អង្គការឃ្លាំមើលការបោះឆ្នោត៖ ស្ថានការណ៍មុនបោះឆ្នោតនៅកម្ពុជាមិនល្អ
អង្គការបណ្តាញអាស៊ានដើម្បីការបោះឆ្នោតដោយសេរី ANFREL កាលពីថ្ងៃទី ១៥ មិថុនា បានចេញសេចក្តីថ្លែងការណ៍មួយ ដោយវាយតម្លៃស្ថានការណ៍មុនការបោះឆ្នោតនៅកម្ពុជា ថាមិនមានស្ថានភាពល្អប្រសើរសម្រាប់ការប្រកួតប្រជែង។ យ៉ាងណាក៏ដោយ គជប បានច្រានចោលការលើកឡើងក្នុងរបាយការណ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងរបាយការណ៍ស្តីពីការវាយតម្លៃមុនការបោះឆ្នោតនៅកម្ពុជា ដែលមានកម្រាស់ ១៥ទំព័រ របស់អង្គការបណ្តាញអាស៊ានដើម្បីការបោះឆ្នោតដោយសេរី ANFREL ដែលធ្វើឡើងដោយអ្នកជំនាញខាងការបោះឆ្នោតមកពីប្រទេសចំនួន៥ បានទាញការសន្និដ្ឋានថា ការបោះឆ្នោតនៅកម្ពុជាខាងមុខនេះ នឹងមិនមានភាពសេរី និងយុត្តិធម៌ដោយផ្អែកលើចំណុចចំនួន៤។
នៅក្នុងនោះរួមមាន បក្សនយោបាយ និងសង្គមស៊ីវិលមិនមានសិទ្ធិពេញលេញឃ្លាំមើល ខណៈប្រព័ន្ធផ្សព្វផ្សាយឯករាជ្យរងការដាក់សម្ពាធ។ មិនត្រឹមតែប៉ុណ្ណោះ អង្គការ ANFREL បានរកឃើញទៀតថា មានការដាក់សម្ពាធប៉ះពាល់ដល់អារម្មណ៍អ្នកបោះឆ្នោត និងតួអង្គប្រកួតប្រជែងគណបក្សមានឥទ្ធិពលមានតែមួយក្រោយពេលអតីតគណបក្សសង្រ្គោះជាតិត្រូវបានរំលាយ។
តាមរបាយការណ៍ដដែល អង្គការANFREL ក៏បានរៀបរាប់ព្រឹត្តិការណ៍មុនបោះឆ្នោតមួយចំនួន ដែលអង្គការនេះ អះអាងថា នឹងធ្វើឱ្យប៉ះពាលដល់ស្ថានការណ៍បោះឆ្នោតនៅកម្ពុជាខាងមុខនេះ ដូចជាការចាប់ខ្លួន លោក កឹម សុខា ប្រធានអតីតគណបក្សសង្រ្គោះជាតិ ការរំលាយគណបក្សសង្រ្គោះជាតិ និងការហាមឃាត់សិទ្ធធ្វើនយោបាយរបស់មន្រ្តីអតីតបក្សប្រឆាំងចំនួន១១៨នាក់ ជាដើម។ យ៉ាងណាក៏ដោយ អ្នកនាំពាក្យគ.ជ.ប លោក ហង្ស ពុទ្ធា ហៅរបាយការណ៍នេះថា មិនឆ្លុះបញ្ចាំងពីសង្គមកម្ពុជា។
ជាការកត់សម្គាល់ សេចក្តីថ្លែងការណ៍របស់ អង្គការ ANFREL នាពេលនេះ ធ្វើឡើងបន្ទាប់ ក្រុមសមាជិកសភាអាស៊ានដើម្បីសិទ្ធិមនុស្ស(APHR) កាលពីថ្ងៃទី១២ មិថុនា ទើបបានចេញមុខរិះគន់ចំពោះការបំភិតបំភ័យដល់ពលរដ្ឋខ្មែរដែលពួកគេអះអាងថាធ្វើឡើងដោយអាជ្ញាធរកម្ពុជា ដើម្បីជំរុញឲ្យពលរដ្ឋទៅបោះឆ្នោតនាពេលខាងមុខ។
ក៏ប៉ុន្តែ លោកសុខ ឥសាន អ្នកនាំពាក្យគណបក្សគណបក្សប្រជាជនកម្ពុជា ហាក់មិនភ្ញាក់ផ្អើលនឹងការលើកឡើងរបស់ក្រុមសមាជិកសភាអាស៊ានដើម្បីសិទ្ធិមនុស្សនេះទេ។ មិនភ្ញាក់ផ្អើលដោយសារតែលោកចាត់ទុកថាក្រុមសមាជិកសភាអាស៊ានដើម្បីសិទ្ធិមនុស្សមានភាពលម្អៀងទៅរកអតីតបក្សប្រឆាំង។ សម្រាប់លោកសុខ ឥសាន អ្វីដែលរដ្ឋាភិបាលកម្ពុជាបានធ្វើ គឺក្នុងគោលបំណងការពារសន្តិសុខជាតិ និង ធ្វើតាមព្រះរាជសាររបស់ព្រះមហាក្សត្រកម្ពុជាដែលជំរុញឲ្យពលរដ្ឋខ្មែរទៅបោះឆ្នោតឲ្យបានគ្រប់គ្នាៗតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ