មនុស្ស ១០នាក់ស្លាប់ ៣៣នាក់រងរបួសដោយសារគ្រោះអគ្គីភ័យមួយក្នុងក្រុងប៉ារីស
មានមនុស្ស ១០នាក់ស្លាប់ និង ៣៣នាក់ផ្សេងទៀតរងរបួស នៅក្នុងគ្រោះអគ្គីភ័យមួយ ដែលបានកើតឡើង ក្នុងអាគារមួយកន្លែង ក្នុងទីក្រុងប៉ារីស។ គ្រោះអគ្គីភ័យនេះ បានចាប់កើតឡើងកាលពីយប់រំលងអាធ្រាតថ្ងៃចន្ទ ឈានចូលព្រឹកថ្ងៃអង្គារ ទី៥ កុម្ភៈ ឆ្នាំ២០១៩។ រហូតមកដល់ពេលនេះ គេនៅមិនទាន់ដឹងអំពី មូលហេតុពិតប្រាកដដែលបណ្តាលឲ្យមានភ្លើងឆេះនៅឡើយទេ។ ក៏ប៉ុន្តែ អាជ្ញាធរទីក្រុងប៉ារីសសង្ស័យថាមានអ្នកលួចដុត និងកំពុងតាមដានស៊ើបអង្កេតករណីនេះយ៉ាងសកម្ម។
ចុះផ្សាយនៅថ្ងៃ៖ កែប្រែថ្ងៃទី៖
គេឃើញផ្សែងនិងអណ្តាតភ្លើង ចាប់ផ្តើមឆេះនៅក្នុងអាគារមួយ ក្នុងសង្កាត់ទី ១៦ នៃទីក្រុងប៉ារីស នៅវេលាម៉ោង ១ ព្រឹក ថ្ងៃអង្គារនេះ។ ភ្លើងចាប់ផ្តើមឆេះ ចេញពីជាន់លើគេនៃអគារ។
បើតាមសាក្សី ដែលជាអ្នករស់នៅកន្លែងហេតុ បានឲ្យដឹងថា មុនពេលភ្លើងឆេះ គេបានឮស្ត្រីម្នាក់ ស្រែកយ៉ាងខ្លាំង។ ពួកគេគិតថា ប្រហែលជាអ្នកជិតខាងឈ្លោះប្រកែកគ្នា។ តែដោយក្រោយមក សំឡងស្រែក ក៏ចេះតែលាន់ឮកាន់តែខ្លាំងឡើងៗ គេក៏នាំគ្នារត់ចេញក្រៅដើម្បីមើល ក៏ស្រាប់តែឃើញផ្សែង និងអណ្តាតភ្លើងខ្មួលខ្មាញ់ ឆាបឆេះចេញពីអាគារជាន់លើបាត់ទៅហើយ។
គួរជម្រាបជូនថា ទំហំភ្លើងឆេះឆួលខ្លាំងណាស់ ហើយពិបាកពន្លត់ ដោយសារតែអគារដែលឆេះនោះ មិននៅជាប់នឹងផ្លូវ ដែលអាចឲ្យរថយន្តពន្លត់អគ្គីភ័យបើកចូលបាន។ តែទោះជាយ៉ាងណាក្តី ក្រុមពន្លត់អ្នកអគ្គីភ័យទីក្រុងប៉ារីសចំនួន២០០ នាក់ អាចគ្រប់គ្រងស្ថានការណ៍ និងពន្លត់ភ្លើងបានទាំងស្រុងនៅ រយៈពេល ៥ ម៉ោង ក្រោយមក។
គួរជ្រាបទៀតថា បន្ទាប់ពីកើតមានហេតុការណ៍នេះភ្លាម ប៉ូលីសបានចាប់ឃាត់ខ្លួនស្ត្រីសង្ស័យម្នាក់ និងបើកការស៊ើបអង្កេតគ្រោះភ្លើងឆេះនេះ ដោយចោទប្រកាន់ពីបទល្មើសព្រហ្មទណ្ឌ ដែលបង្កឲ្យមានមនុស្សស្លាប់។
ជុំវិញបញ្ហានេះដែរ អ្នករស់នៅក្នុងកន្លែងកើតហេតុ នាំគ្នានិយាយតៗគ្នាថា មូលហេតុដែលនាំឲ្យភ្លើងឆេះ គឺមកពីមានមនុស្សដុត ។ ពួកគេថា ប្រហែលជាមាននរណាម្នាក់លួចដុតភ្លើង ដោយសារតែមានជម្លោះជាមួយអ្នកជិតខាងគ្នា។
តែទោះជាមានការលើកឡើងបែបនេះក្តី ក៏រហូតមកទល់ពេលនេះ ប៉ូលិសទីក្រុងប៉ារីស មិនទាន់បញ្ជាក់ច្បាស់នៅឡើយ អំពីមូលហេតុពិតប្រាកដដែលនៅពីក្រោយគ្រោះភ្លើងឆេះនេះ។ ក៏ប៉ុន្តែ អាជ្ញាធរពិតជាសង្ស័យមែនថា គ្រោះអគ្គីភ័យនេះកើតឡើងដោយសារមានអ្នកលួចដុត។
ទាក់ទងរឿងនេះដែរ អភិបាលរងទីក្រុងប៉ារីស បានលើកឡើងថា លោកនៅមិនទាន់ហ៊ានបកស្រាយអ្វី ជុំវិញហេតុការណ៍នេះឡើយ។ លោកបន្តថា សាលាក្រុងទុកតួនាទីនេះ ឲ្យសមត្ថកិច្ចជំនាញ ជាអ្នកផ្តល់ព័ត៌មានលម្អិត និងច្បាស់ការណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ