ផ្ទុះសង្រ្គាមពាក្យសម្តីរវាងលោកដូណាល់ត្រាំនិងប្រធានតុលាការកំពូលអាមេរិក
សង្រ្គាមពាក្យសម្តីដ៏កម្របំផុតមួយបានកើតមានឡើង កាលពីថ្ងៃពុធម្សិលមិញ រវាងលោកប្រធានាធិបតី ដូណាល់ ត្រាំ និងប្រធានតុលាការកំពូលអាមេរិក។ ការបោះពាក្យសម្តីដាក់គ្នានេះបានកើតមានឡើង ក្រោយពីលោកដូណាល់ ត្រាំ បានធ្វើការរិះគន់ធ្ងន់ៗទៅលើចៅក្រមនៅសាលាឧទ្ធរណ៍ ដែលចេញសេចក្តីសម្រេចប្រឆាំងនឹងនយោបាយអន្តោប្រវេសន៍របស់លោក។
ចុះផ្សាយនៅថ្ងៃ៖
នេះមិនមែនជាលើកទី១ទេ ដែលលោកដូណាល់ ត្រាំ បរិហាររិះគន់ចៅក្រម ដែលកាត់ក្តីឲ្យលោក ឬរដ្ឋការរបស់លោកចាញ់។ ក៏ប៉ុន្តែ វាគឺជាលើកទី១ ដែលប្រធានតុលាការកំពូល ដែលជាអ្នកមានអំណាចខ្ពស់បំផុត នៅក្នុងស្ថាប័នតុលាការ ធ្វើការឆ្លើយតបជាសាធារណៈទៅនឹងការរិះគន់របស់លោកដូណាល់ ត្រាំ។
រឿងរ៉ាវចុងក្រោយ គឺកើតចេញពីសេចក្តីសម្រេចរបស់តុលាការឧទ្ធរណ៍ ដែលបានព្យួរជាបណ្តោះអាសន្ននូវបទបញ្ជារបស់លោកដូណាល់ ត្រាំ ដែលកំណត់ថាជនអន្តោប្រវេសន៍ដែលចូលដីអាមេរិកដោយខុសច្បាប់លែងអាចដាក់ពាក្យសុំសិទ្ធិជ្រកកោននយោបាយដូចកាលពីមុន។ នៅថ្ងៃអង្គារ លោកដូណាល់ ត្រាំ បានរិះគន់ចៅក្រមដោយពាក្យសម្តីខ្លាំង ដោយហៅសេចក្តីសម្រេចរបស់ចៅក្រមថាជា “រឿងដ៏គួរឲ្យអាម៉ាស់” ព្រមទាំងបានហៅចៅក្រមនៅសាលាឧទ្ធរណ៍នោះថាជា “ចៅក្រមរបស់លោកអូបាម៉ា”។
នៅថ្ងៃពុធ លោក ចន រ៉ូបឺតស៍ (John Roberts) ប្រធានតុលាការកំពូល ដែលត្រូវបានតែងតាំងឡើងដោយលោកប្រធានាធិបតី ចច ដាបិលយូ ប៊ូស ដែលមកពីគណបក្សសាធារណរដ្ឋដូចលោកដូណាល់ ត្រាំ ដែរនោះ បានឆ្លើយតបទៅវិញថា តុលាការគឺជាស្ថាប័ន “ឯករាជ្យ” ហើយថា នៅក្នុងស្ថាប័នតុលាការនេះ “គ្មានទេចៅក្រមរបស់លោកអូបាម៉ា ចៅក្រមរបស់លោកត្រាំ ចៅក្រមរបស់លោកប៊ូស ឬក៏ចៅក្រមរបស់លោកគ្លីនតុន” គឺមានតែចៅក្រមដែលប្រកាន់យ៉ាងខ្ជាប់ខ្ជួននូវវិជ្ជាជីវៈរបស់ខ្លួន ក្នុងការផ្តល់ជូននូវយុត្តិធម៌ “ដោយស្មើភាពគ្នា” ចំពោះរាល់អ្នកណាដែលយកសំណុំរឿងមកឲ្យតុលាការវិនិច្ឆ័យ។
ក៏ប៉ុន្តែ លោកដូណាល់ ត្រាំ ទៅតាមទម្លាប់ដែលគេធ្លាប់ឃើញស្ទើរតែស៊ាំទៅហើយក្នុងរយៈពេលជិត២ឆ្នាំកន្លងទៅនេះ បានធ្វើការវាយបកភ្លាមៗទៅលើប្រធានតុលាការកំពូលវិញ ដោយលើកឡើងថា នៅក្នុងស្ថាប័នតុលាការ “ពិតជាមានចៅក្រមរបស់លោកអូបាម៉ា” ហើយថា សេចក្តីសម្រេចរបស់ចៅក្រមអស់ទាំងនោះ គឺជា “សេចក្តីសម្រេចប្រកបដោយគ្រោះថ្នាក់” ហើយ “ធ្វើឲ្យប៉ះពាល់ដល់សុវត្ថិភាពរបស់ប្រទេសជាតិ”។
Sorry Chief Justice John Roberts, but you do indeed have “Obama judges,” and they have a much different point of view than the people who are charged with the safety of our country. It would be great if the 9th Circuit was indeed an “independent judiciary,” but if it is why......
Donald J. Trump (@realDonaldTrump) November 21, 2018
.....are so many opposing view (on Border and Safety) cases filed there, and why are a vast number of those cases overturned. Please study the numbers, they are shocking. We need protection and security - these rulings are making our country unsafe! Very dangerous and unwise!
Donald J. Trump (@realDonaldTrump) November 21, 2018
នៅអាមេរិក ការបោះពាក្យសម្តីដាក់គ្នា រវាងប្រមុខដឹកនាំនីតិប្រតិបត្តិ និងប្រមុខដឹកនាំអំណាចតុលាការ គឺជារឿងដ៏កម្របំផុតមួយ ហើយនៅក្នុងករណីលោកដូណាល់ ត្រាំ នេះគឺជាលើកដំបូងបង្អស់ ដែលប្រធានតុលាការកំពូលឆ្លើយតបជាសាធារណៈចំពោះការរិះគន់របស់ប្រធានាធិបតី ទៅលើស្ថាប័នតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ