ថ្នាក់ដឹកនាំអតីតបក្សប្រឆាំងចេញមកបញ្ជាក់ពីជំហរមិនទៅចូលរួមជាមួយបក្សនយោបាយផ្សេង
ថ្នាក់ដឹកនាំអតីតគណបក្សសង្គ្រោះជាតិនៅថ្ងៃពុធម្សិលមិញនេះ បានចេញមកបញ្ជាក់ពីជំហររបស់ខ្លួនដោយអះអាងថា នៅតែបន្តរួបរួមគ្នាដដែល។ ការអះអាងនេះ ធ្វើឡើងក្រោយពីពេលថ្មីៗនេះ គណបក្សនយោបាយថ្មីៗមួយចំនួនទើបត្រូវបានបង្កើតឡើង ជាពិសេសគឺគណបក្ស«ឆន្ទៈខ្មែរ» របស់កូនប្រុសលោកគង់ គាំ។ យ៉ាងណាក៏ដោយ ថ្នាក់ដឹកនាំអតីតបក្សប្រឆាំងបានគូសបញ្ជាក់ថា ពួកខ្លួនមិនមានការជាប់ពាក់ព័ន្ធជាមួយបក្សទាំងអស់នោះឡើយ។
ចុះផ្សាយនៅថ្ងៃ៖
ស្តាប់ - ០២:០៩
តាមរយៈសេចក្តីថ្លែងការណ៍ដែលនៅរក្សាទម្រង់បែបបទគណបក្សសង្គ្រោះជាតិ ថ្នាក់ដឹកនាំអតីតគណបក្សប្រឆាំងកម្ពុជាបានអះអាងថា ពួកខ្លួននៅតែរក្សាស្មារតីសាមគ្គីភាព រួបរួមគ្នាយ៉ាងរឹងមាំជុំវិញអតីតបក្សសង្គ្រោះជាតិ ដោយមិនមានការជាប់ពាក់ព័ន្ធជាមួយគណបក្សដទៃឬបុគ្គលដែលទៅបង្កើតគណបក្សនយោបាយផ្សេងឡើយ។ ជាមួយគ្នានេះដែរ ថ្នាក់ដឹកនាំអតីតប្រឆាំងក៏បានអំពាវនាវដល់សមាជិក និងសកម្មជនទាំងអស់ឲ្យពង្រឹងស្មារតី និងបន្តការតស៊ូដោយអហិង្សាជាមួយអតីតគណបក្សសង្គ្រោះជាតិ ដើម្បីឲ្យមានការផ្លាស់ប្តូរជាវិជ្ជមានតាមបែបបទលទ្ធិប្រជាធិបតេយ្យ។
ជាការកត់សម្គាល់ ការចេញមកបញ្ជាក់ពីជំហររបស់ថ្នាក់ដឹកនាំអតីតគណបក្សសង្គ្រោះជាតិនាពេលនេះ ធ្វើឡើងក្រោយពីមានគណបក្សថ្មីៗមួយចំនួនទើបត្រូវបានបង្កើតជាបន្តបន្ទាប់ដើម្បីចូលរួមការបោះឆ្នោតសកលនាខែកក្កដាឆ្នាំ២០១៨ខាងមុខ។ ក្នុងនោះ គណបក្សឆន្ទៈខ្មែររបស់លោកគង់ មុនីកា ដែលជាកូនប្រុសរបស់លោកគង់ គាំ ឧត្តមទីប្រឹក្សាអតីតគណបក្សសង្គ្រោះជាតិ ត្រូវបានមហាជនចាប់អារម្មណ៍ជាងគេ។ ចាប់អាម្មរណ៍គឺនៅត្រង់ថា គណបក្សនេះមានសហស្ថាបនិកជាសមាជិកអតីតគណបក្សសង្គ្រោះជាតិ។ អ្វីដែលគួរឲ្យចាប់អាម្មរណ៍ជាងនេះទៅទៀតនោះ គឺលោកគង់ មុនីកា បានអះអាងថា ការបង្កើតបក្សថ្មីនេះ គឺដោយសារតែលោកយល់ឃើញថា អតីតគណបក្សសង្គ្រោះជាតិនឹងមិនអាចរស់ឡើងវិញ ហើយមកចូលរួមការបោះឆ្នោតនាពេលខាងមុខនេះទាន់ឡើយ។
ក៏ប៉ុន្តែថ្នាក់ដឹកនាំអតីតបក្សប្រឆាំងបានបញ្ជាក់ពីជំហរថា អតីតគណបក្សសង្គ្រោះជាតិគោរពតាមឆន្ទៈរបស់ប្រជាពលរដ្ឋម្ចាស់ឆ្នោត ដោយទទូចទាមទារឲ្យមានដំណោះស្រាយនយោបាយ និងត្រៀមខ្លួនជានិច្ចដើម្បីចូលរួមការបោះឆ្នោតនាពេលខាងមុខនេះ។ ចំណែកលោកសម រង្ស៊ី ដែលធ្លាប់ជាប្រធានអតីតគណបក្សសង្គ្រោះជាតិ តែងតែលើកឡើងជារើយៗថា អតីតគណបក្សសង្គ្រោះជាតិនឹងមានវត្តមានចូលរួមការបោះឆ្នោតនាពេលខាងមុខនេះ ក្រោមសម្ពាធពីសហគមន៍អន្តរជាតិទៅលើរដ្ឋាភិបាលក្រុងភ្នំពេញ។ តែយ៉ាងណាក៏ដោយ លោកនាយករដ្ឋមន្ត្រីហ៊ុន សែន ប្រមុខគណបក្សកាន់អំណាចធ្លាប់គូសបញ្ជាក់ម្តងហើយម្តងទៀតថា អតីតគណបក្សសង្គ្រោះជាតិមិនអាចរស់នៅឡើងវិញនោះទេ ហើយទាំងប្រកាសកាត់ផ្តាច់ចោលក្តីរំពឹងរបស់លោកសម រង្ស៊ីទៀតថា ការបោះឆ្នោតនាពេលខាងមុខនេះ នឹងគ្មានវត្តមានរបស់អតីតគណបក្សសង្គ្រោះជាតិនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ