rfi

កំពុងផ្សាយ
  • ផ្សាយផ្ទាល់
  • នាទីព័ត៌មាន
  • RFI ជាភាសាបារាំង
ព្រឹត្តិការណ៍អន្តរជាតិប្រចាំថ្ងៃ
rss itunes

លោកស្រី​មេ​ បញ្ចប់​តួនាទី​ជា​មេបក្ស​កាន់អំណាច​អង់គ្លេស​នៅថ្ងៃ​ទី៧​ មិថុនា​នេះ​

ដោយ អ៊ុង គឹមអ៊ាន់

ថ្ងៃសុក្រ ទី៧ មិថុនានេះ គឺជាថ្ងៃចុងក្រោយរបស់លោកស្រីនាយករដ្ឋមន្ត្រីតេរេសា មេ ក្នុងនាមជាមេដឹកនាំបក្សកាន់អំណាចអង់គ្លេស។​ ទោះបីលែងមានតួនាទី ជាប្រធានបក្សកាន់អំណាចត្រឹមនេះក្តី តែលោកស្រីមេ នឹងនៅតែបន្តតំណែងជានាយករដ្ឋមន្ត្រីរយៈក្នុងរយៈពេល ៤ ទៅ ៥ សប្តាហ៍ខាងមុខទៀត ដើម្បីរង់ចាំអ្នកថ្មី មកជំនួសតំណែងរបស់លោកស្រីទាំងជាប្រធានបក្សកាន់អំណាច និងជាប្រមុខរដ្ឋាភិបាលថ្មីរបស់អង់គ្លេស។

តើនរណាទៅ ដែលនឹងអាចក្លាយទៅជានាយករដ្ឋមន្ត្រីថ្មីរបស់ប្រទេសអង់គ្លេស? ហើយពេលណា ទើបអង់គ្លេសអាចជ្រើសរើសប្រមុខដឹកនាំប្រទេសថ្មីរបស់ខ្លួនបាន?

រំឭកហេតុផល ដែលនាំឲ្យលោកស្រីតេរេសា មេ លាលែងចេញពីតំណែងនាយករដ្ឋមន្ត្រី

គេនៅចាំបានមិនទាន់ភ្លេចទេថា កាលពី ២ សប្តាហ៍កន្លងទៅ លោកស្រីនាយករដ្ឋមន្ត្រីអង់គ្លេសតេរេសា មេ បានប្រកាសថាលោកស្រីនឹង​លាឈប់​ពីមុខ​តំណែង​ជា​​ប្រមុខរដ្ឋាភិបាលអង់គ្លេស នាថ្ងៃ​សុក្រ ទី៧ ​មិថុនា នេះ​។ នេះក៏មានន័យដែរថា តំណែងជាប្រធានបក្សកាន់អំណាចរបស់លោកស្រី ពោលគឺប្រធានបក្សអភិរក្សនិយមក៏ត្រូវបិទបញ្ចប់ព្រមជាមួយគ្នាតែម្តង។

លោកស្រីមេ បានឡើងកាន់តំណែងជានាយករដ្ឋមន្ត្រីអង់គ្លេស ក្នុងខែកក្កដា ឆ្នាំ ២០១៦ ពោលគឺប៉ុន្មានសប្តាហ៍តែប៉ុណ្ណោះ បន្ទាប់ពីការបោះឆ្នោតប្រជាមតិ Brexit។ ចាប់តាំងពីចូលកាន់តំណែងភ្លាម លោកស្រីមេ បានស្ថិតក្រោមសម្ពាធជាខ្លាំង និងជាពិសេសតែម្តងក្នុងការដឹកនាំដំណើរការចរចា លែងលះគ្នាជាមួយនឹងសហភាពអឺរ៉ុប។ រយៈពេល ៣ ឆ្នាំ កន្លងមកនេះ លោកស្រីមេ បានខិតខំប្រឹងប្រែងចរចា តថ្លៃជាមួយ សហភាពអឺរ៉ុប ជាច្រើនលើកច្រើនសារ អំពីលក្ខខណ្ឌក្នុងការបែកផ្លូវគ្នា បូករួមទាំងទំនាក់ទំនងរវាងអង់គ្លេស និងសហភាពអឺរ៉ុបក្រោយលែងលះគ្នា។

លោកស្រីមេ នៅទីបំផុតទៅ បានសម្រេចកិច្ចព្រមព្រៀងជាមួយសហភាពអឺរ៉ុប​ ចំនួន ៣ ក៏ប៉ុន្តែ គ្មានកិច្ចព្រមព្រៀងគ្នាណាមួយឡើយ ក្នុងចំណោមកិច្ចព្រមព្រៀងទាំងអស់ ដែលអ្នកស្រីខំប្រឹងសម្រេចបាន ត្រូវសភាអង់គ្លេសបោះឆ្នោតអនុម័តគាំទ្រនោះ។ បរាជ័យជាច្រើនលើកច្រើនសារនេះហើយ ដែលជាហេតុផលជំរុញឲ្យលោកស្រីសម្រេចលាលែងចុះចេញតំណែង។

គួររំឭកជូនដែរថា កាលពី ថ្ងៃទី ២៤ ឧសភា ថ្ងៃដែលលោកស្រី ប្រកាសលាលែងចេញពីតំណែង លោកស្រីក៏បានបញ្ជាក់ប្រាប់ដែរថា នៅគ្រាកន្លងមក លោកស្រីបានខិតខំប្រឹងប្រែងអស់ពីលទ្ធភាពហើយ ក្នុងការផ្តាច់អង់គ្លេស ចេញពីសហភាពអឺរ៉ុប តែលោកស្រីមិនអាចធ្វើឲ្យរឿងនេះកើតឡើង ដូចការចង់បានរបស់ពលរដ្ឋអង់គ្លេស ដូច្នោះលោកស្រីត្រូវតែចាកចេញ និងទុកតួនាទីនេះឲ្យអ្នកជំនាន់ក្រោយដែលមានសមត្ថភាពធ្វើការជំនួសវិញ។

នរណាជាអ្នកអាចស្នងតំណែងជានាយករដ្ឋមន្ត្រីថ្មីជំនួសលោកស្រីមេ?

រឿងមួយដែលគេដឹងច្បាស់នាពេលនេះគឺថា នរណាអាចឈ្នះការបោះឆ្នោត ក្លាយជាប្រធានគណបក្សកាន់អំណាចអង់គ្លេសគឺបក្សអភិរក្សនិយម អ្នកនោះនឹងក្លាយជានាយករដ្ឋមន្ត្រីអង់គ្លេសដោយស្វ័យប្រវត្តិ។

នាខណៈនេះគេដឹងថា មានសមាសភាពមកពីបក្សអភិរក្សនិយមចំនួន ១១ នាក់ ដែលជាបេក្ខភាពប្រកួតប្រជែង ដណ្តើមយកតំណែងជាមេដឹកនាំបក្ស ដែលក្នុងនោះក៏មានស្ត្រីចំនួនពីររូបផងដែរ។

តែទោះជាយ៉ាងណាក្តី ក្នុងចំណោមបេក្ខភាពទាំង ១១ មានគេសង្កេតឃើញថា មានបេក្ខភាពចំនួនពីររូប ដែលលេចធ្លោជាងគេ និងមានឱកាសខ្ពស់ ក្នុងការដណ្តើមយកតំណែងជាមេបក្សកាន់អំណាច និងជាប្រមុខដឹកនាំរដ្ឋាភិបាលអង់គ្លេសថ្មី។

អ្នកទី១ គឺ លោក Boris Johnson ជាអតីតរដ្ឋមន្ត្រីក្រសួងការបរទេសអង់គ្លេស និងជាអតីតចៅហ្វាយក្រុងឡុងដ៍ម្នាក់ផងដែរ។ លោក Boris Johnson បានក្លាយជាអ្នកនយោបាយដ៏លេចធ្លោ និងមានប្រជាប្រិយខ្លាំងបំផុតមួយរបស់អង់គ្លេសចាប់តាំងពីឆ្នាំ ២០១៦ មកម្ល៉ោះ។ អតីតចៅហ្វាយក្រុងឡុងដ៍រូបនេះ មិនសូវជាចូលចិត្តប្រធានាធិបតីអាមេរិកលោកដូណាល់ ត្រាំ ប៉ុន្មាននោះទេ។

មិនតែប៉ុណ្ណោះ នាពេលថ្មីៗចុងក្រោយនេះ លោកធ្លាប់បាននិយាយថា អង់គ្លេសមិនត្រូវចាកចេញពីសហភាពអឺរ៉ុប ដោយគ្មានកិច្ចព្រមព្រៀង ដូចការឲ្យយោបល់របស់លោកត្រាំឡើយ។ លោក Boris Johnson លើកឡើងថា ការចាកចេញដោយគ្មានកិច្ចព្រមព្រៀងអង់គ្លេស នឹងរង់ផលប៉ះពាល់ និងខាតបង់ខ្លាំងជាមិនខាន។

ចំណែកអ្នកទី២ ដែលអាចមានលទ្ធភាពទទួលបានសំឡេងគាំទ្រ ក្លាយជានាយករដ្ឋមន្ត្រីអង់គ្លេសថ្មី គឺ លោក Michael Gove ជារដ្ឋមន្ត្រីក្រសួងបរិស្ថាន និងក៏ជាបុគ្គលម្នាក់ដែលជួយគាំទ្រលោកស្រីតេរេសា មេ យ៉ាងសកម្មក្នុងដំណើរការនៃកិច្ចចរចា ជាមួយសហភាពអឺរ៉ុប ទាក់ទងនឹងការចាកចេញរបស់អង់គ្លេស នាពេលកន្លងមក។

អង់គ្លេស រំពឹងជ្រើសរើសនាយករដ្ឋមន្ត្រីថ្មីបានក្នុងពេលឆាប់ៗ

លោកស្រីមេ នឹងនៅដឹកនាំប្រទេស ក្នុងនាមជានាយករដ្ឋមន្ត្រីស្តីទី រហូតដល់ចុងខែកក្កដា ក្រោយ។ តែទោះជាយ៉ាងណាក្តី មិនជាយូរប៉ុន្មានទៀតទេ ដែលអង់គ្លេសអាចរកឃើញបេក្ខភាពថ្មី មកជំនួសតំណែងលោកស្រីមេបាន។

ជាក់ស្តែង នៅថ្ងៃចន្ទ ទី ១០ មិថុនា សប្តាហ៍ក្រោយនេះ ការទទួលពាក្យសុំប្រកួតប្រជែងជាមេដឹកនាំបក្សកាន់អំណាច នឹងត្រូវចាប់បើកជាផ្លូវការ ហើយបិទវិញនៅវេលាម៉ោង ៥ ល្ងាច ម៉ោងនៅក្នុងប្រទេសអង់គ្លេស។

បន្ទាប់មកទៀត ការបោះឆ្នោតជាសម្ងាត់ ជ្រើសរើសមេដឹកនាំបក្សកាន់អំណាច នឹងត្រូវប្រព្រឹត្តឡើងជាច្រើនដំណាក់កាល ពោលគឺច្រើនរហូតដល់ ៥ ជុំ ជាបន្តបន្ទាប់គ្នា រាប់ចាប់ពីថ្ងៃទី ១៣ ខែមិថុនា និងរហូតដល់ថ្ងៃទី ២២ កក្កដា។

បេក្ខភាព ដែលអាចឈ្នះការប្រកួតប្រជែងនេះបាន ត្រូវការសំឡេងគាំទ្រចំនួន ៨ ពីសមាជិកបក្សអភិរក្សដទៃទៀត។​ នៅជុំចុងក្រោយ បេក្ខភាពពីរនាក់ នឹងត្រូវបន្តប្រកួតប្រជែងគ្នា ហើយគេរំពឹងទុកថា អ្នកឈ្នះការបោះឆ្នោត និងជានាយករដ្ឋមន្ត្រីអង់គ្លេសថ្មី នឹងត្រូវប្រកាសប្រាប់ជាសាធារណៈនៅថ្ងៃ ទី ២២ កក្កដា ខាងមុខនេះ៕

ប្រធានាធិបតី​អ៊ីរ៉ង់​ព្រមានប្រាប់​ទ័ព​បរទេស​ឲ្យ​​​​នៅ​ឆ្ងាយ​ពី​ឈូងសមុទ្រពែរ្ស៍

យេម៉ែន៖ចលនាឧទ្ទាមហ៊ូទីប្រកាសត្រៀមខ្លួនបញ្ឈប់រាល់ការវាយប្រហារប្រឆាំងអារ៉ាប៊ីសាអូឌីត

​បាតុកម្ម​របស់​សិស្សសាលា នៅ​ទូទាំង​ពិភពលោក ដើម្បី​ប្រយុទ្ធប្រឆាំង​នឹង​ការប្រែប្រួល​អាកាសធាតុ

ហ្វូគូស្ហ៊ីម៉ា៖តុលាការក្រុងតូក្យូកាត់ទោសឲ្យអតីតមេដឹកនាំក្រុមហ៊ុនTepco ៣នាក់រួចខ្លួន

លោកម៉ាក្រុងទៅអ៊ីតាលី​ដើម្បី​ផ្សះផ្សា​​ទំនាក់ទំនង​ប្រទេស​ទាំងពីរ​ឡើងវិញ

បោះឆ្នោតជាតិនៅអ៊ីស្រាអែល ដើម្បីបន្ត​ជីវិត​​នយោបាយ​របស់​នាយករដ្ឋម​ន្ត្រី​ នេតាន់យ៉ាហ៊ូ

បោះឆ្នោតប្រធានាធិបតី ៖ ទុយនីស៊ីច្រាន​ចោល​អ្នក​នយោបាយ​ចាស់ ជ្រើស​យកចរន្ត​ថ្មី

ក្រោយការវាយប្រហារពីពួកឧទ្ទាមហ៊ូទី ផលិកម្មប្រេងអារ៉ាប៊ីសាអូឌីតបានធ្លាក់ចុះពាក់កណ្តាល

អាហ្វ្រិក​ខាង​លិច​បើក​ជំនួប​កំពូល​វិសាមញ្ញ​ដើម្បី​ទប់​ស្កាត់​អំពើ​ភេរវនិយម

អាមេរិក៖ហេតុអ្វីបានជាលោកដូណាល់ ត្រាំបញ្ចប់តំណែងលោកចន បុលតុនពីទីប្រឹក្សាសន្តិសុខជាតិ?

អ្នកវិទ្យាសាស្រ្ត​រកឃើញ​វិធីសាស្រ្ត​ថ្មីដើម្បីទប់ស្កាត់កុំឲ្យ ​មូសខ្លា​អាច​ចម្លង​មេរោគគ្រុនឈាម

បារាំង​ងាក​ទៅ​រឹត​ចំណង​ទំនាក់ទំនង​ជាមួយ​រុស្ស៊ី

លោកដូណាល់ ត្រាំ ប្រកាសឈប់​ចរចា​សន្តិភាព ជាមួយ​ពួកតាលីបង់

យាន​អវកាស​របស់​ឥណ្ឌា​ បរាជ័យ​ក្នុងការ​ចុះចត​នៅ​ប៉ូល​ខាងត្បូង​នៃ​ឋាន​ព្រះចន្ទ​

លោកមូហ្កាបេ​ មេដឹកនាំ​ផ្តាច់ការរបស់​ស៊ីមបាវ៉េ ទទួល​មរណភាព

ឥណ្ឌា-រុស្ស៊ី៖ លោកពូទីន ទទួលលោកម៉ូឌីនៅក្រុងវ្លាឌីវ៉ូស្តុក​​

នៅអង់គ្លេស នាយករដ្ឋមន្រ្តីលោកបូរីស ចនសុនប្រកាសសង្រ្គាមទល់នឹងសភាក្នុងសំណុំរឿង Brexit

អ៊ីស្រាអែល និងក្រុម​ហេសបូឡាលីបង់ ប្លោង​គ្រាប់​ដាក់គ្នា គួរឲ្យ​ព្រួយបារម្ភ

៨០ឆ្នាំក្រោយការផ្តើមបញ្ឆេះសង្រ្គាមលោកលើកទី២ អាល្លឺម៉ង់បានសុំទោសប៉ូឡូញ តែប៉ូឡូញបន្តទាមទារសំណង

ហុងកុង៖ បាតុករ​ព្យាយាម​​ដើរចូលទៅជិតវិមាន​ថ្នាក់ដឹកនាំ