កំពស់ទឹកទន្លេ Seine នៅតែបន្តកើនឡើងនាចុងសប្ដាហ៍នេះ
ប៉ារីសនិងជាយក្រុងប៉ារីសនៅតែស្ថិតក្នុងស្ថានភាពប្រុងប្រយ័ត្នខ្ពស់នៅឡើយនាចុងសប្តាហ៍នេះ ដោយសារកំរិតទឹកទន្លេ Seine នៅតែបន្តកើនឡើងជាលំដាប់។ តែទោះជាយ៉ាងណាក្ដី ភ្នាក់ងារគ្រប់គ្រងទឹកជំនន់បានលើកឡើងថា កំពស់ទឹកនឹងមិនឡើងដល់៦,២០ម៉ែត្រ ដូចដែលបានព្យាករណ៍កាលពីដើមសប្ដាហ៍នេះនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ប៉ារីសនិងតំបន់នៅតាមជាយក្រុងប៉ារីស កំពុងស្ថិតក្នុងស្ថានភាពប្រុងប្រយ័ត្នខ្ពស់នៅឡើយ នេះគឺដោយហេតុថា កំរិតទឹកទន្លេ Seine នៅតែមានកំរិតខ្ពស់ហើយនៅតែបន្តកើនឡើងជាលំដាប់។ កំពស់ទឹកបានកើនឡើងដល់ទៅ១១សង់ទីម៉ែត្រ នៅក្នុងរយៈពេល២៤ម៉ោងគិតត្រឹមល្ងាចថ្ងៃសៅរ៍ម្សិលមិញនេះ។
គួររំលឹកឡើងវិញថា កាលពីដើមសប្ដាហ៍នេះ ភ្នាក់ងារគ្រប់គ្រងទឹកជំនន់បានព្យាករណ៍ថា កំរិតទឹកអាចនឹងឡើងដល់កំពស់ ៦,២០ម៉ែត្រ។ តែទោះជាយ៉ាងណាក្តី បើយោងតាមរបាយការណ៍ព្យាករណ៍ចុងក្រោយ កំពស់ទឹកអាចនឹងកើនឡើងដល់ត្រឹម៥,៩៥ម៉ែត្រប៉ុណ្ណោះត្រឹមយប់ថ្ងៃអាទិត្យនេះ គឺមិនដល់ ៦,២០ម៉ែត្រនោះទេ ហើយក៏នឹងមិនអាចឡើងដល់៦,១០ម៉ែត្រ ដូចក្នុងឆ្នាំ២០១៦ដែរ។
ចំពោះសារៈមន្ទីធំៗមួយចំនួនក្នុងក្រុងប៉ារីសវិញ នៅតែស្ថិតក្នុងស្ថានភាពប្រុងប្រយ័ត្នខ្ពស់បំផុតដដែល ហើយផ្នែកខ្លះៗនៃសារៈមន្ទីរ Louvre ក៏នៅតែបិទជាសាធារណៈ។ ម៉្យាងទៀត អ្នកទេសចរជាច្រើនក៏មានការខកចិត្តយ៉ាងខ្លាំង ដោយសារការបិទដំណើរការនៃការជិះទូកកំសាន្ត Bateaux Mouches នៅតាមដងទន្លេ Seine។
ចំណែកឯប្រជាជនក្នុងតំបន់ ក៏ដូចជាអ្នករស់នៅតាមដងទន្លេ ក៏កំពុងទទួលរងគ្រោះដោយសារស្ថានភាពទឹកទន្លេនេះដែរ។ យោងតាមរបាយការណ៍របស់ប៉ូលីសបានអោយដឹងថា ប្រជាជនសរុបប្រមាណ១ពាន់នាក់ត្រូវបានជម្លៀសចេញពីទីលំនៅ ហើយមានប្រមាណ១,៥ពាន់គ្រួសារកំពុងរស់នៅដោយគ្មានអគ្គីសនីប្រើប្រាស់។ ផ្ទះសម្បែងមួយចំនួន រួមទាំងគ្រឿងសង្ហារឹម និងឧបករណ៍ប្រើប្រាស់នៅក្នុងផ្ទះក៏ទទួលរងនូវការខូតខាតផងដោយសារការលេចទឹកចូល។
យ៉ាងណាមិញ គេរំពឹងទុកថា អាកាសធាតុអាចនឹងប្រែជាល្អឡើងវិញសម្រាប់សប្តាហ៍ក្រោយ ហើយកំរិតទឹកអាចនឹងថយចុះទៅវិញ។ ក្រុមអាជ្ញាធរក៏បានបន្ថយសញ្ញាប្រកាសអាសន្នរបស់ខ្លួនពីពណ៌ទឹកក្រូចមកត្រឹមពណ៌លឿងវិញផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ