សម្ព័ន្ធអារ៉ាប់គាំទ្រការផ្តួចផ្តើមគំនិតរបស់បារាំងក្នុងការដោះស្រាយជម្លោះអ៊ីស្រាអែល-ប៉ាឡេស្ទីន
បក្សសម្ព័ន្ធអារ៉ាប់បានអនុម័តសេចក្តីសម្រេចមួយ កាលពីថ្ងៃសៅរ៍ម្សិលមិញ បង្ហាញពីជំហរគាំទ្រការផ្តួចផ្តើមគំនិតរបស់បារាំង ក្នុងការរៀបចំសន្និសីទអន្តរជាតិ នៅទីក្រុងប៉ារីស ដើម្បីស្វែងរកដំណោះស្រាយបញ្ចប់ជម្លោះ រវាងអ៊ីស្រាអែល និងប៉ាឡេស្ទីន។ សន្និសីទអន្តរជាតិ ដែលត្រូវបានជំទាស់ដោយនាយករដ្ឋមន្រ្តីអ៊ីស្រាអែល បេនយ៉ាមីន នេតាន់យ៉ាហ៊ូ។
ចុះផ្សាយនៅថ្ងៃ៖
ស្តាប់ - ០២:១៣
សេចក្តីសម្រេចគាំទ្រគំនិតផ្តួចផ្តើមរបស់បារាំង ត្រូវបានបក្សសម្ព័ន្ធអារ៉ាប់អនុម័ត នៅក្នុងកិច្ចប្រជុំវិសាមញ្ញរដ្ឋមន្រ្តីការបរទេសរបស់ខ្លួន កាលពីថ្ងៃសៅរ៍ម្សិលមិញ នៅឯទីស្នាក់ការ ក្នុងទីក្រុងគែរ។ នៅក្នុងកិច្ចប្រជុំដែលមានការចូលរួមពីសំណាក់លោកប្រធានាធិបតីប៉ាឡេស្ទីន ម៉ះមូត អាបាស់ ផងដែរនោះ ប្រមុខការទូតនៃបក្សសម្ព័ន្ធអារ៉ាប់បានកំណត់ថា បក្សសម្ព័ន្ធអារ៉ាប់ ដែលមានប្រទេសអារ៉ាប់ចំនួន ២២ ជាសមាជិក គាំទ្រនូវគំនិតផ្តួចផ្តើមរបស់បារាំង ក៏ដូចជាកិច្ចខិតខំផ្សេងទៀតរបស់ប្រទេសអារ៉ាប់ និងសហគមន៍អន្តរជាតិ នៅក្នុងការចរចាស្វែងរកសន្តិភាព រវាងអ៊ីស្រាអែល និងប៉ាឡេស្ទីន។
គួរបញ្ជាក់ថា នៅក្នុងពេលបច្ចុប្បន្ននេះ បារាំងកំពុងតែខ្នះខ្នែងរៀបចំសន្និសីទអន្តរជាតិដ៏ធំមួយ នៅក្នុងអំឡុងខែតុលា ឬវិច្ឆិកាខាងមុខ ដើម្បីប្រមែរប្រមូលគ្រប់បណ្តាប្រទេស និងភាគីពាក់ព័ន្ធទាំងអស់ឲ្យមកជជែកគ្នា ស្វែងរកដំណោះស្រាយបញ្ចប់ជម្លោះដ៏រ៉ាំរ៉ៃ នៅតំបន់ដើមបូព៌ា។
ដើម្បីឈានទៅរៀបចំសន្និសីទអន្តរជាតិនេះ កិច្ចប្រជុំមួយនឹងត្រូវរៀបចំធ្វើឡើងនៅប៉ារីស នៅថ្ងៃទី៣ មិថុនា គឺថ្ងៃសុក្រសប្តាហ៍ក្រោយ ដោយមានការចូលរួមពីសំណាក់រដ្ឋមន្រ្តីការបរទេសប្រមាណជា ២០ប្រទេស រួមជាមួយនឹងអង្គការអន្តរជាតិធំៗមួយចំនួន ប៉ុន្តែ គ្មានវត្តមានអ៊ីស្រាអែល និងប៉ាឡេស្ទីន ដើម្បីបញ្ចៀសរាល់ការខ្វែងគំនិតគ្នា ដែលនាំឲ្យសន្និសីទត្រូវបរាជ័យមុនពេលបើក។
ក៏ប៉ុន្តែ បើទោះបីជាយ៉ាងនេះក៏ដោយ ការខ្វែងគំនិតគ្នាបានកើតមានឡើងយ៉ាងខ្លាំងរួចទៅហើយ ដោយគេឃើញថា ភាគីប៉ាឡេស្ទីន ហើយពីម្សិលមិញនេះទៀត បក្សសម្ព័ន្ធអារ៉ាប់ទាំងមូល ប្រកាសគាំទ្រការរៀបចំសន្និសីទអន្តរជាតិនេះ។ ផ្ទុយទៅវិញ អ៊ីស្រាអែលបានជំទាស់។
នៅក្នុងអំឡុងជំនួបជាមួយនាយករដ្ឋមន្រ្តីបារាំង ដែលបំពេញទស្សនកិច្ចនៅអ៊ីស្រាអែល និងប៉ាឡេស្ទីន កាលពីថ្ងៃអង្គារ និងថ្ងៃពុធ កន្លងទៅនេះ លោកនេតាន់យ៉ាហ៊ូ នាយករដ្ឋមន្រ្តីអ៊ីស្រាអែល បានប្រកាសថា អ៊ីស្រាអែលមិនចង់ឲ្យមានសន្និសីទជាអន្តរជាតិបែបនេះទេ ដោយស្នើឲ្យមានជំនួបចរចាមួយទល់នឹងមួយជាមួយនឹងប្រមុខដឹកនាំប៉ាឡេស្ទីនជាជំនួសវិញ។ ក៏ប៉ុន្តែ ប្រមុខដឹកនាំប៉ាឡេស្ទីនបានបដិសេធភ្លាមៗនឹងសំណើចរចាទ្វេភាគីរបស់អ៊ីស្រាអែល ដោយបានលើកឡើងថា លោកនេតាន់យ៉ាហ៊ូ លើកសំណើនេះឡើងគ្រាន់តែជាលេសដើម្បីពន្យារពេលតែប៉ុណ្ណោះ ដោយគ្មានឆន្ទៈពិតប្រាកដក្នុងការចរចារហូតបានជាកិច្ចព្រមព្រៀងសន្តិភាពនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ