ស្ងាត់ៗ អេមីរ៉ាតអារ៉ាប់រួមអភិវឌ្ឍន៍កម្មវិធីនុយក្លេអ៊ែរបានលឿនគួរសម !
ចុះផ្សាយនៅថ្ងៃ៖
ស្តាប់ - ០៣:៥២
ម៉ាស៊ីនប្រតិកម្មនុយក្លេអ៊ែរដំបូង របស់ប្រទេសអេមីរ៉ាតអារ៉ាប់រួម នឹងដំណើរការនៅឆ្នាំ២០១៨ខាងមុខនេះហើយ។ ក្រុមវិស្វករនិងអ្នកជំនាញកំពុងធ្វើការមមាញឹក ពន្លឿនកម្មវិធីនុយក្លេអ៊ែរនេះ ប៉ុន្តែជាកម្មវិធីនុយក្លេអ៊ែរស៊ីវិល ដើម្បីទាញយកអគ្គិសនីមក ប្រើប្រាស់ប៉ុណ្ណោះ។ ក្រុងអាប៊ូដាប៊ី៏ គ្រោងមានម៉ាស៊ីនប្រតិកម្មនុយក្លេអ៊ែរដល់ទៅ៤ឯណោះ ដើម្បីប្រើប្រាស់។ កម្មវិធីនុយក្លេអ៊ែរស៊ីវិលអេមីរ៉ាតអារ៉ាប់រួម កំពុងលេចរូបរាង ចំពេលស្ថានការណ៍តំបន់តានតឹងដោយសារបញ្ហានុយក្លេអ៊ែរអ៊ីរ៉ង់។
អេមីរ៉ាតអារ៉ាប់រួម ជាប្រទេសទី១ នៅតំបន់ឈូងសមុទ្រពែក្ស ដែលធ្វើការសាងសង់ប្រតិករនុយក្លេអ៊ែរចំនួន៤ មានទិសដៅទាញយកថាមពលអគ្គិសនីមកប្រើប្រាស់។ ការសាងសង់ម៉ាស៊ីនប្រតិកម្មនុយក្លេអ៊ែរទី១ នៅមជ្ឈមណ្ឌលបារ៉ាកា ចំងាយ៣០០គីឡូម៉ែត្រ ពីទីក្រុងអាប៊ូដាប៊ី ជិតចប់សព្វគ្រប់ហើយ ពេលនេះសម្រេចបានដល់៩៥ភាគរយហើយ។ តាមធម្មតា ប្រតិករដំបូងគេនេះ ត្រូវដាក់ដំណើរការនៅ ឆ្នាំ២០១៧នេះតែម្តង ប៉ុន្តែ ទីបំផុតទៅ ត្រូវលើកទៅឆ្នាំក្រោយវិញ ដោយសារត្រូវដោះស្រាយផ្នែកបច្ចេកទេសអោយបានត្រឹមត្រូវ។
ឃើញថា ស្ងាត់ៗ ក្រុមវិស្វករ និងក្រុមជំនាញបាននាំគ្នាធ្វើការអភិវឌ្ឈកម្មវិធីនុយក្លេអ៊ែរបានលឿនគ្រាន់បើដែរ។ អេមីរ៉ាតអារ៉ាប់រួមសង្ឃឹមថា កម្មវិធីនុយក្លេអ៊ែរស៊ីវិលនេះ អាចនឹងផ្តល់បរិមាណថាមពលអគ្គិសនី ១ភាគ៤ នៃថាមពលអគ្គិសនីក្នុងស្រុក។ កម្មវិធីនុយក្លេអ៊ែរស៊ីវិលនេះ បានសម្រេចអោយមានឡើងតាំងពីឆ្នាំ២០០៩មក ដោយមានការចុះហត្ថលេខាកិច្ចសន្យាសាងសង់មជ្ឈមណ្ឌលបារ៉ាកា ជាមួយក្រុមហ៊ុនរដ្ឋកូរ៉េខាងត្បូង ក្នុងតម្លៃទឹកប្រាក់១៧ពាន់លានអឺរ៉ូ។ ក្រុមហ៊ុនអន្តរជាតិផ្សេងៗ ដូចជាក្រុមហ៊ុនបារាំងAreva ក៏បានចូលរួមជួយកម្មវិធីនុយក្លេអ៊ែរអេមីរ៉ាតអារ៉ាប់រួមដែរ។ យោងតាមកូរ៉េខាងត្បូង មជ្ឈមណ្ឌលនុយក្លេអ៊ែរប៉ារ៉ាកា ដើរតួនាទីសំខាន់ក្នុងការពង្រឹងសេដ្ឋកិច្ច ហើយជាគំរូសម្រាប់ប្រទេសផ្សេងទៀត ដែលចង់មានកម្មវិធីនុយក្លេអ៊ែរស៊ីវិលប្រើប្រាស់។ អាជ្ញាធរអេមីរ៉ាតអារ៉ាប់រួមបានត្រៀមវិធានការសន្តិសុខ ដើម្បីការពារប្រជាជនដែលរស់ក្បែរតំបន់នុយក្លេអ៊ែរ និងប្រទេសជិតខាងនៅក្បែរនោះហើយ។
ដើម្បីកុំអោយមានភាពចម្រូងចម្រាស អាជ្ញាធរក្រុងអាប៊ូដាប៊ីអះអាងថា មិនធ្វើការចម្រើនធាតុអ៊ុយរ៉ានីញ៉ូមទេ។ ទោះយ៉ាងនេះក្តី ក៏កម្មវិធីនុយក្លេអ៊ែរស៊ីវិលមួយនេះកំពុងលេចចេញរូបរាង ចំពេលស្ថានការណ៍តំបន់បូព៌ាកំពុងតានតឹងដែរ។ តានតឹងគឺដោយសារបញ្ហានុយក្លេអ៊ែរអ៊ីរ៉ង់។ ទណ្ឌកម្មរបស់ប្រទេសលោកខាងលិច និងអាមេរិកទៅលើអ៊ីរ៉ង់ កំពុងជំរុញអោយអ៊ីរ៉ង់កាន់តែខឹងសម្បារ។ សភាអ៊ីរ៉ង់ទើបនឹងបានអនុម័តច្បាប់ផ្តល់ថវិកា៥២០លានដុល្លារ អោយរដ្ឋាភិបាលអ៊ីរ៉ង់យកទៅអភិវឌ្ឍមីស៊ីលបាលិស្ទិក។ អ៊ីរ៉ង់ទើបនឹងព្រមានដើរចេញពីកិច្ចព្រមព្រៀងនុយក្លេអ៊ែរដែលសម្រេចបានជាមួយប្រទេសមហាអំណាច កាលពីឆ្នាំ២០១៥។ អ៊ីរ៉ង់មិនមែនជាមិត្តរបស់អេមីរ៉ាត អារ៉ាប់រួមទេ តែជាមិត្តរបស់កាតា ដែលកំពុងមានវិបត្តិការទូតជាមួយអេមីរ៉ាតអារ៉ាប់រួម។ អេមីរ៉ាតអារ៉ាប់រួម អារ៉ាប៊ី សាអូឌីត អេហ្ស៊ីប និងបារ៉ែន ធ្លាប់បានផ្តាច់ទំនាក់ទំនងការទូតជាមួយកាតា ដោយចោទថា កាតាបានគាំទ្រក្រុមភេរវនិយម និងមានទំនាក់ទំនងជាមួយអ៊ីរ៉ង់ដែលជាសត្រូវរបស់អារ៉ាប៊ី សាអូឌីត។
ចំពេលអ៊ីរ៉ង់កំពុងបង្ហាញអានុភាពនុយក្លេអ៊ែរពេលនេះ កម្មវិធីនុយក្លេអ៊ែររបស់អេមីរ៉ាត អារ៉ាប់រួមទោះជាក្នុងទិសដៅស៊ីវិលក្តី ក៏មិនអាចជួយកាត់បន្ថយភាពតានតឹងក្នុង តំបន់ ដែរ។ មានសំណួរសួរថា តើថ្ងៃក្រោយទៅ អេមីរ៉ាតអារ៉ាប់រួមអាចប្តូរចិត្តកែប្រែកម្មវិធីស៊ីវិលនេះ ទៅជាកម្មវិធីមីស៊ីលបាលិស្ទិក ដែរទេ ដើម្បីទប់ទល់អានុភាពរបស់អ៊ីរ៉ង់?
ក្នុងពេលស្ថានការណ៍តំបន់បូព៌ាមិនសូវជានឹងនរ អារ៉ាប៊ី សាអូឌីត ជាសត្រូវរបស់អ៊ីរ៉ង់ក៏គ្រោងធ្វើកម្មវិធីនុយក្លេអ៊ែរស៊ីវិលដូចអេមីរ៉ាតអារ៉ាប់រួមដែរ។ អារ៉ាប៊ីសាអូឌីតពិតជានឹងធ្វើតែក្នុងទិសដៅស៊ីវិលពិតមែនទេ រឺក៏បង្ហាញគម្រោងនុយក្លេអ៊ែរ បង្កប់ដោយបំណងគំរាមទៅអ៊ីរ៉ង់ជាគូប្រជែងវិញ ? ប្រទេសអារ៉ាប់ទាំងនេះសុទ្ធតែជាប្រទេសខ្លាំង ជាប្រទេសអ្នកមានក្នុងតំបន់។ បើពេលណាមួយ ពួកគេប្តូរចិត្ត ដោយយកបញ្ហានុយក្លេអ៊ែរអ៊ីរ៉ង់មកធ្វើជាលេស ដើម្បីអភិវឌ្ឍន៍កម្មវធីបាលិស្ទិក ក៏គេពិបាកបន្ទោស ប្រទេសទាំងនេះដែរ។ ថ្នាក់ដឺកនាំអេមីរ៉ាតអារ៉ាប់រួមមិនបានលាក់បាំងមហិច្ឆតាពង្រឺង ជំហរជាតិខ្លួន អោយខ្លាំងក្នុងតំបន់បូព៌ាទេ។
កូរ៉េខាងត្បូងដែលបានចុះហត្ថលេខាក្នុងការសាងសង់មជ្ឈមណ្ឌលនុយក្លេអ៊ែររបស់អេមីរ៉ាតអារ៉ាប់រួម វិញ បានចេញមុខការពារកម្មវិធីនុយក្លេអ៊ែរស៊ីវិលរបស់អេមីរ៉ាត អារ៉ាប់រួម។ ក្រុងសេអ៊ូលលើកឡើងថា មិនបានគិតថា មជ្ឈមណ្ឌលនុយក្លេអ៊ែររបស់ប្រទេសអេមីរ៉ាត បន្ថែមបញ្ហាក្នុងតំបន់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ