ការបោះឆ្នោតនៅកោះតៃវ៉ាន់ បង្ហាញពីវិបត្ដិសង្គម និងនយោបាយ
ពលរដ្ឋតៃវ៉ាន់រាប់លាននាក់ នៅថ្ងៃសៅរ៍ទី២៤ វិច្ឆិកា នេះ បានចេញទៅបោះឆ្នោតដ៏សំខាន់មួយក្នុងប្រទេស ដើម្បីសម្រេចជោគវាសនារបស់ប្រទេស ទាក់ទិននឹងគោលនយោបាយដឹកនាំរបស់រដ្ឋាភិបាល ដែលក្នុងនោះរួមមាន បញ្ហាផ្ទៃក្នុងប្រទេស ទំនាក់ទំនងជាមួយទីក្រុងប៉េកាំង និងសិទ្ធិអ្នកស្រឡាញ់ភេទដូចគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ការបោះឆ្នោតឃុំសង្កាត់នៅទូទាំងប្រទេសតៃវ៉ាន់ នាថ្ងៃសៅរ៍នេះ គឺជាការធ្វើតេសសាកល្បង ពាក់កណ្តាលអាណត្តិមួយ ជុំវិញមតិរបស់សារធារណជនតៃវ៉ាន់ ចំពោះគោលនយោបាយរបស់គណបក្សចំរើនប្រជាធិបតេយ្យតៃវ៉ាន់ ដែលជាបក្សកាន់អំណាច ដឹកនាំដោយ លោកស្រី ឆៃ អ៊ីងវេន ( Tsai Ing-wen)។
ការបោះឆ្នោត ក្រុមប្រឹក្សាឃុំសង្កាត់ លើកនេះ ក៏មានការធ្វើប្រជាមតិចំនួន ១០ ករណីផ្សេងទៀតផងដែរ ដែលរាប់បញ្ចូលទាំង ការគាំទ្រ ឬមិនគាំទ្រចំពោះ សិទ្ធិការរៀបអាពាហ៍ពិពាហ៍ភេទដូចគ្នា ការធ្វើទុក្ខបុកម្នេញលើជនជាតិភាគតិច ដែលកំពុងរស់នៅក្នុងទឹកដៃតៃវ៉ាន់ និងការប្រើឈ្មោះប្រទេសតៃវ៉ាន់ ដើម្បីប្រកួតប្រជែងនៅក្នុងព្រឹត្តិការណ៍កីឡាអន្តរជាតិននា ដែលបានធ្វើឱ្យប្រទេសចិនផ្ទុះកំហឹងជាខ្លាំង។
គួរជម្រាបជូនថា នាពេលបច្ចុប្បន្ននេះ រដ្ឋការរបស់ លោកស្រីឆៃ អ៊ីងវេន ជាអ្នកមាននិន្នាការជាតិនិយមខ្លាំង និងមិនទទួលស្គាល់នយោបាយចិនតែមួយ។ ការបោះឆ្នោតប្រជាមិតិលើកនេះ វាបានធ្វើឲ្យគណបក្សកាន់អំណាច របស់លោកស្រីឆៃ ឈឺក្បាលយ៉ាងខ្លាំង។
ដោយសារអ្វី? មូលហេតុនោះគឺថា រដ្ឋាភិបាលរបស់លោកស្រី កំពុងទទួលរងការរិះគន់យ៉ាងសម្បើម ពីសំណាក់ប្រជាជនតៃវ៉ាន់ លើគោលនយោបាយដឹកនាំប្រទេសជាច្រើន ដែលក្នុងនោះបញ្ហាសំខាន់ គឺរួមមានទំនាក់ទំនងមិនល្អ ជាមួយប្រទេសចិន ដែលជាហេតុធ្វើឲ្យគណបក្សកាន់អំណាចរបស់លោកស្រី អាចបាត់បង់សំឡេងគាំទ្រ និងចាញ់ឆ្នោត។
តែទោះជាយ៉ាងណាក្តី ប្រធានាធិបតីតៃវ៉ាន់ លោកស្រីឆៃ នៅតែរៀបចំការបោះឆ្នោតតាមមូលដ្ឋាន ដើម្បីជាសារប្រាប់ទៅកាន់ពិភពលោក ថា តៃវ៉ាន់ នឹងមិនឱនក្បាលនៅចំពោះមុខទីក្រុងប៉េកាំង ដែលបាននិងកពុងបង្កើនទាំងសម្ពាធយោធា និងការទូត លើរដ្ឋាភិបាលតៃវ៉ាន់ គឺចាប់តាំងពី គណបក្សឯករាជ្យនិយម របស់លោកស្រីឆៃ អ៊ីងវេន ឡើងកាន់តំណែងនៅឆ្នាំ២០១៦ មកម្ល៉េះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ