កំពូលកីឡាករជប៉ុនHONDAស្ម័គ្រចិត្តធ្វើជាគ្រូបង្វឹកថ្មីក្រុមជម្រើសជាតិកម្ពុជាដោយមិនយកប្រាក់ខែ
សហព័ន្ធកីឡាបាល់ទាត់កម្ពុជាបានសម្រេចតែងតាំងកីឡាករបាល់ទាត់លំដាប់ពិភពលោករបស់ជប៉ុន គឺលោក Keisuke HONDA ធ្វើជាគ្រូបង្វឹកថ្មីរបស់ក្រុមបាល់ទាត់ជម្រើសជាតិកម្ពុជា។ Keisuke HONDA បានបង្ហាញខ្លួនជាផ្លូវការនៅក្នុងសន្និសិទកាសែតដែលរៀបចំឡើងដោយសហព័ន្ធកីឡាបាល់ទាត់កម្ពុជានៅព្រឹកមិញនេះ។ សហព័ន្ធកីឡាបាល់ទាត់កម្ពុជា បានបញ្ជាក់ថា កីឡាករ HONDA មកធ្វើជាគ្រូបង្វឹកថ្មីក្រុមជម្រើសជាតិកម្ពុជានេះដោយស្ម័គ្រចិត្ត មិនយកប្រាក់ខែនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ប្រធានសហព័ន្ធកីឡាបាល់ទាត់កម្ពុជា លោកសៅ សុខា បានបង្ហាញការរីករាយយ៉ាងខ្លាំងចំពោះវត្តមានកីឡាករKeisuke HONDA ដែលបានសុខចិត្តមកបង្ហាត់ដល់ក្រុមបាល់ទាត់ជម្រើសជាតិកម្ពុជាដោយមិនយកប្រាក់កម្រៃបែបនេះ។ តែទោះជាយ៉ាងនេះក្តី លោកសៅ សុខា ក៏អះអាងដែរថា សហព័ន្ធកីឡាបាល់ទាត់កម្ពុជានឹងធានារ៉ាប់រងរាល់ការចំណាយលើការធ្វើដំណើរ ស្នាក់នៅ និងការធ្វើកិច្ចការនានានៅក្នុងប្រទេសកម្ពុជារបស់គ្រូបង្វឹកថ្មីសញ្ជាតិជប៉ុនរូបនេះ។ សម្រាប់លោកសៅ សុខា វត្តមានរបស់ Keisuke HONDAនៅពេលនេះ វានឹងចូលរួមចំណែកគាំទ្រ និងជួយក្នុងការអភិវឌ្ឍវិស័យបាល់ទាត់នៅក្នុងប្រទេសកម្ពុជា។
ចំណែកHonda វិញតាមរយៈអ្នកបកប្រែបានលើកឡើងថា ក្តីបំណងចង់ជួយដល់បាល់ទាត់កម្ពុជារបស់គេនៅពេលនេះបានក្លាយជាការពិតហើយ។ នៅពីមុខអ្នកកាសែតជាច្រើន លោកHonda បានបញ្ជាក់ថា ចំពោះវិស័យបាល់ទាត់កម្ពុជា លោកមានបេសកកម្មពីរនៅចំពោះមុខ គឺទីមួយ លោកនឹងបង្កើតរបៀបលេងថ្មីដែលជារបស់កម្ពុជា ហើយវានឹងចាប់ផ្តើមចេញក្រុមជម្រើសជាតិ និងទៅកាន់ក្លិបបាល់ទាត់នានាក្នុងស្រុក។ រីឯបេសកម្មទីពីរ គឺលោកនឹងជួយផ្សព្វផ្សាយនូវអ្វីដែលល្អៗដូចជាវប្បធម៌ និងសម្បត្តិបេតិកភណ្ឌរបស់កម្ពុជាទៅកាន់ពិភពលោក។
មានវ័យ៣២ឆ្នាំ Keisuke HONDA កំពុងតែលេងឲ្យក្លិប Melbourne Victory នៅក្នុងប្រទេសអូស្ត្រាលី។ តាំងពីឆ្នាំ២០០៤មកដល់ឆ្នាំ២០១៨នេះ HONDA ធ្លាប់លេងឲ្យក្លិបនៅក្នុងប្រទេសជប៉ុន ក្លិបនៅហូឡង់ រុស្ស៊ី អ៊ីតាលី និងចុងក្រោយនៅម៉ិកស៊ិក។ សម្រាប់ប្រទេសកម្ពុជាវិញ កីឡាករបាល់ទាត់រូបនេះ បានជួយជ្រោមជ្រែងបង្កើតក្លិបបាល់ទាត់ Soltilo Angkor FC ដែលមានមូលដ្ឋាននៅក្នុងខេត្តសៀមរាប និងកំពុងលេងនៅលីគកំពូលកម្ពុជា។ Keisuke HONDA ក៏ធ្លាប់ចូលរួមប្រយុទ្ធលើវាលស្មៅកីឡដ្ឋានជាតិអូឡាំពិកកម្ពុជាតទល់នឹងក្រុមជម្រើសជាតិកម្ពុជាម្តងដែរកាលពីឆ្នាំ២០១៥កន្លងទៅ។
យ៉ាងណាក៏ដោយ សម្រាប់ការមកដឹកនាំក្រុមជម្រើសជាតិកម្ពុជាជំនួសគ្រូបង្វឹកចាស់សញ្ជាតិប្រេស៊ីលនេះ Keisuke HONDA បានអះអាងថា រូបគេនឹងមិនបានចុះផ្ទាល់ជាមួយក្រុមកីឡាករបានច្រើនទេ ដោយសារតែមានការរវល់ច្រើន។ ប៉ុន្តែរូបគេនឹងដឹកនាំកិច្ចប្រជុំមួយសប្តាហ៍ម្តងតាមរយៈវីដេអូ Conference ជាមួយក្រុមការងារនៅកម្ពុជា។ ភារកិច្ចបន្ទាប់ក្រោយកាន់តំណែងជាគ្រូធំក្រុមជម្រើសជាតិកម្ពុជានេះ Keisuke HONDA នឹងត្រូវដឹកនាំក្រុមកម្ពុជាចូលរួមប្រកួតក្នុងព្រឹត្តិការណ៍ AFF Suzuki Cup នៅខែវិច្ឆិកាខាងមុខនេះ នៅក្នុងប្រទេសឡាវ។ ក្រុមជម្រើសជាតិកម្ពុជាស្ថិតក្នុងពូល A ដោយនឹងត្រូវតទល់ជាមួយក្រុមម្ចាស់ផ្ទះឡាវ វៀតណាម ម៉ាឡេស៊ី និង មីយ៉ាន់ម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ