បារាំងនិងអាល្លឺម៉ង់ត្រូវរ៉ូវគ្នាជុំវិញគម្រោងដំឡើងបំពង់បង្ហូរឧស្ម័នចេញពីប្រទេសរុស្ស៊ី
នៅថ្ងៃទី៨ កុម្ភៈ ឆ្នាំ២០១៩ បារាំង និងអាល្លឺម៉ង់បានចរចារត្រូវរ៉ូវគ្នាហើយអំពីការរក្សាតួនាទីសំខាន់របស់អាល្លឺម៉ង់ក្នុងនាមជាអ្នកតំណាងឲ្យសហភាពអឺរ៉ុបដើម្បីចរចាជាមួយប្រទេសរុស្ស៊ីពាក់ព័ន្ធនឹងគម្រោងដំឡើងបំពង់បង្ហូរឧស្ម័ន។ បំពង់បង្ហូរឧស្ម័នដែលអាចនាំយកឧស្ម័នមកពីប្រទេសរុស្ស៊ីដើម្បីផ្គត់ផ្គង់ក្នុងបណ្តាប្រទេសសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
កាលពីពេលកន្លងមក បារាំងហាក់ចង់កាត់បន្ថយឥទ្ធិពលរបស់អាល្លឺម៉ង់ តាមរយៈការអូសទាញបណ្តាប្រទេសសហភាពអឺរ៉ុបផ្សេងទៀតឲ្យមានសិទ្ធិក្នុងការសម្រេចលើចំណុចសំខាន់ៗដែលមាននៅក្នុងកិច្ចព្រមព្រៀងដំឡើងបំពង់បង្ហូរឧស្ម័នជាមួយប្រទេសរុស្ស៊ីដែរ។ ក៏ប៉ុន្តែចេតនារបស់បារាំងនេះ ទំនងជាអាចធ្វើឲ្យប៉ះពាល់ដល់គម្រោងការមួយនេះ។
ដូច្នោះហើយបានជានៅថ្ងៃទី ៨ កុម្ភៈ ឆ្នាំ២០១៩ បារាំងសុខចិត្តយល់ព្រមរក្សាតួនាទីស្នូលរបស់ប្រទេសអាល្លឺម៉ង់ក្នុងដំណើរការចរចាកិច្ចព្រមព្រៀងជាមួយប្រទេសរុស្ស៊ីស្តីអំពីគម្រោងដំឡើងបំពង់បង្ហូរឧស័ន្មដែលមានឈ្មោះជាភាសាអង់គ្លេសថា The Nord Stream 2។
បន្ថែមលើនេះ បារាំងនិងអាល្លឺម៉ង់បានសម្រេចឯកភាពគ្នាដែរទៅលើទីតាំងឬដែនទឹកសមុទ្រ របស់ប្រទេសសមាជិកសហភាពអឺរ៉ុបដែលត្រូវឲ្យបំពង់ឧស្ម័នឆ្លងកាត់។ នេះបើយោងតាមសារព័ត៌មានបារាំង AFP។
សូមរំឭកជូនថា The Nord Stream 2 គឺជាគម្រោងដំឡើងបំពង់បង្ហូរឧស្ម័នដែលបង្កើតឡើងដោយមានការផ្តួមផ្តើមគំនិតពីប្រមុខដឹកនាំអាល្លឺម៉ង់លោកស្រីអង់ហ្គេឡា មែរគែល និងប្រធានាធិបតីរុស្ស៊ីលោកវ៉្លាឌីមៀរ ពូទីន ចាប់តាំងពីឆ្នាំ២០០៥មក។ មិនតែប៉ុណ្ណោះ នេះគឺជាគម្រោងទី២ហើយដែលកើតចេញពីការសហការរួមគ្នារវាងប្រទេសទាំងពីរ។
គម្រោងដំឡើងបំពង់បង្ហូរឧស្ម័នលើកនេះ គ្រោងចំណាយថវិកាចំនួនប្រមាណជា១១ ពាន់លានដុល្លារសហរដ្ឋអាមេរិក និងបានចាប់ផ្តើមដំណើរការនៅខែឧសភា ឆ្នាំ២០១៨។ បំពង់បង្ហូរឧស្ម័ននេះផ្តើមដំឡើងចេញពីតំបន់ Vyborg ប្រទេសរុស្ស៊ី ចូលមកក្នុងសហភាពអឺរ៉ុប។ មួយវិញទៀត បើតាមសេចក្តីព្រាងនៃកិច្ចព្រមព្រៀង បំពង់បង្ហូរឧស្ម័នក៏ត្រូវដំឡើងកាត់តាមប្រទេសអ៊ុយក្រែនផងដែរ។
សូមជម្រាបជូនថា ទោះបីជាសេចក្តីព្រាងនៃកិច្ចព្រមព្រៀងរបស់គម្រោង The Nord Stream 2 បានប្រសូតចេញមកហើយយ៉ាងណាក្តី ក៏មានប្រទេសមួយចំនួនបង្ហាញជំហរមិនគាំទ្រដែរ។ ជាក់ស្តែង មានប្រទេសអឺរ៉ុបកណ្តាលនិងអឺរ៉ុបខាងកើតមួយចំនួន រួមជាមួយសហរដ្ឋអាមេរិក ជាពិសេសប្រទេសអ៊ុយក្រែនតែម្តង មិនគាំទ្រឡើយចំពោះគម្រោងមួយនេះ។ ពួកគេយល់ថាការនាំយកឧស្ម័នពីប្រទេសរុស្ស៊ីគឺជាគ្រោះថ្នាក់មួយ ពីព្រោះថាជាអាចឲ្យប្រទេសរុស្ស៊ីពង្រីកឥទ្ធិពលរបស់ខ្លួនកាន់តែខ្លាំងឡើងនៅអឺរ៉ុប។
តែទោះជាបែបនេះក្តី លោកស្រីមែរគែល ប្រមុខដឹកនាំប្រទេសអាល្លឺម៉ង់បានបញ្ជាក់ដោយទទូចថា ការនាំយកឧស្ម័នចេញពីប្រទេសរុស្ស៊ីគឺជារឿងសេដ្ឋកិច្ច ហើយថាគម្រោងនេះល្អនិងអាចជឿទុកចិត្តបាន ជាពិសេសវាអាចជួយកាត់បន្ថយការចំណាយរបស់បណ្តាប្រទេសសហភាពអឺរ៉ុបបានទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ