លោកដូណាល់ត្រាំបញ្ជាក់ថាប្រមុខសេអ៊ីអាពិតជាបានទៅជួបលោកគីមជុងអ៊ុនដោយសម្ងាត់
ចុះផ្សាយនៅថ្ងៃ៖
ស្តាប់ - ០៦:៥៦
លោកដូណាល់ត្រាំទើបនឹងបានបញ្ជាក់ នៅថ្ងៃពុធនេះថា លោកម៉ៃក៍ ប៉ុមប៉េអូ នាយកទីភ្នាក់ងារចារកិច្ចអាមេរិក ពិតជាបានធ្វើដំណើរដោយសម្ងាត់ទៅកាន់ទីក្រុងព្យុងយ៉ាងមែន ដើម្បីជួបជាមួយលោកគីម ជុងអ៊ុន ជជែកពីការរៀបចំធ្វើជំនួបកំពូល រវាងលោកដូណាល់ត្រាំ និងលោកគីម ជុងអ៊ុន។ ការបញ្ជាក់នេះធ្វើឡើង ក្រោយពីព័ត៌មានស្តីពីដំណើរទស្សនកិច្ចសម្ងាត់នេះត្រូវបានចុះផ្សាយដោយបណ្តាញព័ត៌មានអាមេរិក កាលពីថ្ងៃអង្គារម្សិលមិញ។
បើយោងតាមការផ្សាយរបស់កាសែត The Washington Post លោកម៉ៃក៍ ប៉ុមប៉េអូ បានធ្វើដំណើរទៅកាន់ទីក្រុងព្យុងយ៉ាង កាលពីថ្ងៃទី១មេសាកន្លងទៅ ហើយទៅក្នុងនាមជាតំណាងលោកដូណាល់ត្រាំ។
គួរបញ្ជាក់ថា លោកម៉ៃក៍ ប៉ុមប៉េអូ បច្ចុប្បន្នជានាយកទីភ្នាក់ងារសេអ៊ីអា ក៏ប៉ុន្តែ ត្រូវបានលោកដូណាល់ត្រាំតែងតាំងឲ្យធ្វើជារដ្ឋមន្រ្តីការបរទេសជំនួសលោករ៉ិច ធីល័រសុន។ បច្ចុប្បន្ន លោកប៉ុមប៉េអូ នៅរង់ចាំការអនុម័តយល់ព្រមពីព្រឹទ្ធសភា ទើបអាចឡើងកាន់តំណែងជារដ្ឋមន្រ្តីការបរទេសបាន។
កាលពីដំបូង ទីភ្នាក់ងារសេអ៊ីអា ក៏ដូចជា ក្រសួងការបរទេសអាមេរិកបានបដិសេធមិនធ្វើអត្ថាធិប្បាយជុំវិញព័ត៌មាន ស្តីពីដំណើរទស្សនកិច្ចសម្ងាត់របស់លោកប៉ុមប៉េអូ ទៅកាន់ប្រទេសកូរ៉េខាងជើងនេះទេ។ លោកដូណាល់ត្រាំវិញបានឲ្យដឹងនៅថ្ងៃអង្គារថា មានការជជែកគ្នាថ្នាក់មន្រ្តីជាន់ខ្ពស់ រវាង អាមេរិក និងកូរ៉េខាងជើង ដើម្បីរៀបចំជំនួបកំពូល ក៏ប៉ុន្តែ លោកមិនបានបញ្ជាក់ច្បាស់លាស់ទេថា តើមន្រ្តីជាន់ខ្ពស់នោះជានរណា។
ទើបនឹងថ្ងៃពុធនេះ ដែលលោកដូណាល់ត្រាំបានបញ្ជាក់យ៉ាងច្បាស់ៗ តាមរយៈធ្វីតធ័ររបស់លោកថា លោកម៉ៃក៍ ប៉ុមប៉េអូ ពិតជាបានធ្វើដំណើរទៅកូរ៉េខាងជើង ដើម្បីជួបជាមួយនឹងលោកគីម ជុងអ៊ុនពិតមែន។
បើយោងតាម លោកដូណាល់ត្រាំ ជំនួបកំពូល រវាងលោក និងលោកគីម ជុងអ៊ុន អាចនឹងធ្វើឡើង នៅដើមខែមិថុនា ឬក៏មុននេះ ប្រសិនបើអ្វីៗត្រូវប្រព្រឹត្តទៅដោយរលូនដូចការគ្រោងទុក ហើយថា បច្ចុប្បន្ននេះ មានទីកន្លែងចំនួន ៥ ដែលអាមេរិក និងកូរ៉េខាងជើងកំពុងតែជជែកគ្នា យកធ្វើជាទីតាំងនៃជំនួបកំពូល។
លោកដូណាល់ត្រាំក៏បានប្រកាសឲ្យដឹងផងដែរពីជំហររបស់លោក ដែលគាំទ្រការចរចាពីកិច្ចព្រមព្រៀងសន្តិភាព ដើម្បីបិទបញ្ចប់សង្រ្គាមកូរ៉េ ដែលរហូតមកទល់នឹងពេលនេះ មានចុះត្រឹមតែយុទ្ធសន្តិភាព ហើយមិនទាន់មានកិច្ចព្រមព្រៀងសន្តិភាពជាស្ថាពរនៅឡើយ។
គួរបញ្ជាក់ថា កូរ៉េខាងត្បូង ដែលគ្រោងនឹងបើកធ្វើជំនួបកំពូលជាមួយកូរ៉េខាងជើង នៅក្នុងតំបន់គ្មានកងទ័ព នៅថ្ងៃទី២៧មេសាខាងមុខនេះ បានលើកឡើងពីចេតនាចង់ឲ្យមានការចរចា រហូតដល់ចេញជាកិច្ចព្រមព្រៀងសន្តិភាពនៅឧបទ្វីបកូរ៉េ។ ការចុះកិច្ចព្រមព្រៀងសន្តិភាពនេះក៏ធ្លាប់ជាការទាមទារដ៏សំខាន់មួយដែររបស់កូរ៉េខាងជើង។
ក៏ប៉ុន្តែ ការិយាល័យប្រធានាធិបតីកូរ៉េខាងត្បូងបានលើកឡើងថា សង្រ្គាមកូរ៉េនេះនឹងមិនអាចដោះស្រាយចប់សព្វគ្រប់តាមរយៈកិច្ចព្រមព្រៀងតែរវាងកូរ៉េទាំងពីរនេះទេ។ វាត្រូវការឲ្យមានការចូលរួមពីភាគីពាក់ព័ន្ធទាំងអស់ ដើម្បីជជែក និងផ្តល់នូវការយល់ព្រម ចំពោះកិច្ចព្រមព្រៀងសន្តិភាពនេះ។
ជប៉ុនវិញបានទាមទារឲ្យមានការគិតគូរពីសំណុំរឿងដែលជាផលប្រយោជន៍ជាតិជប៉ុន នៅក្នុងដំណើរការចរចាជាមួយនឹងកូរ៉េខាងជើង។ លោកស្ហ៊ីនហ្សូ អាបេ នាយករដ្ឋមន្រ្តីជប៉ុន ដែលកំពុងបំពេញទស្សនកិច្ចនៅសហរដ្ឋអាមេរិក បានឲ្យដឹងថា លោកដូណាល់ត្រាំបានយល់ព្រមតាមសំណើរបស់ជប៉ុនថា ក្នុងកិច្ចចរចាទ្វេភាគីជាមួយកូរ៉េខាងជើង អាមេរិកក៏នឹងលើកយកផងដែរ នូវសំណុំរឿងជនជាតិជប៉ុនដែលត្រូវកូរ៉េខាងជើងចាប់ជំរឹតក្នុងអំឡុងសម័យសង្រ្គាមត្រជាក់ ទៅជជែកជាមួយនឹងកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ