អ្នកវិភាគ៖ ការប្រកាសចូលស្រុករបស់លោកសម រង្ស៊ី គ្រាន់តែជាសង្គ្រាមចិត្តសាស្ត្រ
ក្តីសង្ស័យពីភាពមិនច្បាស់លាស់នៃមាតុភូមិនិវត្តន៍របស់លោកសម រង្ស៊ី ទំនងជាអាចបិទបញ្ចប់បាននៅពេលនេះហើយ។ កាលពីល្ងាចមិញនេះ លោកស្រី មួរ សុខហូរ បានចេញមុខប្រកាសជាផ្លូវការតាមរយៈការផ្សាយផ្ទាល់នៅលើទំព័រហ្វេសប៊ុកថា លោកសម រង្ស៊ី និង ថ្នាក់ដឹកនាំអតីតគណបក្សសង្គ្រោះជាតិផ្សេងទៀតនឹងវិលចូលប្រទេសកម្ពុជាវិញនៅក្នុងខែសីហា ឬមិនឱ្យយូរដល់ខែកញ្ញាឡើយ។ ប៉ុន្តែការប្រកាសនេះ ត្រូវបានអ្នកវិភាគ និង អ្នកជំនាញសិទ្ធិមនុស្សចាត់ទុកថា ជាសង្គ្រាមចិត្តសាស្ត្រ ចង់បានការតបតពីគណបក្សកាន់អំណាចតែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
លោកបណ្ឌិត មាស នី អ្នកសិក្សាស្រាវជ្រាវ ដើម្បីការអភិវឌ្ឍសង្គម បានលើកឡើងថា ការប្រកាសវិលចូលស្រុកវិញរបស់លោកសម រង្ស៊ី និងថ្នាក់ដឹកនាំអតីតគណបក្សសង្គ្រោះជាតិ មិនមែនជារឿងថ្មីនោះទេ តែវាគឺជាការវិវត្តនៃសង្គ្រាមចិត្តសាស្ត្រ។ សង្គ្រាមចិត្តសាស្ត្រ ដែលអតីតគណបក្សសង្គ្រោះជាតិបានរៀបចំឡើង ដើម្បីស្វែងរកប្រតិកម្មតបតពីគណបក្សកាន់អំណាច។
សម្រាប់លោកបណ្ឌិត មាស នី ប្រតិកម្មដែលអតីតបក្សប្រឆាំងរំពឹងទុកនោះ គឺគណបក្សកាន់អំណាចនឹងធ្វើសកម្មភាពគាបសង្កត់ទៅលើសកម្មជនអតីតប្រឆាំងនៅក្នុងប្រទេសកម្ពុជា ដែលជាឆ្លើយតបទៅនឹងដំណឹងមាតុភូមិនិវត្តន៍នេះ។ ត្រង់ចំណុចនេះ លោកបណ្ឌិតមាស នី សង្កត់ធ្ងន់ថា នៅពេលដែលគណបក្សកាន់អំណាចធ្វើការគាបបង្កត់លើសកម្មជនអតីតបក្សប្រឆាំងនោះ វានឹងជះឥទ្ធិពលបន្ថែមទៀតទៅលើដំណើរការដកប្រព័ន្ធអនុគ្រោះពន្ធ EBA របស់អឺរ៉ុប និង GSP របស់អាមេរិកដែលជាការរុញផលដល់អតីតបក្សប្រឆាំង។
ចំណែក លោកសួន ប៊ុនស័ក្តិ អ្នកឯកទេសខាងសិទ្ធិមនុស្សកម្ពុជាវិញ លោកក៏យល់ឃើញដូចលោកបណ្ឌិតមាស នីដែរ ដែលថា នេះគឺជាសង្គ្រាមចិត្តសាស្ត្ររបស់អតីតបក្សប្រឆាំង។ ប៉ុន្តែជាមួយគ្នានេះ លោកក៏បានបន្ថែមថា ការប្រកាសម្តងជាពីរដងរបស់ថ្នាក់ដឹកនាំអតីតគណបក្សសង្គ្រោះជាតិនេះ គឺដើម្បីស្វែងរកផ្លូវចរចាមួយជាមួយគណបក្សប្រជាជនកម្ពុជារបស់លោកនាយករដ្ឋមន្ត្រីហ៊ុន សែន ដើម្បីត្រួសត្រាយផ្លូវចូលមកប្រទេសកម្ពុជាវិញដោយស្របច្បាប់។
ប៉ុន្តែលោកសុខ ឥសាន អ្នកនាំពាក្យគណបក្សប្រជាជនកម្ពុជាមិនបានយល់ឃើញដូច្នេះនោះទេ។ ផ្ទុយទៅវិញ លោកគិតថា នេះគឺជាគ្រាន់តែជាល្បិចកល ដើម្បីបន្តប្រមូលថវិកាបន្ថែមពីអ្នកគាំទ្រអតីតបក្សសង្គ្រោះជាតិនៅក្រៅប្រទេសប៉ុណ្ណោះ ព្រោះការប្រកាសចូលស្រុកវិញនេះមិនដែលជាការពិតម្តងណាឡើយ។ បន្ថែមលើនេះ លោកសុខ ឥសាន ក៏បានសង្កត់ធ្ងន់ជាថ្មីថា គ្មានឡើយការចរចានយោបាយជាមួយលោកសម រង្ស៊ី ព្រោះលោកហ៊ុន សែន លែងចាប់អារម្មណ៍ និង លែងឆ្លងឆ្លើយជាមួយលោកសម រង្ស៊ីទៀតហើយ។
បើទោះជាយ៉ាងណាក៏ដោយ ម្តងនេះ លោកស្រីមួរ សុខហួរ ដែលជាអនុប្រធានអតីតគណបក្សសង្គ្រោះជាតិបានគូសបញ្ជាក់ម្តងជាពីរដងថា ការចូលស្រុករបស់ថ្នាក់ដឹកនាំអតីតបក្សប្រឆាំងនៅក្នុងខែសីហា ឬមិនហួសដល់ខែកញ្ញាខាងមុខនេះ គឺជាដំណឹងពិតប្រាកដ ដែលជាការសម្រេចរបស់គណៈកម្មការរៀបចំមាតុភូមិនិវត្ត៍របស់លោកសម រង្ស៊ីមកកាន់ប្រទេសកម្ពុជា។ លោកស្រីអះអាងថា នៅខែសីហាខាងមុខនេះ គឺដល់ពេលវេលាដែលថ្នាក់ដឹកនាំអតីតបក្សប្រឆាំងត្រូវវិលចូលស្រុកតាមការសន្យាហើយ ព្រោះមិនអាចបន្តការតស៊ូមតិនៅក្រៅប្រទេសបានទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ