វិបត្តិនៅកាស្មៀរកាន់តែតានតឹងដោយសារការបន្តវាយប្រយុទ្ធគ្នារវាងឥណ្ឌានិងប៉ាគីស្ថាន
នៅថ្ងៃសុក្រ ទី១ មីនា នេះ ស្ថានការណ៍នៅតំបន់កាស្មៀរ នៅតែកើនកម្តៅខ្លាំងគួរឲ្យព្រួយបារម្ភ ដោយសារការប្រឈមមុខដាក់គ្នាដោយអាវុធរវាងឥណ្ឌា និងប៉ាគីស្ថាន នៅតែបន្តកើតមាន។ វិបត្តិនៅកាស្មៀរនេះ បានធ្វើឲ្យគេមានការព្រួយបារម្ភខ្លាំងផងដែរ អំពីសុវត្ថិភាពរបស់អ្នកស្រុកដែលរស់នៅក្បែរតំបន់មានជម្លោះ បន្ទាប់ពីអំពើហិង្សាធ្វើឲ្យមានមនុស្សស្លាប់និងរបួស កាលពីយប់រំលងអធ្រាត្រថ្ងៃព្រហស្បតិ៍ឈានចូលព្រឹកថ្ងៃសុក្រនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
អាជ្ញាធរឥណ្ឌាបានឲ្យដឹងថាមានស្ត្រីម្នាក់ស្លាប់ និងប៉ូលិសឥណ្ឌាម្នាក់ទៀតរងរបួសក្នុងហេតុការណ៍បាញ់ផ្លោង និងទម្លាក់គ្រាប់បែកដាក់គ្នាទៅវិញទៅមករវាងកងទ័ពឥណ្ឌា និងប៉ាគីស្ថាននៅតំបន់កាស្មៀរ។ ទន្ទឹមគ្នានេះ ឥណ្ឌាក៏បានឲ្យដឹងដែរថា កងកម្លាំងរបស់ខ្លួនបានសម្លាប់ទាហានពីរនាក់ដែលគេសង្ស័យថាជាពួកភេរវករវិញផងដែរ។
សូមជម្រាបជូនថា ទំនាក់ទំនងរវាងប្រទេសមហាអំណាចនុយក្លេអ៊ែរទាំងពីរពោលគឺឥណ្ឌា និងប៉ាគីស្ថានបានធ្លាក់ដុនដានខ្លាំងនៅក្នុងសប្តាហ៍នេះ ដោយសារការបាញ់កំទេចយន្តហោះទម្លាក់គ្រាប់បែកទាំងសងខាង។ ជាការប៉ះទង្គិចគ្នាដ៏ក្តៅគគុកចុងក្រោយបង្អស់របស់ប្រទេសទាំងពីរ ដែលកើតចេញដំបូងពីអំពើភេរវកម្មដែលបានសម្លាប់ទាហានឥណ្ឌាចំនួនជាង ៤០ នាក់ កាលពីថ្ងៃទី១៤ កុម្ភៈ ឆ្នាំ២០១៩ កន្លងទៅ។
ទាក់ទងរឿងនេះដែរ អ្នកជំនាញបានលើកឡើងថាការបាញ់ផ្លោង និងការទម្លាក់គ្រាប់បែកដាក់គ្នាឥតឈប់ឈរ ពីសំណាក់ទាហានឥណ្ឌា និងប៉ាគីស្ថាននឹងធ្វើឲ្យប្រជាជនរបស់ប្រទេសទាំងពីរ ដែលមានផ្ទះសម្បែងក្បែរតបន់ជម្លោះ រស់នៅដោយត្រូវប្រឈមមុខនឹងគ្រោះថ្នាក់ខ្ពស់ និងរស់នៅដោយក្តីទុក្ខកង្វល់ជារៀងរាល់ថ្ងៃ។
ជាការពិត ប្រជាជនឥណ្ឌាជាច្រើនអ្នកបានសម្តែងនូវក្តីបារម្ភយ៉ាងខ្លាំងនៅពេលដែល អំពើហិង្សា និងការផ្ទុះអាវុធបន្តកើតមាននៅក្បែរលំនៅឋានរបស់ពួកគេ។ ជាក់ស្តែង ប្រជាជនឥណ្ឌាម្នាក់ ដែលរស់នៅក្បែរព្រំប្រទល់ដែនតំបន់កាស្មៀរគឺលោក Kumar បាននិយាយថា លោកចង់ឲ្យអាជ្ញាឥណ្ឌាសងសឹកចំពោះទង្វើភេរវកម្ម ប៉ុន្តែលោកក៏ចង់ឲ្យអាជ្ញាធរគិតគូរពីសុវត្ថិភាពរបស់ប្រជាជនផងដែរ។
ជាមួយគ្នានេះ ភរិយារបស់លោក Kumar ក៏បានលើកឡើងដែរថា គ្រួសាររបស់គាត់ ព្រមទាំងអ្នកភូមិផ្សេងទៀត មិនអាចរស់នៅជាមួយភាពភ័យខ្លាចដូចសព្វថ្ងៃបានរហូតនោះទេ ហើយថា ប្រសិនបើមានជម្រើស អ្នកស្រី និងក្រុមគ្រួសារនឹងចាកចេញពីកន្លែងមានជម្លោះជារឿងរហូត។ អ្នកស្រីសង្កត់ធ្ងន់ទៀតថា គ្រួសាររបស់អ្នកស្រីក្រីក្រមែន ក៏ប៉ុន្តែពួកគេក៏ស្រលាញ់អាយុជីវិតរបស់ខ្លួនដូចអ្នកផ្សេងឯទៀតៗដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ