រាជទាយាទអារ៉ាប៊ីសាអូឌីត ធ្វើទស្សនកិច្ចទៅកាន់ប្រទេសចិន
នៅថ្ងៃព្រហស្បតិ៍ ទី២១ កុម្ភៈ ឆ្នាំ២០១៩ ព្រះអង្គម្ចាស់រាជទាយាទអារ៉ាប៊ីសាអូឌីត ម៉ូហាមេដ បេនសាលម៉ាន បានធ្វើដំណើរទៅដល់ប្រទេសចិន ក្នុងគោលបំណងលើកកម្ពស់ទំនាក់ទំនងសេដ្ឋកិច្ចរវាងប្រទេសទាំងពីរ។ មួយវិញទៀត គេដឹងថាដំណើរទស្សនកិច្ចជាបន្តបន្ទាប់ របស់រាជទាយាទបេនសាលម៉ាន មកកាន់ប្រទេសអាស៊ីនាពេលថ្មីៗនេះ ធ្វើឡើងដើម្បីរឹតចំណងទាក់ទងជាមួយប្រទេសអាស៊ី បន្ទាប់ពីចំណងការទូតរវាងអារ៉ាប៊ីសាអូឌីត ជាមួយប្រទេសលោកលិច ជួបភាពរកាំរកូសដោយសារតែករណីឃាតកម្មលើអ្នកកាសែត Khashoggi កាលពីឆ្នាំទៅមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ព្រះអង្គម្ចាស់ម៉ូហាមេដ បេនសាលម៉ាន នឹងជួបពិភាក្សាជាមួយប្រធានាធិបតីចិនលោកស៊ី ជីងពីង ក្នុងអំឡុងពេលនៃដំណើរទស្សនកិច្ចរយៈពេល២ ថ្ងៃ នៅក្នុងទីក្រុងប៉េកាំង នៃប្រទេសចិន។ ក្រៅតែពីចង់បង្កើនការរកស៊ី ជាមួយនឹងប្រទេសមហាអំណាចអាស៊ីដូចជាចិន រាជទាយាទបេនសាលម៉ាន ក៏ចង់បញ្ជាក់ប្រាប់ទៅកាន់ពិភពលោកដែរថា បើអត់ប្រទេសលោកខាងលិច អារ៉ាប៊ីសាអូឌីត ក៏នៅមានប្រទេសជាសម្ព័ន្ធមិត្តដទៃទៀតដែរ ហើយប្រទេសចិនគឺជាឧទាហរណ៍មួយស្រាប់។
ទាក់ទងនឹងជំនួបរវាងប្រមុខដឹកនាំចិន និងព្រះអង្គម្ចាស់បេនសាលម៉ាន រដ្ឋមន្ត្រីឧស្សាហកម្ម និងថាមពលអារ៉ាប៊ីសាអូឌីត បានប្រាប់សារព័ត៌មាន Xinhua ថាចិនគឺជាទីផ្សារដ៏ធំ និងមានសក្តានុពលខ្លាំងណាស់ សម្រាប់អារ៉ាប៊ីសាអូឌីត។
ជាមួយគ្នានេះដែរ ឯកអគ្គរាជទូតអារ៉ាប៊ីសាអូឌីតប្រចាំនៅប្រទេសចិន ក៏បានឲ្យដឹងដែរថា ប្រទេសទាំងពីរនឹងចុះកិច្ចព្រមព្រៀង ព្រមទាំងអនុស្សរណៈយោគយល់គ្នា លើវិស័យសំខាន់ៗមួយចំនួនដូចជា វិស័យថាមពល ដឹកជញ្ជូន បច្ចេកវិទ្យា និងការវិនិយោគទុនជាដើម។
មួយវិញទៀត បើតាមរដ្ឋមន្ត្រីការបរទេសចិន ក្រៅពីចំណុចខាងលើនេះ ចិនក៏នឹងលើកយកគម្រោងដ៏ធំរបស់រដ្ឋាភិបាលទីក្រុងប៉េកាំង គឺគម្រោងផ្លូវសូត្រ ទៅជជែកពិភាក្សាជាមួយអារ៉ាប៊ីសាអូឌីតដែរ។
សូមរំឭកជូនថា មួយរយៈចុងក្រោយនេះ អារ៉ាប៊ីសាអូឌីតបានងាកមកពង្រឹងទំនាក់ទំនងការទូតព្រមទាំងបង្កើនការដោះដូរពាណិជ្ជកម្មយ៉ាងខ្លាំង ជាមួយនឹងបណ្តាប្រទេសអាស៊ីធំៗ ក្រោយពីទំនាក់ទំនងរវាងអារ៉ាប៊ីសាអូឌីត និងបណ្តាប្រទេសលោកខាងលិច ប្រែទៅជាស្រអាប់។ ស្រអាប់ ពីព្រោះតែករណីសម្លាប់អ្នកកាសែត Khashoggi និងដោយសារតែថ្មីៗនេះ សហភាពអឺរ៉ុបបានស្នើឲ្យដាក់បញ្ចូលអារ៉ាសាអូឌីតទៅក្នុងបញ្ចីខ្មៅប្រទេសលាងលុយកខ្វក់។
ជាក់ស្តែង មុនពេលមកដល់ប្រទេសចិននាថ្ងៃព្រហស្បតិ៍ទី២១ កុម្ភៈ ព្រះអង្គម្ចាស់រាជទាយាទបេនសាលម៉ាន បានធ្វើដំណើរទៅកាន់ប្រទេសប៉ាគីស្ថាន និងប្រទេសឥណ្ឌា ព្រមទាំងបានចុះកិច្ចព្រមព្រៀងជាមួយប្រទេសទាំងពីរក្នុងតម្លៃទឹកប្រាក់រាប់ពាន់លានដុល្លារថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ