នាយករដ្ឋមន្ត្រីបួគីណាហ្វាសូ ចង់សើរើសំណុំរឿងចាស់ និងចង់ធ្វើបត្យាប័នអតីតប្រធានាធិបតី
នាយករដ្ឋមន្ត្រីអន្តរកាល អ៊ីស្សាក់ ហ្ស៊ីដា (Isaac Zida) របស់បួគីណាហ្វាសូ បានថ្លែងម្សិលមិញថា សំណុំរឿងឃាតកម្មលើរូបបិតាបដិវត្តន៍ឈ្មោះ សង់ការ៉ា (Sankara) នៅឆ្នាំ១៩៨៧ ដែលមិនធ្លាប់លាតត្រដាងសោះនោះ នឹងត្រូវ«បើកឡើងវិញទាំងស្រុង»។ លោក ហ្ស៊ីដា ក៏ប្រាប់ផងដែរថា បួគីណាហ្វាសូនឹងស្នើសុំទៅប្រទេសម៉ារ៉ុក ឱ្យធ្វើបត្យាប័នប្រធានាធិបតីទើបធ្លាក់ពីអំណាចឈ្មោះ ប្លេស កុំប៉ាអូរ៉េ (Blaise Compaoré)។
ចុះផ្សាយនៅថ្ងៃ៖
ស្តាប់ - ០១:៤១
បច្ចុប្បន្ន វាគ្រាន់តែជាការថ្លែងប៉ុណ្ណោះ ប៉ុន្តែគួរឱ្យចាប់អារម្មណ៍ខ្លាំងអស្ចារ្យ។ នៅចំពោះមុខសារព័ត៌មានជាតិ នាយករដ្ឋមន្ត្រីអន្តរកាលនៃប្រទេសបួគីណាហ្វាសូ បានផ្តើមថ្លែងថា សំណុំរឿង សង់ការ៉ា (Sankara) នឹងត្រូវ«បើកឡើងវិញទាំងស្រុង»៖ «ការប្តឹងជនជាប់សង្ស័យថាមានទោសនឹងត្រូវចាប់ផ្តើមធ្វើ ហើយយុត្តិធម៌នឹងមាន»។ នេះជាការប្រកាសរបស់លោក អ៊ីស្សាក់ ហ្ស៊ីដា (Isaac Zida)។
គឺអំឡុងពេលមានរដ្ឋប្រហារឆ្នាំ១៩៨៣ ដែលបានធ្វើឱ្យលោក តូម៉ាស សង់ការ៉ា (Thomas Sankara) បានឡើងកាន់អំណាច ហើយនៅថ្ងៃទី១៥ ខែតុលា ឆ្នាំ១៩៨៧ គាត់ត្រូវបានគេធ្វើឃាតក្នុងរដ្ឋប្រហារមួយផ្សេងទៀត។ តាំងពីពេលនោះមក ដោយសារមូលហេតុនយោបាយដ៏ច្បាស់ក្រឡែត គេមិនអាចបង្កើតឱ្យមានខ្សែសង្វាក់ទំនួលខុសត្រូវចំពោះអ្វីដែលបានកើតឡើងឡើយ។
ដំណើរឆ្ពោះទៅការធ្វើបត្យាប័នលោក ប្លេស កុំប៉ាអូរ៉េ (Blaise Compaoré)?
មុននេះពីរបីថ្ងៃ ប្រធានាធិបតីអន្តរកាលបួគីណាហ្វាសូ មីស្សែល កាហ្វង់ដូ (Michel Kafando) បានប្រកាសរួចហើយថា ផ្នូរដែលគេសង្ស័យថាជារបស់មេទ័ព សង់ការ៉ា នៅទីបញ្ចុះសព ភាគខាងកើតរដ្ឋធានី នឹងត្រូវគាស់មើល ដើម្បីផ្ទៀងផ្ទាត់ ADN និងដើម្បីកំណត់ថានោះជាសពរបស់បិតាបដិវត្តន៍ពិតប្រាកដឬយ៉ាងណា ដែលនៅក្នុងផ្នូរនោះ។ នៅក្រោមអំណាចរបស់លោក ប្លេស កុំប៉ាអូរ៉េ (Blaise Compaoré) តុលាការក្នុងប្រទេសបួគីណាហ្វាសូ តែងតែបានប្រកាសថាខ្លួនមិនមានសមត្ថភាពដើម្បីអនុញ្ញាតឱ្យធ្វើពិសោធន៍បែបនេះទេ។
ប្រមុខរដ្ឋាភិបាលបួគីណាហ្វាសូ ក៏បានឱ្យដឹងផងដែរថា ការស្នើសុំទៅអាជ្ញាធរម៉ារ៉ុកនឹងត្រូវធ្វើឡើង ដើម្បីឱ្យអតីតប្រធានាធិបតី ប្លេស កុំប៉ាអូរ៉េ អាចមកឈរនៅចំពោះមុខតុលាការបួគីណាហ្វាសូបាន។ លោក កុំប៉ាអូរ៉េ បានចាកចេញពីប្រទេសកូតឌីវ័រ ដែលជាទីជ្រកកោណដំបូងរបស់គាត់ ដើម្បីភៀសខ្លួនទៅប្រទេសម៉ារុក កាលពីថ្ងៃទី២១ ខែវិច្ឆិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ