សេរីភាពនៃការគោរពសាសនា៖ចិននិងអ៊ីរ៉ង់រិះគន់បកទៅរបាយការណ៍អាមេរិក
ថ្ងៃអង្គារកន្លងទៅ ក្រសួងការបរទេសអាមេរិកបានចេញរបាយការណ៍ប្រចាំឆ្នាំស្តីពីការរារាំងសិទ្ធិសេរីភាពនៃការគោរពសាសនាក្នុងពិភពលោក។ អាមេរិករិះគន់ប្រទេសមួយចំនួនដូចជាអ៊ីរ៉ង់ ចិន រឺក៏ប៉ាគីស្ថាន។ ថ្ងៃពុធនេះ ចិននិងអ៊ីរ៉ង់បាននាំគ្នារិះគន់តបទៅអាមេរិកវិញ។ ចិនព្រមានអាមេរិកអោយឈប់លើកនិយាយពីរឿងសាសនាដើម្បីលូកដៃក្នុងកិច្ចការផ្ទៃក្នុងប្រទេសផ្សេងៗតទៅទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
របាយការណ៍ប្រចាំឆ្នាំអាមេរិក ចេញផ្សាយកាលពីថ្ងៃអង្គារ ផ្តោតខ្លឹមសារលើការរារាំងសិទ្ធិសេរីភាពនៃការគោរពសាសនានៅតាមប្រទេសជិត២០០ នៅទូទាំងពិភពលោក។ អាមេរិកបានរិះគន់ប្រទេសមួយចំនួន ថាបានធ្វើបាបសហគមន៍សាសនាភាគតិចក្នុងស្រុក។ ប្រទេសទាំងនោះមានចិន អ៊ីរ៉ង់ អារ៉ាប៊ីសាអូឌីត ប៉ាគីស្ថាន រឺក៏តួកគីជាដើម។ អាមេរិកចោទចិនថា បានធ្វើបាបអ្នកកាន់សាសនាគ្រិស្ត អ្នកកាន់ពុទ្ធសាសនានៅទីបេ និងសមាជិកនិកាយហ្វាលុងហ្គុង។ របាយការណ៍អាមេរិកបានរិះគន់អាជ្ញាធរចិនពីយុទ្ធនាការចិន ក្នុងឆ្នាំ២០១៦កន្លងទៅ នៅខែត្រ Zhejiang ភាគខាងកើត ចោទថាចិនបានដកហូតរូបសញ្ញាខ្វែងសាសនា នៅតាមកំពូលវិហារផ្សេងៗក្នុងស្រុក។
របាយការណ៍អាមេរិកលើកឡើងផងដែរ ថាសមាជិកនិកាយហ្វាលុងហ្គុង ជានិកាយដែលចិនបានបំបាត់ចោលនៅឆ្នាំ១៩៩៩នោះ សមាជិកនិកាយនេះច្រើននាក់បានស្លាប់ ក្នុងពន្ធនាគារចិន។ ថ្ងៃពុធនេះ អ្នកនាំពាក្យរដ្ឋាភិបាលចិនបានតបទៅអាមេរិកវិញថា ប្រជាជនចិនគ្រប់រូបមានសិទ្ធិគោរពប្រណិបត្តិសាសនាយ៉ាងពេញលេញ។ ចិនប្រកាសប្រឆាំងនិងតវ៉ាជាផ្លូវការ ចំពោះការចោទប្រកាន់របស់អាមេរិក។
អ៊ីរ៉ង់ដែលរងការរិះគន់ដូចចិនដែរនោះ បានរិះគន់តបនឹងអាមេរិកនៅថ្ងៃពុធនេះដែរថា របាយការណ៍អាមេរិក គ្មានមូលដ្ឋានច្បាស់លាស់ ជារបាយការណ៍លាក់ពុត។ ហើយអាមេរិកខ្លួនឯងត្រូវតែឆ្លុះកញ្ចក់មើលខ្លួនឯងសិន បើនិយាយពីការរើសអើងសាសនានេះ ព្រោះថា អ្នកកាន់សាសនាអ៊ីស្លាមក្នុងស្រុកអាមេរិក ត្រូវបានគេរើសអើងធ្វើបាបរាល់ថ្ងៃ។ ពួកគេរងការរើសអើងក្នុងស្ថាប័នរដ្ឋាភិបាល ដូចជាក្នុងជួរប៉ូលិស រឺកងកម្លាំងសន្តិសុខជាដើម។ ទាក់ទងនឹងអ៊ីរ៉ង់ អាមេរិកចោទអ៊ីរ៉ង់ថាបន្តធ្វើទុក្ខបុកម្នេញ សួរចម្លើយ និងចាប់ខ្លួនអ្នកកាន់សាសនាបាហាយ អ្នកកាន់សាសនាគ្រិស្ត រឺក៏អ៊ីស្លាមនិកាយស៊ុននីតជាដើម។ លោករិច ធីលឡឺសុន រដ្ឋមន្ត្រីការបរទេសអាមេរិកថែមទាំងចោទថា អ៊ីរ៉ង់ប្រើច្បាប់ស្រពិចស្រពិល ទាក់ទងនឹងការក្បត់សាសនា ដើម្បីបន្តកាត់ទោសប្រហារជីវិតមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ