ជំនួបនៅក្រុងអាស្តាណា ស្តីអំពី៤តំបន់សន្តិសុខនៅស៊ីរី នឹងប្រព្រឹត្តទៅជាថ្មីនៅចុងខែសីហា
ថ្ងៃ៤និង៥កក្កដា នៅក្រុងអាស្តាណា រដ្ឋធានីកាហ្សាក់ស្ថាន មានប្រព្រឹត្តទៅ ជំនួបលើកទី៥ ស្តីអំពីការដាក់ឲ្យដំណើរការអនាគត”៤ តំបន់សន្តិសុខ” នៅស៊ីរី។ បានចូលរួម គឺភាគីប្រឆាំងស៊ីរី, គណៈប្រតិភូរដ្ឋាភិបាលក្រុងដាម៉ាស, បណ្តាតំណាងរបស់រុស្ស៊ី និង អ៊ីរ៉ង់ សុទ្ធតែជាសម្ព័ន្ធមិត្តលោក បាស្ហា អាល់ អាសាដ, តំណាងរបស់តួកគី-ប្រទេសជាបង្អែកពួកឧទ្ទាម។ ថ្លែងជាតុល្យាការ ក្នុងសម័យប្រជុំពេញអង្គ ប្រមុខការទូត កាហ្សាក់ស្ថាន-ប្រទេសម្ចាស់ផ្ទះទទួលជំនួបនេះ បានឲ្យដឹងថា ៣ប្រទេស ខាងធានាដល់ការឈប់បាញ់ នៅស៊ីរី ពោលគឺ រុស្ស៊ី អ៊ីរ៉ង តួកគី បានផ្ទុកផ្តាក់ឲ្យក្រុមការងារចម្រុះ លំអិតឲ្យបានដាច់ស្រេច អំពីគ្រប់តែល័ក្ខខ័ណ្ឌបច្ចេកទេសនៃ៤តំបន់សន្តិសុខនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
បានស្ថិតក្នុងរង្វង់នៃការពិភាក្សាថ្ងៃទី១ គឺបញ្ហាព្រំប្រទល់នៃតំបន់ទាំងនោះ ដែលបង្កើតឡើង តាមសំណើជាលើកដំបូង របស់ លោកប្រធានាធិបតីរុស្ស៊ីពូទីន កាលពីខែឧសភា និងរបៀបគ្រប់គ្រងវា។ ហើយក្នុងថ្ងៃទី២ នៃកិច្ចចរចា គឺមានប្រព្រឹត្តទៅជំនួបដាច់ដោយឡែកពីគ្នា ក្នុងលក្ខណៈបិទទ្វារ មួយចំណែកគឺ រវាង តំណាងនៃ ៣ប្រទេសធានា និង គណៈប្រតិភូភាគីឧទ្ទាមស៊ីរី និង មួយចំណែកទៀត គឺរវាងតំណាង ៣ប្រទេសនោះ និង គណៈប្រតិភូរដ្ឋាភិបាលលោក បាស្ហា អាល់ អាសាដ-ជំនួបទាំងនេះ ចាត់ចែងឡើង មុនដល់ពេលបើកសម័យប្រជុំពេញអង្គ។ បានវត្តមាន ក៏ទាំងប្រេសិតវិសាមញ្ញរបស់អសប ខាងបញ្ហាស៊ីរី លោកStaffan de Mistura ។
រុស្ស៊ី អ៊ីរ៉ង់ តួកគី កាលពីខែឧសភា បានអនុម័តគោលការណ៍នៃការបង្កើត តំបន់សន្តិសុខចំនួន៤នៅស៊ីរី ដើម្បីចាក់គ្រឹះរបបឈប់បាញ់ ឲ្យបានយឺនយូរ នៅតាមខេត្តជាច្រើននៃប្រទេសនេះ។
“តំបន់សន្តិសុខ”នោះ នឹងបង្កើតឡើងលើដែនដីពួកឧទ្ទាមក្នុងខេត្តIdleb ប៉ែកពាយ័ព្យ, ក្នុងខេត្តHoms ភូមិភាគកណ្តាល, នៅសង្កាត់ខាងកើតជាយក្រុងដាម៉ាស ឈ្មោះ Ghouta ក្រោមអំណាចពួកឧទ្ទាម និងនៅភាគខាងត្បូងប្រទេស។
បេសកជនពិសេស របស់វិមានក្រេមឡាំង ខាងបញ្ហាស៊ីរី លោក Alexandre Lavrentiev បានប្រកាសថា ព្រំប្រទល់នៃតំបន់សន្តិសុខពីរ គឺ នៅខេត្ត Homs និងសង្កាត់ Ghouta ”សន្មត់ថាអនុម័តទៅហើយ”។
ប៉ុន្តែ នៅចោទជ្រងោងដដែល គឺ” តំបន់សន្តិសុខ” ដែលត្រូវរួមក្តោប ខេត្ត Idleb ជាប់នឹងព្រំដែនតួកគី និង ”ទីបម្រុងខ្លះ” ដែលស្ថិតនៅតំបន់ខាងត្បូង។
មកពីមូលហេតុនេះ បានជា ៣ ប្រទេសធានា បានផ្ទុកផ្តាក់ ក្រុមការងារចម្រុះរបស់ខ្លួនខាងបន្ធូរបន្ថយ ភាព តានតឹងនៅស៊ីរី ឲ្យរួមប្រជុំនៅប្រទេសអ៊ីរ៉ង់ ថ្ងៃទី១និង ទី២សីហាខាងមុខ ដើម្បីបន្ទាប់មក រាយការណ៍ លទ្ធផល នៃ ការលំអិតឲ្យបានដាច់ស្រេច អំពីគ្រប់តែល័ក្ខខ័ណ្ឌបច្ចេទេស នៃ”តំបន់សន្តិសុខទាំង៤”នៅស៊ីរី ក្នុង ជំនួបលើកក្រោយ ស្តីអំពីសន្តិភាពសម្រាប់ស៊ីរី ដែលនឹងប្រព្រឹត្តទៅ នៅក្រុង អាស្តាណាជាថ្មី ក្នុង សប្តាហ៏ចុងក្រោយនៃខែសីហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ