ចំនួនប្រជាជនចិននឹងកើនឡើងដល់ជាង១ពាន់៤រយលាននាក់នៅឆ្នាំ២០២០
យោងតាមការព្យាកររបស់អាជ្ញាធរចិន ក្រោយពីបានលុបចោលនយោបាយកម្រិតឲ្យគ្រួសារមួយមានកូនតែម្នាក់ ចំនួនប្រជាជនចិននឹងមានកំណើនលឿនជាងមុន ហើយនៅឆ្នាំ២០២០ខាងមុខនេះ ចំនួនប្រជាជនសរុបរបស់ចិន ដែលកំពុងតែមានចំនួនច្រើនស្រាប់ នឹងត្រូវកើនឡើងរហូតដល់ទៅជាង ១ពាន់៤រយលាននាក់។
ចុះផ្សាយនៅថ្ងៃ៖
ស្តាប់ - ០១:៥១
ផែនការ៥ឆ្នាំ ដែលរដ្ឋាភិបាលចិនដាក់ជូនសភាពិនិត្យនិងអនុម័តនៅថ្ងៃសៅរ៍នេះ ព្យាករថានៅក្នុងរយៈពេល ៥ឆ្នាំខាងមុខនេះ ចិននឹងមានប្រជាជនថ្មីបន្ថែម រហូតដល់ទៅ ៤៥លាននាក់ ពោលគឺស្មើនឹងប្រជាជនសរុបរបស់អេស្ប៉ាញទាំងមូល ឬស្មើនឹង ៣ដងនៃចំនួនប្រជាជនសរុបរបស់កម្ពុជា។ កំណើនប្រជាជន ៤៥លាននាក់នេះ គឺជាអត្រាកំណើនដ៏ខ្ពស់ធៀបនឹងរយៈពេល៥ឆ្នាំកន្លងទៅ ដែលប្រជាជនមានកំណើនតែ ៣៣លាននាក់។
ការកើនឡើងនៃអត្រាកំណើនប្រជាជននេះ គឺដោយសារតែចិនបានសម្រេចបោះបង់ចោលនយោបាយកម្រិតឲ្យគ្រួសារមួយមានកូនតែមួយ ក្នុងគោលដៅស្តារឡើងវិញនូវភាពចំណាស់នៃប្រជាសាស្រ្តរបស់ចិន ពោលគឺចំនួនប្រជាជនដែលមានវ័យចំណាស់ធ្វើការលែងកើតមានចំនួនកើនឡើង ចំណែកឯចំនួនប្រជាជនពេញវ័យធ្វើការចេះតែបន្តថយចុះឥតឈប់ឈរ ចាប់តាំងពីឆ្នាំ២០១២មក។
យោងតាមតួលេខផ្លូវការរបស់រដ្ឋាភិបាលចិន គិតត្រឹមចុងឆ្នាំ២០១៤កន្លងទៅនេះ ប្រជាជនចិនដែលមានអាយុលើសពី ៦០ឆ្នាំ ដែលជាវ័យចំណាស់ធ្វើការលែងកើត មានចំនួនរហូតដល់ទៅ ២១២លាននាក់។
នៅក្នុងផែនការ៥ឆ្នាំ ដែលដាក់ជូនទៅរដ្ឋសភាអនុម័តនៅពេលនេះ រដ្ឋាភិបាលរបស់លោកលី ខឺឈាំង បានគូសបញ្ជាក់ថា ការលុបចោលនយោបាយ “គ្រួសារមួយកូនម្នាក់” អាចធ្វើឲ្យកំណើនប្រជាជនកើនឡើងលឿន រហូតដល់ទៅ ៤៥លាននាក់ ក្នុងរយៈពេល ៥ឆ្នាំក៏ពិតមែន ក៏ប៉ុន្តែ នេះមិនទាន់គ្រប់គ្រាន់អាចដោះស្រាយបញ្ហាចាស់រេចរឹលនៃប្រជាសាស្រ្តរបស់ចិនបាននៅឡើយទេ។
តាមការពិត គេបានសង្កេតឃើញជាទូទៅថា នៅក្នុងពេលបច្ចុប្បន្ននេះ នៅពេលដែលរដ្ឋាភិបាលអនុញ្ញាតឲ្យគ្រួសារមួយមានកូនដល់ទៅ២នាក់ ក៏ប៉ុន្តែ មានគ្រួសារជាច្រើនបែរជាមិនសូវចង់មានកូនទៅវិញ ជាពិសេស អ្នកនៅដែលរស់នៅតាមទីក្រុង ដោយពួកគេលើកឡើងអំពីការចំណាយនៅក្នុងការចិញ្ចឹមកូន ដែលចេះតែកើនឡើងខ្ពស់ពីមួយថ្ងៃទៅមួយថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ