បញ្ហា EBA៖ ភ្នាក់ងារវាយតម្លៃចំណាត់ថ្នាក់ឥណទានពិភពលោក ព្រមានពីការធ្លាក់ចុះនៃកំណើនសេដ្ឋកិច្ចកម្ពុជា
ភ្នាក់ងារវាយតម្លៃចំណាត់ថ្នាក់ឥណទានពិភពលោក បានព្រមានថា ការបាត់បង់ប្រព័ន្ធអនុគ្រោះពន្ធពាណិជ្ជកម្មរបស់កម្ពុជា នាំទំនិញចូលទៅសហភាពអឺរ៉ុប នឹងធ្វើឱ្យប៉ះពាល់ដល់កំណើនសេដ្ឋកិច្ច។យ៉ាងណាក៏ដោយ ភ្នាក់ងារវាយតម្លៃចំណាត់ថ្នាក់ឥណទានពិភពលោក ក៏បានលើកឡើងនៅក្នុងរបាយការណ៍របស់ខ្លួនដែរថា ការដកប្រព័ន្ធអនុគ្រោះពន្ធរបស់សហភាពអឺរ៉ុបពីកម្ពុជាឬយ៉ាងណានោះ នឹងត្រូវធ្វើឡើងបន្ទាប់ពីការចរចាជាមួយរដ្ឋាភិបាល ដែលនឹងត្រូវចំណាយពេលរហូតដល់ទៅ ១២ ទៅ ១៨ ខែឯណោះ។
ចុះផ្សាយនៅថ្ងៃ៖ កែប្រែថ្ងៃទី៖
ភ្នាក់ងារវាយតម្លៃចំណាត់ថ្នាក់ឥណទានពិភពលោក Moody’s Investors Service ព្រមានថា ការបាត់បង់សក្ដានុពលអនុគ្រោះពន្ធពាណិជ្ជកម្មរបស់កម្ពុជាចូលទៅសហភាពអឺរ៉ុប នឹងធ្វើឲ្យចុះខ្សោយដល់កំណើនសេដ្ឋកិច្ច។ កំណើនសេដ្ឋកិច្ចកម្ពុជា ដែលត្រូវបានទ្រទ្រង់យ៉ាងរឹងមាំដោយវិស័យកាត់ដេរសម្លៀកបំពាក់ និងវាយនភ័ណ្ឌ នឹងត្រូវប្រឈមនៃចុះខ្សោយលំហូរចូលការវិនិយោគផ្ទាល់ពីបរទេស ដែលបានរួមចំណែកដល់ស្ថិរភាពសេដ្ឋកិច្ច និងហិរញ្ញវត្ថុ ជាពិសេសការប្រកួតប្រជែងពីក្រុមហ៊ុនផលិតសម្លៀកបំពាក់ក្នុងតំបន់ បង្កឲ្យមានការគំរាមកំហែងយ៉ាងខ្លាំងដល់ការនាំចេញសម្លៀកបំពាក់របស់កម្ពុជា។
ស្ថាប័នអន្តរជាតិមួយនេះ ក៏បានព្រមានទៀតថា ខណៈកម្ពុជាបានរក្សាចំណាត់ថ្នាក់បំណុលប្រកបដោយស្ថិរភាព ប្រទេសនេះនឹងបាត់បង់សមត្ថភាពប្រកួតប្រជែងតម្លៃនៃការនាំចេញសម្លៀកបំពាក់របស់ខ្លួន បើមិនមានការប៉ះប៉ូវដោយការទទួលបានផលិតភាពផ្សេងទៀតនោះ។
ទោះបីជាព្រមានពីការធ្លាក់ចុះនៃកំណើនសេដ្ឋកិច្ច ប្រសិនបើសហភាពអឺរ៉ុប ដកប្រព័ន្ធអនុគ្រោះពន្ធ ភ្នាក់ងារដដែល ក៏វាយតម្លៃថា ការដក EBA អាចបង្កើនល្បឿនកិច្ចខិតខំប្រឹងប្រែងរបស់កម្ពុជា ក្នុងការធ្វើពិពិធកម្មនៅក្នុងឧស្សាហកម្ម ផលិតកម្មផ្សេងទៀត ផងដែរ។
ជាការកត់សម្គាល់ ការចេញផ្សាយរបាយការណ៍របស់ភ្នាក់ងារវាយតម្លៃចំណាត់ថ្នាក់ឥណទានពិភពលោក ជួនចំពេលដែល សមាគមរោងចក្រកាត់ដេរនៅកម្ពុជា ហៅកាត់(GMAC) ដែលតំណាងរោងចក្រកាត់ដេរសម្លៀកបំពាក់ និងស្បែកជើងនាំចេញ ក្នុងប្រទេសកម្ពុជា កាលពីថ្ងៃទី២០ខែតុលា បានសរសេរ លិខិតមួយច្បាប់ ទៅកាន់ ស្នងការពាណិជ្ជកម្ម នៃគណៈកម្មការអឺរ៉ុប ដោយលើកឡើងពីកិច្ចប្រឹងប្រែងរបស់ GMAC ក្នុងការផ្តល់បរិយាកាសវិនិយោគល្អរបស់ខ្លួននៅប្រទេសកម្ពុជា។ ក្រៅពីបង្ហាញនូវភាពវិជ្ជមានរបស់ខ្លួន តាមរយៈវិស័យកាត់ដេរ និងដេរស្បែកជើង GMAC ក៏បានសម្តែងនូវការបារម្ភផងដែរចំពោះ ការប្រឈមនឹងការបាត់បង់ប្រព័ន្ធអនុគ្រោះ EBA ពីកម្ពុជា។
សមាគម GMAC អះអាងថា ការព្យួរបណ្តោះអាសន្ននៃគម្រោង EBA ឬទណ្ឌកម្មឯកតោភាគីរយៈពេលខ្លីណាមួយអាចមានផលប៉ះពាល់អវិជ្ជមានរយៈពេលវែង ដល់ជីវិតរបស់កម្មករ និងគ្រួសាររបស់ពួកគេ។ ភាពរីកចម្រើនទាំងអស់ ដែលកម្ពុជាសម្រេចបានក្នុងរយៈកាល២ ទសវត្សរ៍កន្លងមកនេះតាមរយៈកិច្ចខិតខំប្រឹងប្រែងពីភាគីពាក់ព័ន្ធទាំងអស់រួមទាំងដៃគូអភិវឌ្ឍន៍ដូចជា សហភាពអឺរ៉ុប អាចត្រូវបានបំផ្លាញយ៉ាងលឿន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ