អាមេរិកនៅតែមានសុទិដ្ឋិនិយមក្នុងការដោះស្រាយវិបត្តិនុយក្លេអ៊ែរកូរ៉េខាងជើង
សហរដ្ឋអាមេរិក នៅតែសង្ឃឹមថាអាចដោះស្រាយ វិបត្តិនុយក្លេអ៊ែរកូរ៉េខាងជើងបាន បើទោះបីជា មានព័ត៌មានស្តីអំពី ការចាប់ដាក់ឲ្យដំណើរការឡើងវិញនូវទីតាំងបាញ់រ៉ុកែតកូរ៉េខាងជើងយ៉ាងណាក៏ដោយ។ មិនតែប៉ុណ្ណោះ អាមេរិកថែមទាំងមានសុទិដ្ឋិនិយមថាអាចជំរុញឲ្យកូរ៉េខាងជើង រំសាយអាវុធនុយក្លេអ៊ែរ នៅក្នុងអាណត្តិដឹកនាំរបស់លោកដូណាល់ ត្រាំទៀតផង។ នេះបើតាមការបញ្ជាក់ប្រាប់របស់មន្ត្រីរដ្ឋាភិបាលជាន់ខ្ពស់អាមេរិកម្នាក់ កាលពីថ្ងៃព្រហស្បតិ៍ ទី ៧ មីនា ម្សិលមិញនេះ។
ចុះផ្សាយនៅថ្ងៃ៖ កែប្រែថ្ងៃទី៖
ក្រោយពេលដែលមានព័ត៌មានចុះផ្សាយអំពីការចាប់ដាក់ឲ្យដំណើរការឡើងវិញនូវទីតាំងបាញ់រ៉ុកែតរបស់កូរ៉េខាងជើង គេផ្តើមមានការព្រួយបារម្ភអំពីដំណើរការនៃកិច្ចចរចារវាងអាមេរិកនិងកូរ៉េខាងជើង ក្នុងការដោះស្រាយវិបត្តិនុយក្លេអ៊ែរ ដែលនៅបន្តជាប់គាំងរហូតមកទល់នឹងសព្វថ្ងៃ។
ទាក់ទងរឿងនេះដែរ អាមេរិកហាក់មិនបានខឹងសម្បាអ្វី ឬក៏បញ្ចេញប្រតិកម្មតបទៅកាន់កូរ៉េខាងជើងឡើយ។ ផ្ទុយទៅវិញ ទីក្រុងវ៉ាស៊ីនតោននៅតែមានសុទិដ្ឋិនិយមថាអាចរួមសហការជាមួយព្យុងយ៉ាងដើម្បីដោះស្រាយវិបត្តិនុយក្លេអ៊ែរកូរ៉េខាងជើងបានដដែល។
ជាក់ស្តែង នៅពេលឆ្លើយនឹងសំណួររបស់អ្នកសារព័ត៌មានដែលចោទសួរថាតើលោកមានការអាក់អន់ស្រពន់ចិត្តទេនៅពេលបានឮអំពីការសាងសង់ឡើងវិញនូវស្ថានីយបាញ់រ៉ុកែតរបស់កូរ៉េខាងជើង លោកដូណាល់ ត្រាំបានឆ្លើយថា “យើងនឹងរង់ចាំមើល។ យើងនឹងដឹង ក្នុងរយៈពេលប្រហែលជា១ ឆ្នាំទៀត”។
ទន្ទឹមគ្នានេះ អ្នកនាំពាក្យក្រសួងការបរទេសអាមេរិក លោក Robert Palladino បានបញ្ជាក់ពីការប្តេជ្ញាចិត្តរបស់អាមេរិកក្នុងការបន្តកិច្ចចរចាជាមួយនឹងមេដឹកនាំកូរ៉េខាងជើងលោកគីម ជុងអ៊ុន និងថារដ្ឋបាលរបស់លោកត្រាំត្រៀមខ្លួនរួចជាស្រេចដើម្បីទទួលបានលទ្ធផលប្រកបដោយផ្លែផ្លាមួយពីកិច្ចចរចាជាមួយនឹងទីក្រុងព្យុងយ៉ាង។
រហូតមកដល់ពេលនេះ អាមេរិកនៅមិនទាន់បានប្រាប់នៅឡើយទេថា ខ្លួនបាននិយាយគ្នាជាមួយកូរ៉េខាងជើងហើយឬនៅ អំពីរឿងដែលថាកូរ៉េខាងជើងកំពុងតែដាក់ដំណើរឡើងវិញនូវស្ថានីយបាញ់រ៉ុកែត។
ទោះបីជាយ៉ាងណាក្តី អ្នកនាំពាក្យក្រសួងការបរទេសអាមេរិក និយាយថារដ្ឋាភិបាលទីក្រុងវ៉ាស៊ីនតោននៅតែមានជំនឿយ៉ាងមុតមាំថា អាចដោះស្រាយវិបត្តិនុយក្លេអ៊ែរខាងជើងបាន និងបាននៅក្នុងអាណត្តិដឹកនាំរដ្ឋរបស់លោកដូណាល់ ត្រាំ ដែលនឹងត្រូវបញ្ចប់នៅខែមករា ឆ្នាំ ២០២១ ទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ