគំនិតគំរាមកំហែងធ្វើឱ្យខូចខាតដោយភ្ជាប់នូវបញ្ជាអ្វីមួយ បន្ទាប់ពីរូបលោក និងសហការីបានតវ៉ាប្រឆាំងនឹងការបូបខ្សាច់នៅខេត្តកោះកុងកាលពីអំឡុងខែកក្កដា និងសីហា ឆ្នាំ២០១៥។
សម្រាប់លោកអាឡិច កាសម្រេចទម្លាក់ចោលការចោទប្រកាន់នេះ គឺជារឿងដ៏រីករាយមួយ។ ប៉ុន្តែលោកនៅតែមានការសោកស្តាយជាខ្លាំងដែលលោកនៅតែមិនអាចវិលត្រលប់មកកាន់ប្រទេសកម្ពុជាវិញបាន ព្រោះរូបលោកត្រូវបានក្រសួងមហាផ្ទៃចុះនៅក្នុងបញ្ជីខ្មៅ និង បានបណ្តេញចេញពីប្រទេសកម្ពុជាកាលពីឆ្នាំ២០១៥កន្លងទៅ។ បើទោះបីជាយ៉ាងណាក៏ដោយ លោកខៀវ សុភ័គ បានអះអាងថា ការមិនអាចលុបឈ្មោះចេញពីបញ្ជីខ្មៅនេះ មិនមែនមានតែលោកអាឡិចតែម្នាក់នោះទេ ពោល គឺធ្វើឡើងលើគ្រប់ជនបរទេសទាំងអស់តែម្តងមិនថាជនជាតិវៀតណាម ឬ ជនជាតិចិននោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ