អគ្គនាយិកា RFI ត្រូវអស់តំណែងដោយសារតែកំហុសនីតិវិធីរដ្ឋបាល
បុគ្គលិករបស់វិទ្យុបារាំងអន្តរជាតិ (RFI) ក៏ដូចជាស្ថាប័នព័ត៌មាន “ហ្វ្រង់មេឌីយ៉ាម៉ុង” (France Médias Monde) ទាំងមូល មានការភ្ញាក់ផ្អើលយ៉ាងខ្លាំង នៅថ្ងៃពុធនេះ ក្រោយពីទទួលដំណឹងថា អគ្គនាយិការបស់ខ្លួន គឺលោកស្រី ម៉ារីគ្រីស្ទីន សារ៉ាហ្គោស (Marie-Christine Saragosse) ត្រូវអស់តំណែង ដោយសារតែមានបញ្ហាក្នុងបែបបទរដ្ឋបាល។ មូលហេតុ គឺដោយសារតែលោកស្រីមិនបានបំពេញបែបបទប្រកាសទ្រព្យសម្បត្តិមុនកាលកំណត់។
ចុះផ្សាយនៅថ្ងៃ៖
ព័ត៌មានស្តីពីមោឃភាពនៃអាណត្តិរបស់លោកស្រីម៉ារីគ្រីស្ទីន សារ៉ាហ្គោស ត្រូវបានលោកស្រីប្រកាសឲ្យដឹងដោយខ្លួនឯងផ្ទាល់ តាមរយៈអ៊ីមែលផ្ញើទៅកាន់បុគ្គលិក នៅម៉ោង ១០ និង៣៤នាទីយប់ថ្ងៃអង្គារម្សិលមិញ។ នៅក្នុងអ៊ីមែលនេះ លោកស្រីបានលើកឡើងថា លោកស្រីក៏ “ភ្ញាក់ផ្អើល និងស្រឡាំងកាំង” ផងដែរ នៅពេលដឹងពីមោឃភាពនេះ។
លោកស្រីបានធ្វើការពន្យល់ថា លោកស្រីខកខានមិនបានបំពេញបែបបទប្រកាសទ្រព្យសម្បត្តិ មុនថ្ងៃទី៥ធ្នូ ឆ្នាំ២០១៧ ទៅតាមការកំណត់ដោយច្បាប់ ក្រោយពីតំណែងរបស់លោកស្រី ជាអគ្គនាយិកាហ្វ្រង់មេឌីយ៉ាម៉ុង (ស្ថាប័នព័ត៌មានរដ្ឋបារាំង គ្រប់គ្រងទាំងវិទ្យុបារាំងអន្តរជាតិ RFI និងទាំងទូរទស្សន៍ France 24) ត្រូវបានបន្តមួយអាណត្តិទៀត សម្រាប់រយៈពេល ៥ឆ្នាំ។ ក៏ប៉ុន្តែលោកស្រីអះអាងថា ការខកខាននេះ គ្រាន់តែជាកំហុសអចេតនាតែប៉ុណ្ណោះ។
លោកស្រីសារ៉ាហ្គោសបានបកស្រាយថា ចាប់តាំងពីលោកស្រីឡើងកាន់តំណែងនៅឆ្នាំ២០១២មក លោកស្រីធ្លាប់បានបំពេញបែបបទប្រកាសទ្រព្យសម្បត្តិនេះពីរលើករួចមកហើយ ដោយរាល់លើក គឺខាងស្ថាប័នពាក់ព័ន្ធជាអ្នកផ្ញើសំណុំបែបបទមកឲ្យលោកស្រីបំពេញ មុននឹងផ្ញើត្រឡប់ទៅវិញ។ ក៏ប៉ុន្តែ នីតិវិធីរដ្ឋបាលនេះទើបនឹងត្រូវបានកែប្រែថ្មី ពោលគឺ លែងមានការផ្ញើសំណុំបែបបទពីខាងអាជ្ញាធរដូចមុនទៀតហើយ ដោយសាមីខ្លួនត្រូវផ្តួចផ្តើមគំនិតធ្វើដោយខ្លួនឯង តាមរយៈបែបបទប្រកាសទ្រព្យសម្បត្តិ ដែលមាននៅលើវិបសៃត៍។
លោកស្រីសារ៉ាហ្គោសបានអះអាងនៅក្នុងអ៊ីមែលផ្ញើទៅកាន់បុគ្គលិកថា លោកស្រី "មិនបានដឹង" ពីការកែប្រែនីតិវិធីនេះ ហើយចេះតែចាំសំណុំបែបបទពីអាជ្ញាធរ រហូតដល់ផុតថ្ងៃកំណត់ ទើបធ្វើឲ្យការតែងតាំងលោកស្រី កាលពីថ្ងៃទី៥តុលាត្រូវអស់សុពលភាពដោយស្វ័យប្រវត្តិ។
ទោះជាយ៉ាងណា នេះគឺជារឿងដែលមិនធ្លាប់មាន ហើយក្រុមប្រឹក្សាភិបាលរបស់ហ្វ្រង់មេឌីយ៉ាម៉ុងត្រូវកោះប្រជុំវិសាមញ្ញនិងបន្ទាន់មួយ នៅថ្ងៃពុធនេះ ដើម្បីជជែកអំពីការគ្រប់គ្រងស្ថាប័នជាបណ្តោះអាសន្ន ក្នុងពេលរង់ចាំការតែងតាំងអគ្គនាយកថ្មី។ ជាគោលការណ៍ លោកស្រីម៉ារីគ្រីស្ទីន សារ៉ាហ្គោស អាចនឹងឈរឈ្មោះជាបេក្ខនារី ហើយអាចនឹងទទួលការតែងតាំងសាជាថ្មី ក៏ប៉ុន្តែ នីតិវិធីនៃការតែងតាំងនេះនឹងត្រូវចាប់ផ្តើមពីចំណុចសូន្យឡើងវិញ ហើយដែលអាចនឹងត្រូវចំណាយពេលរហូតដល់ទៅរាប់ខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ