ជប៉ុន៖ជំនួបកំពូល G៧ ផ្តោតសំខាន់លើសេដ្ឋកិច្ច អន្តោប្រវេសន៍ និងភេរវនិយម
នៅថ្ងៃព្រហស្បតិ៍ ទី២៦ ឧសភានេះ ក្រុមប្រទេសមហាអំណាចឧស្សាហកម្មទាំង ៧ ក្នុងលោកហៅកាត់ថា G៧ បានផ្តើមជំនួបកំពូលរយៈពេល ២ថ្ងៃក្នុងប្រទេសជប៉ុន។ ប្រទេសមហាអំណាចឧស្សាហកម្មទាំង ៧ មានជប៉ុន អាមេរិក បារាំង អាល្លឺម៉ង់ អង់គ្លេស អ៊ីតាលី និងប្រទេសកាណាដា។ មានប្រធានបទសំខាន់ៗជាច្រើនដែលប្រមុខរដ្ឋ និងប្រមុខរដ្ឋាភិបាលទាំង ៧ប្រទេសត្រូវលើកទៅជជែកនៅក្នុងជំនួបកំពូលរយៈពេល ២ថ្ងៃ។ តែអ្វីដែលគួរឲ្យកត់សម្គាល់ខ្លាំងនៅក្នុងជំនួបកំពូល G៧ ឆ្នាំនេះ គឺដំណើរទៅកាន់ទីក្រុងហ៊ីរ៉ូស្ហ៊ីម៉ារបស់លោកប្រធានាធិបតីអាមេរិកបារ៉ាក់ អូបាម៉ានៅថ្ងៃសុក្រ ទី២៧ ឧសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៣៦
ប្រធានបទសំខាន់ៗដែល G៧ លើកទៅជជែកនៅក្នុងជំនួបកំពូលឆ្នាំនេះសុទ្ធសឹងជាបច្ចុប្បន្នភាពក្តៅៗដែលពិភពលោកបាន និងកំពុងបន្តជួបប្រទះមកដល់សព្វថ្ងៃ រួមមាន វិបត្តិសេដ្ឋកិច្ចសកល វិបត្តិអន្តោប្រវេសន៍ក្នុងទ្វីបអឺរ៉ុប បញ្ហាភេរវនិយម និងជម្លោះនៅក្នុងសមុទ្រចិនខាងត្បូង។ តែដូចរៀងរាល់ឆ្នាំ សេដ្ឋកិច្ចនៅបន្តជាប្រធានបទអាទិភាពរបស់ជំនួបកំពូល G៧។ លោកនាយករដ្ឋមន្រ្តីជប៉ុនស្ហ៊ីនហ្សូ អាបេបានគូសបញ្ជាក់នៅក្នុងសន្និសីទកាសែតជាមួយលោកប្រធានាធិបតីអាមេរិកបារ៉ាក់ អូបាម៉ានាថ្ងៃពុធ ទី២៥ ឧសភាថា លោក និងលោកអូបាម៉ាបានយល់ឃើញដូចគ្នាពីការស្វែងកំណើនសេដ្ឋកិច្ចសកលសម្រាប់រយៈពេលវែង និងរឹងមាំ។
តែគេបានសង្កេតឃើញជាលក្ខណៈទូទៅថា មានប្រមុខរដ្ឋ និងប្រមុខរដ្ឋាភិបាលខ្លះរបស់ G៧ បានយល់ឃើញ និងឲ្យសារៈសំខាន់ខុសៗគ្នា។ ជប៉ុន និងអាមេរិកបានលើកឡើងពីការអនុវត្តឲ្យមានសមភាពរវាងនយោបាយហិរញ្ញវត្ថុ នយោបាយថវិកា និងនយោបាយកំណែទម្រង់រចនាសម្ព័ន្ធ។ ជប៉ុន និងអ៊ីតាលីបានយល់ឃើញដូចគ្នាពីការបង្កើនការចំណាយដើម្បីជួយផ្តល់សន្ទុះសេដ្ឋកិច្ច។ តែអាល្លឺម៉ង់ និងអង់គ្លេសមិនឯកភាពដោយបានឲ្យអាទិភាពលើនយោបាយកំណែទម្រង់រចនាសម្ព័ន្ធ។
សម្រាប់អ្នកខ្លះទៀតយល់ថា ប្រទេសនីមួយៗដែលមានតម្រូវការមិនដូចគ្នា និងមានគោលនយោបាយសេដ្ឋកិច្ចខុសគ្នាគួរតែចាត់វិធានការដោយផ្អែកលើស្ថានការណ៍ និងតម្រូវការជាក់ស្តែងរបស់ខ្លួន និយាយបែបម្យ៉ាងទៀត គេមិនត្រូវមានវិធានការរួមដើម្បីយកទៅអនុវត្តន៍នៅគ្រប់ប្រទេសនោះទេ។ ដូច្នេះ G៧ ត្រូវតែរកផ្លូវកណ្តាលមួយដែលអាចទទួលយកបានទាំងអស់គ្នាសម្រាប់ជួយលើកដំកើងសុខភាពសេដ្ឋកិច្ចពិភពលោក។
អឺរ៉ុបអំពាវនាវឲ្យ G៧ ជួយដោះស្រាយវិបត្តិជនអន្តោប្រវេសន៍
នៅក្នុងសន្និសីទកាសែតមួយនាឱកាសជំនួបកំពូល G៧ ក្នុងទឹកជប៉ុនថ្ងៃនេះ លោកដូណាល់ ទូស្កបានថ្លែងច្បាស់ៗថា សហគមន៍អន្តរជាតិត្រូវតែមានសាមគ្គីភាពជួយដោះស្រាយវិបត្តិជនអន្តោប្រវេសន៍ក្នុងទ្វីបអឺរ៉ុប ដោយមិនគួរទុកឲ្យអឺរ៉ុបដោះស្រាយតែម្នាក់ឯងទេ។ លោកប្រធានក្រុមប្រឹក្សាអឺរ៉ុបចង់ឲ្យចាត់ទុកវិបត្តិមួយនេះជាវិបត្តិពិភពលោក ព្រោះនេះជាលើកទី១ តាំងពីក្រោយសង្រ្គាមលោកលើកទី២ ដែលមានកំណើនលំហូរជនអន្តោប្រវេសន៍ និងជនភៀសខ្លួន កំណើនអ្នកសុំសិទ្ធិជ្រកកោណ និងកំណើនអ្នករត់ចោលផ្ទះសម្បែងមកកាន់អឺរ៉ុប។
សូមរម្លឹកជូនថាក្នុងឆ្នាំ ២០១៥ កន្លងទៅ មានជនអន្តោប្រវេសន៍ប្រមាណជា ១លាន ៣សែននាក់ ភាគច្រើនមកពីប្រទេសហែកហួរដោយសង្រ្គាមដូចយ៉ាងស៊ីរី និងអ៊ីរ៉ាក់បានសុំសិទ្ធិជ្រកកោណនៅក្នុងសហភាពអឺរ៉ុប។ ក្នុងខែកញ្ញាកន្លងទៅ សហភាពអឺរ៉ុបបានអនុម័តនូវកិច្ចព្រមព្រៀងមួយក្នុងការចែកគ្នាទទួលយកជនអន្តោប្រវេសន៍ក្រុមទី១ ដែលមានគ្នា ១៤០ ០០០នាក់។ តែឥឡូវនេះ លោកដូណាល់ ទូស្កចង់ឲ្យមានការរួមចំណែកបន្ថែមពីសហគមន៍អន្តរជាតិ ពិសេសពីក្រុមប្រទេសអ្នកមាន G៧។
សំណូមពររបស់លោកដូណាល់ ទូស្កចំពោះ G៧មាន ៣ ទី១ បង្កើនជំនួយសម្រាប់បំពេញតម្រូវការជាបន្ទាន់ ទី២ ជួយជំរុញស្ថាប័នហរិញ្ញវត្ថុអន្តរជាតិ និងប្រទេសផ្តល់ជំនួយផ្សេងទៀតឲ្យបន្ថែមជំនួយរបស់ខ្លួន និងទី៣ លោកដូណាល់ ទូស្កសុំឲ្យ G៧ ជួយគិតគូររំលែកយកជនអន្តោប្រវេសន៍ពីអឺរ៉ុបទៅដាក់នៅក្នុងប្រទេសផ្សេង។
យុទ្ធនាការប្រឆាំងភេរវនិយមតាមរយៈបិទខ្ទប់ប្រភពចំណូល
ដើម្បីចូលរួមប្រយុទ្ធប្រឆាំងនឹងអង្គការភេរវនិយម G៧ បានផ្តោតលើការបិទខ្ទប់ប្រភពហិរញ្ញវត្ថុគ្រប់ប្រភេទ។ ប្រភពចំណូលហិរញ្ញវត្ថុដែលជាដង្ហើមអនុញ្ញាតឲ្យពួកភេរវជនដើរបង្កភេរវកម្ម និងសាបព្រោះនូវមនោគមវិជ្ជាជ្រុលនិយមរបស់ពួកវា។ វិធានការមួយនេះត្រូវបានរដ្ឋមន្រ្តីក្រសួងហិរញ្ញវត្ថុរបស់ G៧ អនុម័តនាកិច្ចប្រជុំក្នុងថ្ងៃទី២១ ឧសភាកន្លងទៅ។ ដើម្បីអាចប្រឆាំងនឹងប្រភពចំណូលរបស់អង្គការភេរវនិយមឲ្យមានប្រសិទ្ធិភាព G៧ បានស្នើឲ្យមានកិច្ចសហប្រតិបត្តិការរវាងប្រទេសនិងប្រទេសដោយមានជំនួយពីស្ថាប័នហិរញ្ញវត្ថុអន្តរជាតិក្នុងការផ្តោះផ្តូររាល់ព័ត៌មានទាំងឡាយដែលទាក់ទងនឹងការដោះដូរ និងការផ្ទេរទឹកប្រាក់នៅតាមបណ្តាញធនាគារ។
ទន្ទឹមគ្នានេះ រដ្ឋមន្រ្តីក្រសួងហិរញ្ញវត្ថុរបស់ G៧ ក៏បានអំពាវនាវឲ្យមានការពង្រឹងបន្ថែមលើវិធានការហិរញ្ញវត្ថុដែលមានស្រាប់សព្វថ្ងៃ ពិសេសយុទ្ធនាការប្រយុទ្ធប្រឆាំងនឹងការលាងលុយកខ្វក់ ដោយស្នើឲ្យមានការដាក់ទ័ណ្ឌកម្ម ឬមួយក៏ផ្អាប់លុយនៅក្នុងគណនីយណាដែលម្ចាស់ព្យាយាមលាក់អត្តសញ្ញាណពិតរបស់ខ្លួន។
លោកអូបាម៉ាមិនសុំទោសរឿងទម្លាក់គ្រាប់បែកនៅទីក្រុងហ៊ីរ៉ូស្ហ៊ីម៉ា
កំណត់សម្គាល់សំខាន់ និងលេចធ្លោនៅជំនួបកំពូល G៧ ឆ្នាំនេះ គឺទស្សនកិច្ចរបស់លោកអូបាម៉ានៅទីក្រុងហ៊ីរ៉ូស្ហ៊ីម៉ាដែលបានរងគ្រោះដោយគ្រាប់បែកបរិមាណូអាមរិកក្នុងសង្រ្គាមលោកលើកទី២។ ជារឿងរ៉ាវមួយដែលបានបិទបញ្ចប់ទៅជាង ៧០ឆ្នាំ តែបន្តជាសំណុំរឿងរសើបខ្លាំងសម្រាប់សហរដ្ឋអាមេរិក។ រសើបខ្លាំងព្រោះគ្រាប់បែកបរិមាណូអាមេរិកកាលណោះបានសម្លាប់អ្នករស់នៅក្នុងទីក្រុងហ៊ីរ៉ូស្ហ៊ីម៉ា ១៤ម៉ឺននាក់ របួសជាច្រើនម៉ឺននាក់ និងដែលចំហាយធាតុវិទ្យុសកម្មបានធ្វើឲ្យប៉ះពាល់ដល់សុខភាពប្រជាជនជប៉ុនរស់ក្នុងទីក្រុងហ៊ីរ៉ូស្ហ៊ីម៉ាមកដល់សព្វថ្ងៃ។ នេះដោយមិនរាប់បញ្ចូលពីការប៉ះពាល់ដល់ផ្លូវចិត្ត និងផ្លូវអារម្មណ៍របស់ប្រជាជនជប៉ុនផង។
ក្រោយការបិទបញ្ចប់សង្រ្គាមលោកលោកទី២ មក អតីតគូសត្រូវអាមេរិក និងជប៉ុនបានក្លាយជាសម្ព័ន្ធមិត្តមែន តែស្នាមរបួសប្រវត្តិសាស្រ្តនៅបន្តមាន និងប្រហែលគ្មានថ្ងៃរលុបបាត់សូនឈឹងទេ។ ម្យ៉ាងទៀត ជាង ៧០ឆ្នាំក្រោយមក ក៏គេមិនដែលឃើញមានរូបប្រធានាធិបតីអាមេរិកណាដាក់ជើងជាន់ទីក្រុងហ៊ីរ៉ូស្ហ៊ីម៉ាដែរ។ ដូច្នេះវត្តមានរបស់លោកអូបាម៉ាពិតជារឿងប្រវតិ្តសាស្រ្ត និងបង្កប់ដោយនិមិត្តរូបខ្ពស់ណាស់។ អ្វីដែលប្រជាជនជប៉ុនទូទៅ ពិសេសក្រុមគ្រួសារជនរងគ្រោះចង់ឮពីមាត់លោកអូបាម៉ា គឺការទទួលខុសរបស់អាមេរិក។ តែលោកអូបាម៉ាបានប្រាប់រួចហើយថា លោកនឹងមិនថ្លែងសុំទោសអ្វីទេ តែទៅហ៊ីរ៉ូស្ហ៊ីម៉ាដើម្បីគោរពវិញ្ញាណក្ខន្ទជនរងគ្រោះ និងបញ្ជាក់ពីជំហររបស់អាមេរិកសម្រាប់ពិភពលោកមួយគ្មានអាវុធនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ