ក្រោយចេញរបាយការណ៍ស៊ើបអង្កេតតើគេអាចដឹងអ្វីខ្លះពីករណីបាត់យន្តហោះម៉ាឡេស៊ី MH370?
ចុះផ្សាយនៅថ្ងៃ៖
អស់រយៈពេលជាង៤ឆ្នាំមកហើយ ដែលយន្តហោះម៉ាឡេស៊ី ជើងហោះហើរ MH370 បានបាត់សម្រោលសូន្យឈឹង។ ក្រោយពីបានធ្វើការស៊ើបអង្កេត និងស្វះស្វែងរកបំណែកយន្តហោះអស់រយៈពេលជាង៤ឆ្នាំ ក្រុមស៊ើបអង្កេតដឹកនាំដោយម៉ាឡេស៊ី បានចេញផ្សាយជាសាធារណៈនូវរបាយការណ៍ស៊ើបអង្កេតផ្លូវការរបស់ខ្លួន កាលពីថ្ងៃចន្ទ ៣០កក្កដា។ តើគិតមកទល់នឹងពេលនេះ គេអាចដឹងបានអ្វីខ្លះ ពីករណីបាត់យន្តហោះនេះ?
ករណីបាត់យន្តហោះម៉ាឡេស៊ី ជើងហោះហើរលេខ ៣៧០ ត្រូវបានគេចាត់ទុកថាជាអាថ៌កំបាំងដ៏ធំបំផុតមួយ នៅក្នុងប្រវត្តិនៃអាកាសចរណ៍ស៊ីវិល ពីព្រោះថា រហូតមកទល់នឹងពេលនេះ បើទោះបីជាក្រោយការចេញរបាយការណ៍ស៊ើបអង្កេតជាផ្លូវការហើយក៏ដោយ អ្វីដែលគេអាចដឹងបានប្រាកដច្បាស់ដោយមានតួលេខ និងភស្តុតាងបញ្ជាក់ច្បាស់លាស់ គឺមានតិចតួចបំផុត ចំណែកឯអ្វីក្រៅពីនេះ គឺគ្រាន់តែជាសម្មតិកម្មតែប៉ុណ្ណោះ ក្នុងពេលដែលទីតាំងនៃតួយន្តហោះនៅទីណាពិតប្រាកដ ក៏គេនៅតែមិនអាចកំណត់បាននៅឡើយ។
គេអាចដឹងបានថា យន្តហោះម៉ាឡេស៊ី ជើងហោះហើរលេខ ៣៧០នេះ ផ្ទុកមនុស្ស ២៣៩នាក់ បានហោះចេញពីទីក្រុងគូឡាឡាំពួរប្រទេសម៉ាឡេស៊ី នៅម៉ោង ១២និង៤១នាទី រំលងអធ្រាតឈានចូលថ្ងៃទី៨ ខែមីនា ឆ្នាំ២០១៤ សំដៅទៅកាន់ទីក្រុងប៉េកាំងប្រទេសចិន។
ក្រោយពីហោះចេញពីព្រលានយន្តហោះបានប្រមាណជា ៤០នាទី ហើយហោះទៅដល់តំបន់សមុទ្រស្ថិតនៅចន្លោះពីប្រទេសម៉ាឡេស៊ី និងប្រទេសវៀតណាម យន្តហោះក៏បានបាត់ការទាក់ទងជាមួយនឹងអ្នកត្រួតពិនិត្យជើងហោះហើរ ដោយអ្នកបើកបរយន្តហោះក៏មិនអាចទាក់ទងបាន ចំណែក Transponder ដែលជាឧបករណ៍សម្រាប់បង្ហាញពីអត្តសញ្ញាណ និងទិន្នន័យហោះហើររបស់យន្តហោះក៏ត្រូវបិទលែងដំណើរការ។
គេមិនដឹងទេថាតើ Transponder នេះលែងដំណើរការដោយសារតែបញ្ហាបច្ចេកទេស ឬក៏ត្រូវអ្នកណាបិទ? អ្វីដែលគេអាចដឹងបាន គឺនៅក្រោយពេលដែល Transponder នេះលែងដំណើរការ អ្នកត្រួតពិនិត្យជើងហោះហើរលែងអាចកំណត់បានទៀតហើយអំពីទីតាំង រយៈកម្ពស់ ល្បឿន និងទិសដៅហោះហើររបស់យន្តហោះ។ ទោះជាយ៉ាងណា យន្តហោះនេះនៅតែបន្តស្ថិតក្នុង រ៉ាដាយោធារបស់ថៃ និងម៉ាឡេស៊ី ដែលជាប្រព័ន្ធរ៉ាដាទំនើបជាងរ៉ាដាស៊ីវិល។
តាមរយៈរ៉ាដាយោធានេះ គេអាចកំណត់បានថា ក្រោយពីបាត់ពីរ៉ាដាស៊ីវិល យន្តហោះម៉ាឡេស៊ី ៣៧០នេះ បានបត់ក្បាលសំដៅទៅប្រទេសម៉ាឡេស៊ីវិញ ក៏ប៉ុន្តែ មិនហោះទៅកាន់ទីក្រុងគូឡាឡាំពួរនោះទេ តែបានបត់ស្តាំ ហើយហោះទៅទិសខាងលិច សំដៅទៅកាន់មហាសមុទ្រឥណ្ឌា មុននឹងត្រូវបាត់ខ្លួនទាំងស្រុងពីរ៉ាដាយោធា នៅត្រង់ច្រកសមុទ្រម៉ាឡាកា ស្ថិតនៅចន្លោះប្រទេសម៉ាឡេស៊ី និងឥណ្ឌូណេស៊ី។
ចាប់តាំងពីពេលនោះមក គេលែងអាចកំណត់បានទៀតហើយថា តើយន្តហោះនេះហោះសំដៅទៅទិសដៅណាពិតប្រាកដ។ ក៏ប៉ុន្តែ ទោះជាយ៉ាងណា គេនៅតែអាចដឹងថា យន្តហោះនេះមិនទាន់ធ្លាក់នៅឡើយទេ គឺនៅតែបន្តហោះហើរជាច្រើនម៉ោងក្រោយពីបាត់ពីរ៉ាដាយោធា។ គេអាចដឹងដូចនេះបាន គឺដោយសារតែប្រព័ន្ធបញ្ជូនសញ្ញាដោយស្វ័យប្រវត្តិ នៅតែបន្តបញ្ជូនសញ្ញា និងទិន្នន័យទាក់ទងនឹងដំណើរការរបស់យន្តហោះទៅឲ្យប្រព័ន្ធផ្កាយរណប។ រហូតទាល់តែដល់ម៉ោង ៨និង១៩នាទីព្រឹក ពោលគឺ ជាង ៧ម៉ោង ក្រោយពីបានហោះចេញពីគូឡាឡាំពួរ និងជិត ៦ម៉ោង ក្រោយពីបាត់ពីរ៉ាដាយោធា ទើបប្រព័ន្ធបញ្ជូនសញ្ញាដោយស្វ័យប្រវត្តិរបស់យន្តហោះនេះ បានបញ្ជូនសញ្ញាជាលើកចុងក្រោយទៅកាន់ប្រព័ន្ធផ្កាយរណប ហើយដែលគេសន្និដ្ឋានថាជាសញ្ញាចុងក្រោយ មុននឹងយន្តហោះអស់សាំង ហើយម៉ាស៊ីនយន្តហោះលែងដំណើរការទាំងស្រុង។
រហូតមកទល់នឹងពេលនេះ គេនៅតែមិនអាចដឹងឲ្យប្រាកដ ១០០% នៅឡើយទេថា តើនៅក្នុងរយៈពេល ៦ម៉ោង ក្រោយពីបាត់ខ្លួនទាំងស្រុងពីរ៉ាដាយោធា យន្តហោះម៉ាឡេស៊ី ៣៧០នេះ ហោះទៅទិសណាពិតប្រាកដ។ ប្រព័ន្ធបញ្ជូនសញ្ញាដោយស្វ័យប្រវត្តិរវាងយន្តហោះ និងផ្កាយរណប បញ្ជូនតែទិន្នន័យទាក់ទងនឹងដំណើរការទូទៅរបស់យន្តហោះតែប៉ុណ្ណោះ ដោយមិនមានបញ្ជូនទិន្នន័យទាក់ទងនឹងទីតាំងរបស់យន្តហោះនោះទេ។
ក៏ប៉ុន្តែ អ្នកជំនាញរបស់ក្រុមហ៊ុនផ្កាយរណបអង់គ្លេស (Imarsat) បានធ្វើការវិភាគទៅលើទិន្នន័យផ្កាយរណប ហើយបានសន្និដ្ឋានថា ក្រោយពីបាត់ពីរ៉ាដាយោធា យន្តហោះម៉ាឡេស៊ី ៣៧០ ហោះសំដៅទៅកាន់មហាសមុទ្រឥណ្ឌាប៉ែកខាងត្បូង ហើយទំនងជាត្រូវធ្លាក់ទៅក្នុងសមុទ្រ ខាងកើតប្រទេសអូស្រ្តាលី។ នៅតំបន់នោះហើយ ដែលអាជ្ញាធរម៉ាឡេស៊ី និងអូស្រ្តាលី បានបើកប្រតិបត្តិការរុករកបំណែកយន្តហោះ ក៏ប៉ុន្តែ រកមិនឃើញរហូតមកទល់នឹងសព្វថ្ងៃនេះ។
ទោះជាយ៉ាងណា បំណែកយន្តហោះចំនួន ៣ ដែលគេអាចកំណត់បានយ៉ាងច្បាស់លាស់ថាជាបំណែកពីយន្តហោះម៉ាឡេស៊ី ៣៧០នេះ ត្រូវបានគេរកឃើញ ក្នុងចន្លោះពីឆ្នាំ២០១៥ និងឆ្នាំ២០១៦ ពោលគឺ ពី១ឆ្នាំទៅ២ឆ្នាំក្រោយពីយន្តហោះបាត់ ហើយបំណែកអស់ទាំងនេះត្រូវបានគេរកឃើញនៅខាងទ្វីបអាហ្វ្រិក ពោលគឺ នៅប៉ែកខាងម្ខាងទៀតនៃមហាសមុទ្រឥណ្ឌា។
ការរកឃើញបំណែកយន្តហោះនេះ អាចឲ្យគេសន្និដ្ឋានបានកាន់តែច្បាស់ថា យន្តហោះនេះបានធ្លាក់ទៅក្នុងសមុទ្រ ក៏ប៉ុន្តែ សួរថាតើធ្លាក់នៅទីណា ហើយដោយសារតែមូលហេតុអ្វី គេនៅតែមិនទាន់អាចដឹងបាននៅឡើយ។ សូម្បីតែរបាយការណ៍ស៊ើបអង្កេតផ្លូវការ ដែលចេញផ្សាយ កាលពីថ្ងៃចន្ទនេះ ក៏មិនអាចកំណត់បាននៅឡើយដែរ អំពីមូលហេតុដែលនាំទៅដល់ការបាត់យន្តហោះដ៏អាថ៌កំបាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ