ម៉ាឡេស៊ីថានឹងបន្តស្វែងរកយន្តហោះ MH370 ប្រសិនបើមានសំណើសុំច្បាស់លាស់
នៅថ្ងៃអាទិត្យ ទី៣ មីនា រដ្ឋមន្រ្តីក្រសួងដឹកជញ្ជូនម៉ាឡេស៊ីបាននិយាយថា រដ្ឋាភិបាលបើកផ្លូវឲ្យមានការស្វែងរកយន្តហោះ MH370 សាជាថ្មីម្តងទៀត ក្នុងករណីដែលក្រុមហ៊ុនជំនាញខាងរុករកដាក់សំណើសុំមួយ ប្រកបដោយភាពគួរឲ្យជឿទុកចិត្តបាន។ ការលើកឡើងរបស់មន្ត្រីរដ្ឋាភិបាលម៉ាឡេស៊ីនេះ ធ្វើឡើងនៅឯពិធីរំឭកខួបប្រាំឆ្នាំ នៃការបាត់យន្តហោះ MH370 នៅក្នុងទីក្រុងគូឡាឡាំពួ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
មនុស្សរាប់រយនាក់ បូករួមទាំងសាច់ញាតិមួយចំនួនរបស់ជនរងគ្រោះ ដែលជាអ្នកដំណើរនៅលើយន្តហោះ MH370 ផងបានមកប្រមូលផ្តុំគ្នា នៅឯផ្សារទំនើបមួយក្នុងទីក្រុងគូឡាឡាំពួ នៅថ្ងៃអាទិត្យ ទី៣ មីនា ដើម្បីរំឭកខួបនៃការបាត់យន្តហោះនេះ។
ទោះបីជាបាត់ខ្លួនទៅអស់រយៈពេល៥ ឆ្នាំកន្លងមកហើយក្តី ក៏រហូតមកទល់នឹងបច្ចុប្បន្ននេះ អាជ្ញាធរម៉ាឡេស៊ីនៅមិនទាន់អាចប្រាប់នៅឡើយពីមូលហេតុជាក់លាក់ ដែលនាំឲ្យយន្តហោះម៉ាឡេស៊ីមួយនេះបាត់ខ្លួន។ លើសពីនេះទៅទៀត សូម្បីតែសាកសពរបស់យន្តហោះ MH370 ក៏គេនៅមិនបានទាន់ស្វែងរកឃើញដែរ។
គួររំឭកជូនថា យន្តហោះម៉ាឡេស៊ី MH370 បានបាត់ខ្លួនយ៉ាងសម្ងាត់ទៅ កាលពីខែមីនា ឆ្នាំ២០១៤ ដោយបាននាំយកទៅជាមួយផងដែរនូវអ្នកដំណើរចំនួន ២៣៩ នាក់ ដែលភាគច្រើនជាជនជាតិចិន និងធ្វើដំណើរចេញពីទីក្រុងគូឡាឡាពួ ទៅកាន់ទីក្រុងប៉េកាំង។
ក្រោយហេតុការណ៍នេះភ្លាម អាជ្ញាធរម៉ាឡេស៊ី បានខិតខំប្រឹងប្រែងស្វះស្វែងរក យន្តហោះ MH370 ដែរ តែនៅតែមិនអាចរកឃើញ។ គ្មានសញ្ញា ឬពន្លឺអ្វី ត្រូវបានក្រុមអ្នកស្វែងរកអូស្ត្រាលី រកឃើញនៅក្នុងដែនស្រាវជ្រាវ នៅឯមហាសមុទ្រឥណ្ឌាក្នុងទំហំ ១២ ម៉ឺនគីឡូម៉ែត្រការ៉េឡើយ។ ទំហំនៃការស្រាវជ្រាវ ដឹកនាំដោយអ្នកជំនាញអូស្ត្រាលីនេះ គឺជាការរុករកក្នុងទំហំដ៏ធំជាងគេបំផុតមួយ ក្នុងប្រវត្តិសាស្ត្រអាកាសចរណ៍ ហើយប្រតិបត្តិការនេះត្រូវបានផ្អាកនៅខែមករា ឆ្នាំ ២០១៧។
បន្ទាប់មកទៀត ក្រុមហ៊ុនរុករករបស់អាមេរិកឈ្មោះ Ocean Infinity កាលពីឆ្នាំទៅមិញ បានចាប់ផ្តើមប្រតិបត្តិការ ស្វែងរកយន្តហោះ MH370 សាជាថ្មី ដោយប្រើយន្តហោះគ្មានមនុស្សបើក ទៅរុករកដល់បាតសមុទ្រ ប៉ុន្តែនៅតែមិនអាចរកឃើញយន្តហោះនោះទៀត។ ក្នុងរយៈពេល៥ ឆ្នាំ កន្លងមកនេះ មានតែបំណែកមួយចំនួននៃយន្តហោះ MH370 ប៉ុណ្ណោះ ត្រូវបានរកឃើញ នៅលើឆ្នេរមហាសមុទ្រឥណ្ឌាភាគខាងលិច ហើយបំណែកចំនួនពីរ ត្រូវបានគេដាក់បង្ហាញជាលើកដំបូងនៅស្តូបអនុស្សាវរីយ៍នៅថ្ងៃអាទិត្យ ទី៣ មីនា ឆ្នាំ២០១៩។
ទាក់ទងរឿងនេះដែរ រដ្ឋមន្រ្តីដឹកជញ្ជូនម៉ាឡេស៊ី បាននិយាយនៅក្នុងពិធីរំឭកខួបប្រាំឆ្នាំ នៃការបាត់យន្តហោះ MH370 ថា រដ្ឋាភិបាលមិនមានគម្រោងធ្វើការស្វែងរកថ្មីទៀតនោះទេ តែថារដ្ឋាភិបាលបើកចំហរចំពោះសំណើសុំ ដើម្បីរុករកយន្តហោះនេះ។ លោកបានបញ្ជាក់បន្ថែមថា ប្រសិនណាបើមានអ្នកដាក់សំណើគួរឲ្យជឿទុកចិត្តបាន ឬក៏មានសំណើណាមួយជាពិសេសពីក្រុមហ៊ុនអាមេរិក Ocean Infinity រដ្ឋាភិបាលម៉ាឡេស៊ី នឹងពិចារណាលើការស្នើសុំនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ