ឥណ្ឌា និងប៉ាគីស្ថានបន្តបាញ់ផ្លោងដាក់គ្នាខ្លាំងក្លានៅក្បែរតំបន់ព្រំដែនកាស្មៀរ
ភាពតានតឹងរវាងប្រទេសឥណ្ឌា និងប៉ាគីស្ថាន បានផ្ទុះឡើងយ៉ាងខ្លាំងសាជាថ្មីទៀត កាលពីថ្ងៃសៅរ៍ ទី២ មីនា ម្សិលមិញនេះ ដោយសារតែកងទ័ពរបស់ប្រទេសទាំងពីរ បាញ់ផ្លោងគ្រាប់កាំភ្លើងធំដាក់គ្នាទៅវិញទៅមក។ ការប៉ះទង្គិចគ្នាថ្មីនេះ បានសម្លាប់ប្រជាជនរបស់ប្រទេសទាំងពីរដែលរស់នៅក្បែរព្រំប្រទល់ដែនតំបន់កាស្មៀរ យ៉ាងហោចណាស់ក៏ចំនួនប្រាំពីរនាក់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
គេរំពឹងទុកថា ក្រោយប៉ាគីស្ថានដោះលែង អ្នកបើកយន្តហោះចម្បាំងរបស់ឥណ្ឌា ទំនាក់ទំនងរវាងប្រទេសទាំងពីរ នឹងវិលមករកភាពធូរស្រាលបានខ្លះ។ ប៉ុន្តែអ្វីៗ ខុសពីការស្មានទុកទាំងស្រុង ភាពតានតឹងរវាងប្រទេសមហាអំណាចនុយក្លេអ៊ែរទាំងពីរ នៅតែបន្តកើតមាន និងកាន់តែធ្ងន់ធ្ងរជាមុនបន្ថែមទៀត។
ជាក់ស្តែង កងទ័ពរបស់ប្រទេសឥណ្ឌា និងប៉ាគីស្ថាន បានបន្តបាញ់ផ្លោងគ្រាប់គាំភ្លើងត្បាល់ដាក់គ្នា ពេញមួយថ្ងៃសៅរ៍ ទី២ មីនាម្សិលមិញនេះ និងបណ្តាលឲ្យប្រជាជនទាំងសងខាងស្លាប់។
បើតាមអាជ្ញាធរប៉ាគីស្ថាន ការប៉ះទង្គិចគ្នាខាងលើនេះ បានបណ្តាលឲ្យទាហានរបស់ខ្លួនពីរនាក់ស្លាប់ និងជនស៊ីវិលប៉ាគីស្ថានពីរផ្សេងទៀតស្លាប់ផងដែរ។ រីឯនៅខាងឥណ្ឌាវិញ មានមនុស្សបីនាក់ស្លាប់ ដែលក្នុងនោះមានស្ត្រីម្នាក់ និងកូនៗរបស់គាត់ចំនួនពីរនាក់។
គួរជម្រាបជូនថា ការផ្ទុះអាវុធដាក់គ្នាកាលពីថ្ងៃសៅរ៍ម្សិលមិញ រវាងប្រទេសបងប្អូនដែលជាគូសត្រូវនឹងគ្នា ពោលគឺឥណ្ឌា និងប៉ាគីស្ថាន កើតឡើងដោយសារតែឥណ្ឌាខឹងប៉ាគីស្ថាន ទាក់ទងនឹងរឿងដោះលែងអ្នកបើកយន្តហោះរបស់ខ្លួន កាលពីយប់ថ្ងៃសុក្រសប្តាហ៍នេះ។
សម្រាប់ឥណ្ឌា ការដោះលែងនេះមិនមែនចេញពីចិត្ត និងដើម្បីស្តារទំនាក់ទំនងរវាងប្រទេសទាំងពីរឡើយ។ បើតាមសារព័ត៌មានឥណ្ឌា មុនត្រូវដោះលែង អ្នកបើកយន្តហោះចម្បាំងឥណ្ឌា ត្រូវប៉ូលិសប៉ាគីស្ថានបង្ខំឲ្យនិយាយនៅក្នុងវីដេអូមួយ ដោយឲ្យលោកលើកសរសើរពីកងកម្លាំងរបស់ប៉ាគីស្ថាន និងបន្ទោសបង្អាប់បណ្តាញសារព័ត៌មានរបស់ឥណ្ឌា។
ការណ៍នេះ បានជំរុញឲ្យប្រជាជន និងរដ្ឋាភិបាលឥណ្ឌាផ្ទុះកំហឹងជាខ្លាំង។ បន្ទាប់មក ការប៉ះទង្គិច តាមរយៈការបាញ់កាំភ្លើងធំដាក់គ្នារវាងឥណ្ឌា និងប៉ាគីស្ថានក៏បានផ្ទុះឡើងយ៉ាងខ្លាំងក្លាតែម្តងនាម្សិលមិញនេះ។
គួរជ្រាបដែរថា រហូតមកដល់ពេលនេះ មានមនុស្សស្លាប់ចំនួន១២នាក់ហើយ នៅក្បែរតំបន់ព្រំដែនកាស្មៀរ ដោយសារតែការបាញ់ផ្លោងដាក់គ្នាទៅវិញទៅមករបស់ឥណ្ឌា និងប៉ាគីស្ថាន រាប់ចាប់តាំងពីដើមសប្តាហ៍នេះមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ