តុលាការចោទប្រកាន់ជនជាតិចិន៣នាក់ពីបទលាងលុយក្រោយនាំលុយជាង៣លានដុលា្លរមកកម្ពុជា
តុលាការសាលាដំបូងរាជធានីភ្នំពេញនៅព្រឹកថ្ងៃអាទិត្យនេះ បានសម្រេចចោទប្រកាន់ជនជាតិចិន៣នាក់ពីបទលាងលុយ បន្ទាប់ពីពួកគេបាននាំយកលុយដែលគ្មានប្រភពច្បាស់លាស់ជាង៣លានដុល្លារអាមេរិកមកកាន់ប្រទេសកម្ពុជា។ អង្គការស៊ីវិលនៅកម្ពុជាបានសម្តែងនូវការគាំទ្រចំពោះចំណាត់ការនេះ។ ប៉ុន្តែជាមួយគ្នានេះ ក៏ស្នើឱ្យសមត្ថកិច្ចត្រូវតែមានការប្រុងប្រយ័ត្នខ្ពស់បន្ថែមទៀតផងដែរ។
ចុះផ្សាយនៅថ្ងៃ៖
ស្តាប់ - ០២:១១
បន្ទាប់ពីបានសាកសួររួចរាល់ ព្រះរាជអាជ្ញារងអមសាលាដំបូងរាជធានីភ្នំពេញបានសម្រេចចោទប្រកាន់ជាផ្លូវការលើជនជាតិចិន៣នាក់ពីបទលាងសម្អាតប្រាក់ និងប្រឆាំងហិរញ្ញទានតាមមាត្រា៣ថ្មី និងមាត្រា២៩ថ្មី នៃច្បាប់ស្តីពីការប្រឆាំងការសម្អាតប្រាក់និងហិរញ្ញប្បទានភេវរកម្ម។ ការចោទប្រកាន់នេះ ធ្វើឡើងបន្ទាប់ពីជនជាតិទាំង៣នាក់ បាននាំយកលុយគ្មានប្រភពច្បាស់លាស់ចំនួន៣លាន៥២ម៉ឺនដុល្លារអាមេរិក(៣,៥២០,០០០ដុល្លារ)ពីទីក្រុងហុងកុងមកក្នុងប្រទេសកម្ពុជា ហើយត្រូវបានអាជ្ញាធរកម្ពុជាចាប់ខ្លួនបានកាលពីថ្ងៃទី២៣ ខែមេសាកន្លងទៅ។ បើតាមរបាយការណ៍របស់ប៉ូលីស ជនជាតិចិនទាំងបីនាក់នេះ សុទ្ធតែមិនមានមុខរបរពិតប្រាកដនោះទេ។
ចំណាត់ការរបស់អាជ្ញាធរកម្ពុជានេះ ត្រូវបានអង្គការសង្គមស៊ីវិលនៅកម្ពុជាបានប្រកាសគាំទ្រ។ ជាមួយការគាំទ្រ ក៏បានសម្តែងនូវការព្រួយបារម្ភផងដែរ។ លោកព្រាប កុល នាយកប្រតិបត្តិអង្គការតម្លាភាពកម្ពុជាបានអះអាងថា ករណីនេះ គឺជាសញ្ញាដ៏គួរឱ្យព្រួយបារម្ភបំផុតមួយសម្រាប់ប្រទេសកម្ពុជាទាក់ទងទៅនឹងវិសាលភាព និងលទ្ធភាពនៃការលាងលុយកក្វក់ ឬសម្អាតប្រាក់។ បើតាមលោកព្រាប កុល ប្រសិនបើជនល្មើសហ៊ានយកលុយមករាប់លានដុល្លាតាមយន្តហោះដែលមានការត្រួតពិនិត្យតឹងរ៉ឹង នោះអាជ្ញាធរកម្ពុជាត្រូវតែប្រុងប្រយ័ត្ន និងយកចិត្តទុកដាក់ខ្ពស់បំផុតនៅតាមច្រកព្រំដែនផ្លូវគោក និងផ្លូវទឹក ឬតាមកំពង់ផែ។ សម្រាប់នាយកប្រតិបត្តិអង្គការតម្លាភាពកម្ពុជា ការសម្អាតសាច់ប្រាក់អាចមានការពាក់ព័ន្ធទៅនឹងបទល្មើសឧក្រិដ្ឋផ្សេងៗទៀត និងអាចគម្រាមកំហែងដល់សន្តិសុខជាតិ និងសន្តិសុខក្នុងតំបន់ផងដែរ។
សូមបញ្ជាក់ថា ការចាប់ខ្លួនជនជាតិចិនពាក់ព័ន្ធករណីលាងសម្អាតប្រាក់នេះ ធ្វើឡើងតែមួយថ្ងៃប៉ុណ្ណោះបន្ទាប់ពីលោកស ខេង រដ្ឋមន្ត្រីក្រសួងមហាផ្ទៃកម្ពុជាបញ្ជាឱ្យអាជ្ញាធរពាក់ព័ន្ធបង្កើនវិធានការបង្ការ ទប់ស្កាត់ និងបង្ក្រាបបទឧក្រិដ្ឋឆ្លងដែន ជាពិសេស ការជួញដូរគ្រឿងញៀន និងការសម្អាតប្រាក់។ លោករដ្ឋមន្ត្រីបញ្ជាឱ្យអគ្គស្នងដ្ឋាននគរបាលជាតិ និង អគ្គនាយកដ្ឋានអន្តោប្រវេសន៍បង្ក្រាបបទល្មើសនេះឱ្យបានម៉ឺងម៉ាត់នៅតាមច្រកទ្វារអន្តរជាតិ ច្រកទ្វារព្រំដែនអន្តរជាតិ ច្រកទ្វារព្រំដែនទ្វាភាគី ច្រកទ្វារតំបន់ព្រំដែន កំពង់ផែសមុទ្រ និង នៅតាមខ្សែបន្ទាត់ព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ