រដ្ឋាភិបាលអេស្ប៉ាញនឹងចាប់ផ្តើមនីតិវិធីព្យូរស្វយ័តភាពពីតំបន់កាតាឡូញ៉ា
ថ្ងៃព្រហស្បតិ៍នេះជាថ្ងៃផុតឧសានវាទ ដែលរដ្ឋាភិបាលអេស្ប៉ាញបានដាក់ឲ្យមេដឹកនាំតំបន់កាតាឡូញ៉ាផ្តល់នូវចម្លើយដោយជាក់ច្បាស់ថា តើពួកគេពិតជាប្រកាសឯករាជ្យ ឬបោះបង់ចោលការទាមទារឯករាជ្យ។ ប្រមុខរដ្ឋបាលកាតឡូញ៉ាបានផ្តល់ចម្លើយទៅរដ្ឋាភិបាលអេស្ប៉ាញមុនផុតឧសានវាទ ក៏ប៉ុន្តែ ចម្លើយនេះនៅតែមានភាពស្រពិចស្រពិលដូចពីមុន ហើយរដ្ឋាភិបាលអេស្ប៉ាញក៏បានចេញសេចក្តីប្រាសថានឹងដំណើរការនីតិវិធី ដើម្បីឈានទៅព្យូរស្វយ័តភាពពីតំបន់កាតាឡូញ៉ា។
ចុះផ្សាយនៅថ្ងៃ៖
នៅក្នុងចម្លើយជាលាយលក្ខណ៍អក្សរតបទៅនឹងឧសានវាទរបស់រដ្ឋាភិបាលអេស្ប៉ាញ ប្រមុខដឹកនាំតំបន់កាតាឡូញ៉ាបានបញ្ជាក់ថា កាតាឡូញ៉ានឹងប្រកាសឯករាជ្យជាផ្លូវការ ប្រសិនបើរដ្ឋាភិបាលអេស្ប៉ាញនៅតែបន្ត “ការបង្រ្កាប” ហើយមិនបើកកិច្ចចរចា។
ភ្លាមៗ រដ្ឋាភិបាលក្រុងម៉ាឌ្រីដបានចេញសេចក្តីប្រកាសព័ត៌មានមួយឆ្លើយតបទៅវិញថា ប្រមុខដឹកនាំតំបន់កាតាឡូញ៉ាមិនបានផ្តល់ចម្លើយច្បាស់លាស់ ទៅតាមការទាមទាររបស់រដ្ឋាភិបាលនោះទេ ពោលគឺ នៅតែបន្តរក្សាភាពស្រពិចស្រពិលជុំវិញគម្រោងប្រកាសឯករាជ្យដដែល។ ដូច្នេះ ទើបរដ្ឋាភិបាលសម្រេចថានឹងបន្តនីតិវិធី ស្របទៅតាមរដ្ឋធម្មនុញ្ញ ដើម្បីឈានទៅព្យួរស្វយ័តភាពតំបន់កាតាឡូញ៉ា ដោយយកអំណាចទាំងអស់មកដាក់ឲ្យស្ថិតនៅក្រោមរដ្ឋបាលកណ្តាលវិញ។
រដ្ឋាភិបាលអេស្ប៉ាញក៏បានប្រកាសឲ្យដឹងផងដែរថា នីតិវិធីព្យួរស្វយ័តភាពតំបន់កាតាឡូញ៉ានឹងត្រូវចាប់ផ្តើមធ្វើ នៅក្នុងកិច្ចប្រជុំគណៈរដ្ឋមន្រ្តីវិសាមញ្ញមួយ ដែលនឹងត្រូវបើកធ្វើ នៅថ្ងៃសៅរ៍ ទី២១ តុលា ខាងមុខនេះ។
គួររំឭកឡើងវិញថា រដ្ឋធម្មនុញ្ញអេស្ប៉ាញ ត្រង់មាត្រា ១៥៥ មានចែងពីសិទ្ធិរបស់រដ្ឋាភិបាលក្រុងម៉ាឌ្រីដ ក្នុងការព្យូរស្វយ័តភាពតំបន់ ក្នុងករណីមានវិបត្តិ។ ក៏ប៉ុន្តែ ចាប់តាំងពីរដ្ឋធម្មនុញ្ញចូលជាធរមាន កាលពីឆ្នាំ១៩៧៨មក មាត្រា ១៥៥នេះ មិនធ្លាប់ដែលត្រូវបានគេយកមកអនុវត្តនោះទេ។
ទោះជាយ៉ាងណា រយៈពេលពីរថ្ងៃនេះ គឺចាប់ពីថ្ងៃនេះ រហូតដល់ពេលដែលរដ្ឋាភិបាលអេស្ប៉ាញបើកកិច្ចប្រជុំគណៈរដ្ឋមន្រ្តីវិសាមញ្ញ ទ្វារនៅតែបើកចំហឲ្យមានច្រកចេញ ក្នុងការដោះស្រាយវិបត្តិនេះ ហើយបើយោងតាមប្រភពពីរដ្ឋាភិបាលអេស្ប៉ាញ ដែលដកស្រង់ដោយទីភ្នាក់ងារព័ត៌មានអាអែហ្វប៉េ ច្រកចេញដែលរដ្ឋាភិបាលក្រុងម៉ាឌ្រីដអាចទទួលយកបាន គឺការរៀបចំបោះឆ្នោតតំបន់កាតាឡូញ៉ាមុនកាលកំណត់។
រហូតមកទល់នឹងពេលនេះ ប្រមុខដឹកនាំតំបន់កាតាឡូញ៉ានៅតែបន្តបដិសេធយ៉ាងដាច់អហង្ការមិនព្រមរំលាយសភាតំបន់ ហើយរៀបចំបោះឆ្នោតមុនកាលកំណត់នោះទេ។ ក៏ប៉ុន្តែ ក្នុងពេលជាមួយគ្នានេះ សម្ពាធក៏កំពុងតែកើតមានខ្លាំងដែរឲ្យកាតាឡូញ៉ាបោះបង់ចោលគម្រោងប្រកាសឯករាជ្យ ហើយសម្ពាធខ្លាំង ហើយដែលអាចមានឥទ្ធិពលជាងគេ គឺមកពីខាងក្រុមហ៊ុននិងសហគ្រាស។ តួលេខដែលបានពីបញ្ជីក្រុមហ៊ុនពាណិជ្ជកម្មអេស្ប៉ាញបង្ហាញថា មានក្រុមហ៊ុនរហូតដល់ទៅជាង ៨០០ក្រុមហ៊ុន ក្នុងនោះក៏រួមមានទាំងធនាគារធំៗផង បាននាំគ្នារើទីស្នាក់ការរបស់ខ្លួនចេញពីតំបន់កាតាឡូញ៉ា ចាប់តាំងពីមានការបោះឆ្នោតប្រជាមតិ កាលពីខែកញ្ញាមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ