សហភាពអឺរ៉ុបបារម្ភខ្លាចវិបត្តិនយោបាយអង់គ្លេសធ្វើឲ្យការចរចា Brexit មិនអាចចេញរួច
ក្រោយពីមានការលាលែងផ្ទួនៗគ្នារបស់រដ្ឋមន្រ្តីទទួលបន្ទុកចរចា Brexit និងរដ្ឋមន្រ្តីការបរទេសអង់គ្លេស កាលពីចន្ទ អំណាចរបស់លោកស្រីនាយករដ្ឋមន្រ្តីតេរេហ្សា ម៉េ កំពុងស្ថិតនៅក្នុងភាពផុយស្រួយ ហើយសម្រាប់សហភាពអឺរ៉ុប ក្តីបារម្ភដ៏ធំមួយកំពុងតែកើតមានឡើង ថាតើលោកស្រីអាចនឹងដឹកនាំការចរចា រហូតអាចចេញជាកិច្ចព្រមព្រៀង Brexit មួយបាន មុនកាលកំណត់ដែរឬក៏យ៉ាងណា?
ចុះផ្សាយនៅថ្ងៃ៖
ភ្លាមៗក្រោយពីមានការប្រកាសលាលែងពីតំណែងដោយរដ្ឋមន្រ្តីអង់គ្លេសទាំងពីររូប ថ្នាក់ដឹកនាំសហភាពអឺរ៉ុបបានថ្លែងជាសាធារណៈ ដោយព្យាយាមបង្ហាញពីសុទិដ្ឋនិយមថា បញ្ហានយោបាយនៅអង់គ្លេសនេះទំនងជានឹងមិនធ្វើឲ្យប៉ះពាល់ទៅដល់ដំណើរការចរចាលើកិច្ចព្រមព្រៀងបញ្ចប់សមាជិកភាពរបស់អង់គ្លេស ឬហៅថា Brexit នោះទេ។
ក៏ប៉ុន្តែ នៅខាងក្រោយឆាកវិញ មន្រ្តីការទូតសហភាពអឺរ៉ុប ដែលសុំមិនបញ្ចេញឈ្មោះមួយចំនួនបានបង្ហាញពីក្តីបារម្ភ ដោយមិនដឹងថាតើលោកស្រីតេរេហ្សា ម៉េ នឹងអាចបន្តកាន់តំណែងបានដល់ពេលណា? ហើយបើទោះបីជាអាចនៅកាន់តំណែងបានយូរតទៅទៀត តើលោកស្រីអាចនឹងមានអំណាចរឹងមាំត្រឹមកម្រិតណា ក្នុងការដឹកនាំការចរចាលើ Brexit ? បើសិនជាលោកស្រីតេរេហ្សា ម៉េ ត្រូវធ្លាក់ពីតំណែង តើរដ្ឋាភិបាលថ្មីនឹងមានជំហរបែបណា? នៅក្នុងពេលដែលរយៈកាលកំណត់ត្រូវចរចាបញ្ចប់សមាជិកភាពអង់គ្លេសពីសហភាពអឺរ៉ុប កាន់តែខិតមកកៀកណាស់ទៅហើយ គឺនៅត្រឹមដំណាច់ខែមីនា ឆ្នាំ២០១៩ខាងមុខ។
ទោះជាយ៉ាងណា សហភាពអឺរ៉ុបបានត្រឹមតែបារម្ភតែប៉ុណ្ណោះ តែក៏មិនអាចធ្វើអ្វីបាននោះដែរ ក្រៅតែពីឈរមើលពីក្រៅឆាក ទៅលើស្ថានការណ៍នយោបាយច្រួលច្របល់នៅទីក្រុងឡុងដ៍នៅពេលនេះ។
មន្រ្តីសហភាពអឺរ៉ុបដែលសុំមិនបញ្ចេញឈ្មោះ បានប្រាប់ទីភ្នាក់ងារព័ត៌មានអាអែហ្វប៉េថា សម្រាប់ភាគីសហភាពអឺរ៉ុប អ្វីៗនឹងនៅតែបន្តដំណើរការជាធម្មតា។ ការចរចាលើ Brexit ដែលដំណាក់កាលបន្ទាប់ត្រូវគេគ្រោងធ្វើ ចាប់ពីថ្ងៃទី១៦កក្កដាខាងមុខ នឹងនៅតែត្រូវធ្វើដូចការគ្រោងទុក មិនថាប្រមុខដឹកនាំចរចាខាងភាគីអង់គ្លេសជានរណានោះទេ។ លើសពីនេះទៅទៀត សហភាពអឺរ៉ុបនឹងនៅតែរក្សាជំហរដដែលនៅក្នុងការចរចា គឺនឹងមិនធ្វើសម្បទានណាមួយ ដើម្បីសម្របសម្រួលទៅតាមស្ថានភាពនយោបាយក្នុងស្រុករបស់អង់គ្លេសនោះទេ។
ក៏ប៉ុន្តែ សម្រាប់អ្នកជំនាញខាងកិច្ចការអឺរ៉ុប ប្រសិនបើស្ថានភាពនយោបាយអង់គ្លេសនៅតែច្រួលច្របល់ វាអាចនឹងធ្វើឲ្យដំណើរការចរចា Brexit ត្រូវយឺតយ៉ាវ ហើយរយៈកាលកំណត់ចុងក្រោយដែលត្រូវចរចាក៏កាន់តែជិតចូលមកដល់។ ដល់ពេលនោះ ឬមួយភាគីទាំងពីរត្រូវចរចាទាំងប្រញាប់ប្រញាល់ ហើយសម្រេចបានជាកិច្ចព្រមព្រៀងដែលមិនល្អ ឬក៏ត្រូវបណ្តោយឲ្យអង់គ្លេសបញ្ចប់សមាជិកភាពដោយគ្មានកិច្ចព្រមព្រៀងអ្វីទាំងអស់ ដែលកំណត់ពីទំនាក់ទំនងគ្នាក្រោយការចាកចេញ ដែលសេណារីយ៉ូទាំងពីរនេះ សុទ្ធតែជាសេណារីយ៉ូមិនល្អ សម្រាប់ភាគីទាំងសងខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ