លោកដូណាល់ ត្រាំសម្រេចលុបចោលការដាក់ទណ្ឌកម្មសេដ្ឋកិច្ចថ្មីលើកូរ៉េខាងជើង
កាលពីថ្ងៃសុក្រទី២៩ មីនា លោកប្រធានាធិបតីអាមេរិកដូណាល់ត្រាំ បានបញ្ជាក់អះអាងសាជាថ្មីថា លោកបានសម្រេចលុបចោលនូវការដាក់ទណ្ឌកម្មថ្មីបន្ថែមទៀត ទៅលើកូរ៉េខាងជើង។ លោកដូណាល់ ត្រាំ បានពន្យល់ថា គោលនយោបាយថ្មីនេះធ្វើឡើងដោយសារម្យ៉ាង អាមេរិកយល់ពីទុក្ខលំបាករបស់ប្រជាជនកូរ៉េខាងជើង ហើយម្យ៉ាងទៀតគឺដោយសារតែអាមេរិកឱ្យតម្លៃចំពោះទំនាក់ទំនងរវាងប្រទេសទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីសម្រេចរបស់លោកដូណាល់ ត្រាំក្នុងការលុបចោលនូវការដាក់ទណ្ឌកម្មថ្មីបន្ថែមទៀត ទៅលើប្រទេសកូរ៉េខាងជើង ធ្វើឲ្យសហគមន៍អន្តរជាតិមានការភ្ញាក់ផ្អើលជាខ្លាំង។ លោកត្រាំបានប្រាប់អ្នកយកសារព័ត៌មានថា លោកយល់អំពីទុក្ខវេទនា ភាពលំបាកត្រដាបត្រដួស ដែលប្រជាជនកូរ៉េកំពុងជួបប្រទះ ដូច្នេះហើយលោកមិនដាក់ទណ្ឌកម្មបន្ថែម លើប្រទេសកូរ៉េខាងជើងទៀតនោះឡើយ។
លោកដូណាល់ ត្រាំ ក៏បានបញ្ជាក់ទៀតថា ទណ្ឌកម្មបន្ថែម មិនចាំបាច់ត្រូវដាក់ចេញទៀតនោះទេនាខណៈនេះ ហើយក្រៅតែពីចង់ជួយសម្រាលដល់ភាពលំបាកលំបិនរបស់កូរ៉េខាងជើង លោកក៏ចង់រក្សាទំនាក់ទំនងល្អជាមួយមេដឹកនាំកូរ៉េខាងជើងគឺលោកគីម ជុងអ៊ុនដែរ។
គួរជម្រាបជូនថា ការលើកឡើងរបស់លោកត្រាំ បានធ្វើឲ្យគេមានការភ្ញាក់យ៉ាងខ្លាំង។ តែទោះជាយ៉ាងណាក្តី ក្រុមអ្នកវិភាគយល់ឃើញថា កាយវិការទន់ភ្លន់របស់លោកត្រាំនាពេលនេះ អាចជាយុទ្ធសាស្ត្ររបស់លោកត្រាំ ដើម្បីជួយសម្រួលដល់ដំណើរការ នៃកិច្ចចរចាជាមួយសមភាគីកូរ៉េខាងជើង និងឆាប់សម្រេចបានកិច្ចព្រមព្រៀងជាមួយគ្នា ជាពិសេសនៅក្នុងអាណត្តិដឹកនាំរបស់លោកតែម្តង។
ទន្ទឹមគ្នានេះ គេក៏មើលឃើញដែរថា ទីក្រុងវ៉ាស៊ីនតោន បានបង្ហាញនូវជំហរទន់ភ្លន់របស់ខ្លួន គឺបន្ទាប់ពីទីក្រុងព្យុងយ៉ាងប្រកាសអំពីចេតនាចង់ផ្អាកការចរចា ជាមួយនឹងរដ្ឋាភិបាលអាមេរិកទាក់ទងសំណុំរឿងនុយក្លេអ៊ែរ។
បន្ថែមលើនេះ កូរ៉េខាងជើងក៏ចង់ឈប់ព្យួរការសាកល្បីងមីស៊ីលដែរ ដែលនេះបណ្តាលមកពីរដ្ឋាភិបាលទីក្រុងព្យុងយ៉ាង អន់ចិត្តនឹងអាមេរិក ដែលមិនព្រមដកចេញនូវទណ្ឌកម្មសេដ្ឋកិច្ចតាមការស្នើសុំរបស់ខ្លួន កាលពីជំនួបលោកទី២ជាមួយគ្នា នៅក្នុងប្រទេសវៀតណាម ដែលបានប្រព្រឹត្តទៅកាលពីថ្ងៃទី ២៧-២៨ កុម្ភៈ ឆ្នាំ២០១៩ កន្លងទៅ។
គួររំឭកជូនដែរថា នៅមួយរយៈពេលចុងក្រោយនេះ លោកប្រធានាធិបតីដូណាល់ ត្រាំឧស្សាហ៍និយាយថា លោកមានទំនាក់ទំនងល្អខ្លាំងណាស់ ជាមួយនឹងលោកគីម ជុងអ៊ុន។ ស្របគ្នានេះដែរ គេសង្កេតឃើញថាលោកត្រាំ ហាក់បន្ទន់ជំហររបស់ខ្លួនជាច្រើននៅចំពោះមុខកូរ៉េខាងជើង ដែលនេះខុសគ្នាផ្ទុយស្រឡះពីជំហររបស់លោកទៅលើប្រទេសអ៊ីរ៉ង់ និងវ៉េណេស៊ុយអេឡា ដែលរដ្ឋបាលរបស់លោកត្រាំ នៅបន្តដាក់ទណ្ឌកម្មឥតឈប់ឈរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ